Alejo Arce

Alejo Arce
Alejo Arce
Minundagan	Alejo Guadalupe Arce; 17 Hulyo 1892; Nueva Caceres, Ambos Camarines
Kagadanan	28 Mayo 1974
Nasyunalidad	Filipino
Alma mater	University of Nueva Caceres
Mga bantog na gawad	Premio Zóbel

Si Alejo Guadalupe Arce (Hulyo 17, 1892 - Mayo 28, 1974)^[1] sarong Bikolanong edukador asin parasurat kan Nueva Caceres asin Iriga, Ambos Camarines. Namundag siya sa mga magurang na sinda Agaton Arce asin Isabel Guadalupe. An naagom niya iyo si Soledad Florenda (1905-2006) asin an pagsasaro ninda nagbunga nin pitong aki.

Nagtapos si Arce nin Batsilyer sa Edukasyon Sekondarya sa Southern Luzon College asin Masterado sa University of Nueva Caceres sa ciudad nin Naga kun saen nagsurat siya kan taon 1955 kan tesis na dai napublikar, titulado "An Approach to the Standardization of Writing Bicol".^[2] Nagin siya prinsipal asin superintendente. Siya nagin man sarong district supervisor sa Departamento nin Edukasyon asin ultimong toka niya nadestino siya sa siring na katongdan sa Minalabac, Camarines Sur, bago siya nagretiro.

Ginawadan siya kan Premio Zobel kan 1962 huli sa saiyang librong El Bicolano y su Ambiemte (An Bikolano asin saiyang Kapalibotan). Ini sarong obra niya sa Espanyol na nagguno nin pinakahalangkaw na premyo sa bilog na Filipinas.

Saro man siyang tagaambag sa Sanghiran Nin Bikol. Magkapira man an sinurat niyang mga artikulo sa syensia arog kan detalyadong pag'oogid niya sa mga buskay asin mga sira sa dagat alagad dai nasaray ta napabayaan mati'mos.

Kan mga taon 1930, siya nagin adviser (auditor?) kan Parents-Teachers Association kan Naga Central School sa Naga (ngonyan Syudad nin Naga), Camarines Sur na iyo an nagpagibo kan pinaka-amay na rebulto ni Jose Maria Panganiban, taon 1930.