Apolonio Sto. Tomas

Gikan sa Bikol Sentral na Wikipedia, an talingkas na ensiklopedya
Apolonio Sto. Tomas
Si Apolonio Sto. Tomas asin agom na si Eugenia kan saindang kasal.
Personal na mga detalye
Kamundagan (1901-07-10)Hulyo 10, 1901
Iriga, Camarines Sur
Kagadanan Agosto 14, 1988(1988-08-14) (edad 87)
Syudad nin Naga, Camarines Sur
Nasyunalidad Filipino
Agom Eugenia Sibulo
Mga aki Salvacion Gerona
Rosario Sto. Tomas
Cecilia Pardo
Dinakulaan Canaman, Camarines Sur
Kasibotan Parasurat

Si Apolonio "Polon" Borromeo Sto. Tomas (Hulyo 10, 1901 - 14 Agosto 1988) sarong Bikolanong parasurat, orador asin kagsurat kan librong Macauiuiling Caaguihan can Ladauan ni Nuestra Señora de Peña Francia.[1]

Kaamayan kan saiyang buhay[baguhon | baguhon an source]

Namundag sa mga magurang niya na sinda Ildefonso asin Felipa Borromeo, an saiyang pamilya guminikan sa banwaan na Iriga, Camarines Sur dangan naghubò nin istaran antes si saindang kura madestino sa banwaan nin Canaman, Camarines Sur kan 1916. Siring sa saiyang mga magurang asin mga tugang, nagserbe man siya sa simbahan komo sarong sakristan.

Pagsurat[baguhon | baguhon an source]

Dai nin pormal na pag-adal sa pagsurat si Sto. Tomas. Nagin miyembro siya kan kasararoan na Sanghiran Nin Bikol, sarong grupo nin mga parasurat na Bikolano kun sain kaayon man an mga darakulang tawo siring ninda Casimiro Perfecto, Luis Dato, Simeon Laneta, Rosalio Imperial, Sr. asin Mariano Villafuerte.

Kan 1931, ipinublikar kan Imprenta Bicolandia an Macauiuiling Caaguihan can Ladauan ni Nuestra Señora de Peña Francia. Kinomisyon ini ni Mariano Villafuerte sa paghimuyaot na mapadagos an pagbalangibog kan agi-agi kan Defensora asin Patron kan Rehiyon Bikol, si Nuestra Señora de Peñafrancia. An 31-pahinang libro nakasurat sa tataramon na Bikol sa pormang awit.

Politika[baguhon | baguhon an source]

Dayupot na amigo asin kaalyado sa politika si Sto. Tomas ni Mariano Villafuerte sagkod iba pa na mga politiko huli kan tibay kaining magsurat asin magtaram sa atubangan nin mga tawo.[2] An librong Macauiuiling Caaguihan can Ladauan ni Nuestra Señora de Peña Francia na ipinasurat kan dating gobernador iyo an nagpabantog sa parasurat.[3][4] Sa edad na 33, inagom niya si Eugenia Sibulo kan Naga taon 1934 asin nagin padrino ninda si Villafuerte.

Makuapo ninda Sto. Tomas asin Eugenia Sibulo si Leni Robredo, an balo kan dating Sekretaryo kan DILG Jesse Robredo mantang makuapo man ni Villafuerte asin Soledad Robredo, si Luis R. Villafuerte na nagin representante kan segundo distrito kan probinsiyang Camarines Sur.[5]

Pagromdom[baguhon | baguhon an source]

Kampeon sa Tigsik sa Padurunongan kan 2011, ipinapahiling an Apolonio B. Sto. Tomas Medallion

Taon 2013, pormal na namukna an sarong foundation kan kapag-arakian ni Sto. Tomas. An saiyang akì na si Cecilia Sto. Tomas Pardo iyo an namamayo ngunyan kan Apolonio B. Sto. Tomas Foundation Inc. Kabali sa mga programa kaini iyo an pagpadrino sa Padurunongan asin an pagprodusir kan pelikulang Posporo na isinurat ni Bernardo Miguel Aguay, Jr.

Mga hihilngan[baguhon | baguhon an source]

Toltolan[baguhon | baguhon an source]

  1. Apolonio Sto. Tomas[permanent dead link] Local Government of Canaman Archived 2012-03-14 at the Wayback Machine.
  2. Sa pahina 83 kan libro ni Danilo Gerona
  3. Sa pahina nin kapaliwanagan ni Mariano E. Villafuerte kan Macauiuiling Caaguihan can Ladauan ni Nuestra Señora de Peña Francia, pahina 31
  4. Gerona, pareho
  5. Political foes share Chinese ancestry[permanent dead link]