Clemente Alejandria

Gikan sa Bikol Sentral na Wikipedia, an talingkas na ensiklopedya
Magluksó sa: nabigasyon, hanapon
Si Clemente Alejandria (yaon sa gamping wala)

Si Clemente Bolocon Alejandria (23 Nobyembre 1895 - 7 Oktobre 1981) saróng Bikolanong poeta asín kompositor nin kanta sa tatarámon na Bikol. Namundág siyá sa Dinaga, Canaman, Camarines Sur sa mga magúrang na sindá Geronimo Alejandria, tubong Dinaga asín si Victoria Bolocon na gikan sa Mangayawan, sa parehong banwaan. Naagóm niyá si Valeriana Frundoso sa edad na 21 kan 1916 asín nagbúnga an saindáng pagsasarô nin pitóng aki: Matea, Antero, Rita, Lucia, Laurentino, Herminia, (na nagadán sa edad sanáng 6) asín si Fe Levy.

Pag-adal[liwatón | liwaton an gikanan]

Gikan sa mga simpleng pamilya asín sa ordinaryong pamumúhay, si Alejandria nag-adal sa Canaman Central School abót ika-3ng Grado. Dangan ipinadágos niyá an saíyang edukasyon abót ika-5ng Grado sa Naga sa Camarines Sur National Highschool na nakiki-estar sa haróng ni Queteria de Cecilio, sa hampang kan Lindez Hotel (kan dating Grand Imperial Plaza).

Dawà daí natápos an pagklase, nagpahíling siyá nin harárom na adal sa sadiring tatarámon na Bikol asin abilidad sa paghamán nin mga rawitdáwit sagkód komposisyon sa musika. Nagin maestro niyá an dati asin daínang si Dip. Ignacio Meliton.

Pinagkasibotan[liwatón | liwaton an gikanan]

Monumento ni Alejandria sa tangâ kan mga monumento kan Quadricentennial asín Tangcong Vaca Guerilla Unit sa Parke ni Don Damaso Requejo sa Canaman, Camarines Sur

Siyá, kan soltero pa, naglilibot-líbot sa probinsya kan Albay sa pagpabákal nin mga chucheria sa mga boro-banwáan kainí oróg na sa banwaan nin Ligao na iyo an pinipirmihan niyá. Kan pag-edad 22 anyos, nagpirmi siyá sa Manguiring, Magarao asín naki-trabaho sa saróng Kastila ng si Miguel Sanchez, sarong negosyante na may komprada sa abaká. Nagin man siyáng paraóma asín katuwáng sa mga pandáy na bantógan kan Canaman. Tatao siyáng magtogtóg nin gitara, banduria, bajo asín byolin huli ta hilig niyáng gayo an musika.

Sa saróng patiribáyan sa pag-Bikol kan rawitdáwit na Mi Ultimo Adios ni Jose Rizal kan 1926, nagunò ni Alejandria an ikaduwáng premyo.[1] Kan luminuwas an Calendariong Bicol (1921) asín Sanghiran nin Bikol (1927), parehong publikasyon ni Casimiro Perfecto na nagtataóng doon sa literatura, siya nagin na gayong mahigós na paraambág kainí. Malà ta kan nagpatiribayán an Sanghiran sa pagsúrat nin halipot na osipon, siya an guminána kan saiyang entri na tituladong "Paniki." Iní bagay na nasapáwan niyá pa si oróg na nakapag-adal na mga parasurát arog nindá Mariano Nicomedes asín Rosalio Imperial, Sr. na nagkamit saná kan mga menor na premyo.

Mga tinokdâ niya[liwatón | liwaton an gikanan]

Susog sa saíya mansaná, huli sa kagurángan, iní na saná an naromdoman niyáng pinangagpadará niyá asín nalagdâ sa Calendariong Bicol, sa Sanghiran nin Bikol asín sa ibá pang mga magasin arog kan Bicolandia (1928-1932).

Iní nagkapirá sa mga rawitdáwit ni Alejandria:

  • An Bandera
  • An Barongbarong
  • An Kalendariong Bikol (Calendariong Bicol)
  • An Bukid Nin Kinaban (Sanghiran an Bicol)
  • An Liwanag Kan Apgot (Ipinalagdâ niyá sa polyeto-pulitikal)
  • An Mga Kahoy
  • Arin Ngani
  • Bagong Kapanahonan (SB Blg. 21)
  • Bagong Taon na Maaliwalas
  • Burak Hain Ka Na! (Bicol Book Review, Nob. 1956)
  • Estrella del Sur (Bicolnon, 1940[2])
  • Filipinas (SB)
  • Pag-aroanggoyong (CB), (SB, 1927[3])
  • Kun Maharasahas (SB)
  • Lolobngan (SB)
  • Nagsisinarom (CB)
  • Pagkamundag ni Jesus (9/20/73)
  • Paglanat Nin Puso (CB, 1931)
  • Pag-omaw kan reinang kokoronahan (8/14/72)
  • Rabus (dai niya ipinalagdâ)
  • Sa Bagong Kapanahunan (SB)
  • Sa Madaling Osip (Bicolnon, 1940)[4]
  • Tolong Kabanalan (SB)

Sarô sa kinompos niyá na kanta (Danza Menor, pig-adaptar):

Ika an Ilaw Ko

Ika an ilaw ko sa buhay,
Ilaw ka nin pagkamoot,
Minamahal taka
Sa puso ko talanhok
May karibarawan
An sakong puso
May haronahod
Pagsabi daw neneng,
Kun dai man inigo
Si sakuyang mga pagtios
Mga pasilot mo sa sako
Bakong ako baga
si haloy nang nagmawot
Na magin saimo
Sagkod may buhay
Taga pag lingkod.

Ginunuan[liwatón | liwaton an gikanan]

Mga ginunoan[liwatón | liwaton an gikanan]

  1. Clemente Alejandria Panitikan website
  2. Siring man
  3. Siring man
  4. Siring man

Mga takod panluwas[liwatón | liwaton an gikanan]