Antonio Salazar

Gikan sa Bikol Sentral na Wikipedia, an talingkas na ensiklopedya

Si Antonio "Toling" Bufete Salazar (Mayo 9, 1907 - Pebrero 3, 1980) sarong Bikolanong peryodista, parasurát, asín kolumnista. Siyá namundág sa Malinao, Albay.

Siyá nagpapadión kutâ asín nagklase man sa Seminario Conciliar de Nueva Caceres alágad daí na tinápos huli ta nag-agóm. Huli sa adal niyáng iní, marháy siyáng magtarám asín magsúrat sa Kastila dawà nganì magián man siyáng sumúrat sa tataramon na Bikol. Bantóg sa arapodan na "Pay Toling," haros bilog na buhay niyá nag-erok siyá sa Ciudad nin Legazpi asín dumán piníli niyá an karera bilang peryodista. Nagin siyáng editor dumán kan Bicol Herald asin taga-ambág man sa ibá pang mga publikasyon. Kaamayi kaini, kan taon 1939, siya nagtogdas, asin mismo siya an editor, kan magasin na Bikolnon na nasusurat sa lenggwaheng Bikol.[1]

Pamilya[baguhon | baguhon an source]

An amâ niyá iyó si Ambrosio "Busoy" Salazar saróng Kastilaon, bulagáw an matá, lampyagáw, asín marháy na pintor asín eskultor. An amâ niyá namundág sa San Agustin, Pili alágad nag-estar na sa Malinao huli ta dumán nakapangagóm.

An enot na agóm ni Antonio iyó si Ester Mejillano asín an pagsasarô nindá nagbúnga nin anom (6) aki: sindá Teresita, Anita, Gregorio Sr., Barazel, Santos asín Rafael. Sa ikaduwáng agóm niyá kan nabálo, mayò sindáng nagin akì. Magsingakì sindá ni Manuel Salazar huli ta magtúgang an mga amâ nindá. Alagad, osipón kan akì ni Manuel na si Milagros, inatáman ni Ambrosio si Manuel poón kan sadít pa iní huli ta naílong-lubós. Mantâ naghuhúnà si Milagros na primo talaga ni Manuel si Antonio. An Bikol Region Directory nagsasábi na an tunay na magúrang ni Manuel iyó sinda Angel Bufete asín Ciriaca Bufete. Totóo bakóng malínaw kun anóng relasyon ni Angel ki Lutgarda Bufete.

Mga sinurat[baguhon | baguhon an source]

Palibhásâ marháy sa Espanyol kinuá siyá kan Comision nin Centenario Ni Jose Rizal, katuwáng si Mariano Goyena del Prado sa pag-Bikol kan mga tokdâ ni Jose Rizal. An Noli Me Tangere asín El Filibusterismo, sa saindáng paghingówa, napalagdâ kan Comision kan taón 1962. Kadungán man digdí an mga Rawitdawit Ni Jose Rizal na tinostosán man kan Comision na mapalagdâ sa pagromdom kan Sentenaryo kan heroe kan Filipinas.

An sarong naiibá digdí sa paglapígot nindá na ma-Bikol an mga obra ni Rizal, pinagbúhay nindá an mga lumang tatarámon kan Bikol na saindáng ginuno' sa mga napalamán sa Vocabulario de la Lengua Bicol na hinamán ni P. Marcos de Lisboa.

Toltolan[baguhon | baguhon an source]

  1. Olano, Ramon, Jr. Bikol Journalism Since the 1890's. The Knight. Ateneo de Naga. Vol. XVIII, No. 1. Nov., 1965. Ateneo de Naga. p.31.

Ginunoan[baguhon | baguhon an source]

  • Paháyag asín osipon ni Oriel "Rolly' Salazar-Buatez, sobrino ni Antonio Salazar, taga-Bombon, Cam. Sur. (Enero 22, 2009)
  • The Bicol Region Directory. Publisher: Valentin de Niña Lazarte.Vol. 1. 1936. Commonwealth Press, Inc. Manila.
  • Retrato ni A. Salazar sinapî sa magasin na Bicolandia.
  • Bikol Literary History. Maria Lilia F. Realubit.