Holy Rosary Minor Seminary

Gikan sa Bikol Sentral na Wikipedia, an talingkas na ensiklopedya
Magluksó sa: nabigasyon, hanapon
An Holy Rosary Minor Seminary
Atubangan kan Holy Rosary Minor Seminary

An Holy Rosary Minor Seminary dating Seminario Conciliar de Nueva Caceres sarong eskwelahan sa pagporma solamente kan mga magpapadion asin tinogdas kan Simbahan Romano Katoliko. Nakalugar ini sa kalye Elias Angeles, barangay kan Sta. Cruz, Ciudad nin Naga asin kanatad niya an Naga Metropolitan Cathedral, kahampang niya an Palasyo Arsobispado nin Caceres. An saiyang mga kurso sa kolehiyo binibisto asin akreditado kan Departamento nin Edukasyon.

Uusipon[liwatón | liwaton an gikanan]

An seminaryong ini susog mismo sa folleto na pinaluwas kan Museo del Seminario Conciliar de Nueva Caceres daing gayo aram an eksaktong panahongkun kasuarin tinogdas.

An marker na yaon sa mayor na tata kan Seminario nagsasabi na tinogdas ini ni Domingo Collantes, O.P., Obispo kan Nueva Caceres kan Marso 7, 1797. Alagad, susog sa libro ni Domingo Abella (Bikol Annals, 1954, p. 139) iyo si Obispo Juan Antonio de Orbigo, O.F.M. mismo an nagpoon pagtogdas kan seminario conciliar ta hale mismo sa saiyang ngabil pinagtomoy niya sa saiyang report bago siya nagpasiring sa Manila pagkapot kan Arzobispado kaini, na " nakaya niyang mag-andorog sa mga pangangaipo , espiritual asin temporal kan saiyang mga sakop, mapahirahay an katedral, asin makapatogdok nin sarong palasyo asin sarong seminario conciliar ngani iyo an mag-ataman kan pagpadi kan mga seminarista...."

Si Juan Antonio de Orbigo, nagtukaw komo Obispo kan Nueva Caceres poon taon 1778 abot taon 1788. Kaya maski siya an nagpoon kan seminario, iyo si Obispo Collantes an nag-organisar asin nagpainagurar kaini kan taon Marso 7, 1793 na totoo kan parehong petsa pakalihis nin apat na taon (1797) sa termino mansana niya, nagkaigwa kan sinasabing Canonical Erection kaini.

Alagad, an sinabing seminario panahon ni Orbigo asin Collantes gibo sana sa tiklad-asin-kahoy na pagharongon. Ini namumugtak sa lugar kun saen an Fiesta Hotel ngonyan nakatogdok asin iyo ngani ini an rason kun napano ta naapod an kalye diyan na Padian (ngonyan Kalye Caceres na an ngaran), na boot sabihon gibohan nin mga padi. An ibang historyador totoo arog ki Danilo Gerona sinasabi na an taramon na Padian mas tinutubod niya na tinotumoy kaini iyo idtong lugar na estaran kan mga Instik sa gilid kan salog abot diyan sa Tabuco asin ginuno' sa katagang parian.

Maski ngani si Orbigo nagsasabi na siya nagpoon kan seminario conciliar, igwa nin ebidensya na dati nang igwang pinonan na adalan nin mga seminarista diyan sa harani sa pampang kan salog sa may Padian na inapod kadto na Casa de Clerigos na nagtener sa pag'oltan kan mga taon 1685 abot taon 1709 na natogdas ni Obispo Andres Gonzales.

Huli ta an lugar diyan sa harani sa pampang salog kaladman asin pirming sinasanop kan tubig haleng salog, pinagmarhay na idakit an seminario igdi sa presenteng lugar na namumugtakan na kan seminario asin catedral. Ini nangyari sa panahon kan an obispo kan Nueva Caceres iyo si Bernardo de la Concepcion, O.F.M., Obispo kan Nueva Caceres poon 1816 abot 1829.

Pinagmukna niya an kaisipan na sararoon an katedral (dati nalulugar diyan sa presenteng saod), an palasyo kan Obispo asin an seminario. An proyektong saiyang pinonan mas nakakadakula ta gibo na sa ladrillo asin gapo.

Sa panahon na nagtukaw komo Obispo si Manuel Grijalvo, O.S.A., taon 1848-1861, an seminario nag-agi sa mga kalamidad. Mala ta kan Okt. 24-27, 1856, may uminaging makusogon na bagyo asin nagkarurugba ini. Napahirahay man totoo ini alagad dai pa ngani napipintahan, natomtom sa dakulang kasulo an enterong edipisyo kan umagahon nin Agosto 22, 1860.

Kaya igwang panahon na, manta dai pa natotogdok an edipisyo, an mga klase kadtong mga seminarista ginigibo duman sa kumbento kan San Francisco na nakalugar diyan sa gilid kan salog nin Naga, atubangan kan namumugtakan na ngonyan kan monumento kan Quince Martires.

Pighingoa man kuta ni Obispo Grijalvo mapasulit an edipisyo mala ta nagkampanya siya asin nakatipon hale sa mga donasyon nin 10,000 na pesos alagad dai niya naabot an pagpoon kan pagpatindog kaini. Sa saiyang testamento, nag-ambag pa siya nin 1,000 pesos hale sa sadiring bulsa.

Sa panahon ni Francisco Gainza , Obispo kan Nueva Caceres poon 1862 abot 1879, napagantad an kamugtakan kan seminario. Sa saiyang paghihingoa asin pag'oonoy, naitindog niya liwat an edipisyo kaini, asin dinugangan niya pa nin saro na iyo na ining nakahampang sa tinampo, nagaayog sa arkitekturang Moslem. Palaen pa kayan, napakaray an mga kurso sa pag'adal pagkapadi huli sa pagpromulgar nin mga bagong leyes asin napabago an institusyon ta ginibo nang seminario-colegio. Ibinalyo niya an pag-administrar kaini sa mga Pading Paul, mga padi na myembro kan Congregacion de la Mision. Ini sarong orden na tinogdas ni San Vicente de Paul kan taon 1625.

Paglaog kan taon na 1925, pinagboot ni Obispo Francisco Reyes na an seminaryo bagohon na an pangaran. Inapod nang Seminario del Santissimo Rosario. Mga arog man kaining taon na an mga estudyante na dai man magpapadi sinuway na sa seminaryo asin ini an pinakaenot na nagin mga estudyante kan Camarines Sur Catholic Academy kan an huri pig'organisar.

Taon 1945,panahon nin gera, an mga Hapon binomba an seminario asin sa kabo'tan nin Diyos, dai man naradas. Ini pinahirahay ni Obispo Pedro Santos ngani makabalik sa dati niyang kamugtakan.

Kan taon na 1964, an pangaran kan seminaryo hinira otro, asin inaapod nang Holy Rosary Seminary.

Komo aragihan bagyo an Bikol, dai naman nakaligtas sa makusogon na bagyo kan 1970 an seminaryong ini. Mala ta grabi an pagkarugba kaini asin dakula an ginasto kan Simbahan sa pagpahirahay. An Obispo kan panahon na iyan iyo si Obispo Teopisto Alberto.

Kan Hunyo 11, 1978, pinagdeklara an seminaryo komo sarong National Historical Landmark kan Filipinas.

Kan Septyembre 5, 1988, sa pormal na seremonya pinamayohan kan Arsobispo na iyo si Reberendo Leonardo Legaspi, O.P., D.D., duwang importanteng pagbabago an nangyari sa buhay kan seminaryo. Enot pinangaranan na ining Holy Rosary Minor Seminary asin ikaduwa , pinag-inaguraran an Museo sa seminario, bagay na iyo an pinaka-enot na seminario na magkaigwa nin siring. Opisyalmente, an dara kaining pangaran Museo del Seminario Conciliar de Nueva Caceres.

Sa orog na pagpakaray kan serbisyo kan seminaryo asin ikadugang sa hararom na pag-adal kan mga seminarista, kan Oktobre 17, 2003 binuksan asin benenditahan ni Arsobispo Leonardo Legaspi, O.P., D.D., an Bishop Collantes Library, na 280 metro kwadrado an hiwas, kayang magsangat nin 30,000 na libro asin makaka-igo na magpwesto an sanggatos katawo na parabasa.

Igwa ini nin kuleksyon kan mga libro sa Humanidades, orog na sa Pilisopiya, asin nin mga bantogan na parasurat poon pa kan lumang panahon sagkod ngonyan, asin siring man sa syensya. May partikular na saray igdi nin mga libro na Bikoliana asin sa Asian Studies.

An library inginaran ki Obispo Domingo Collantes, nagtukaw na Obispo sa Nueva Caceres kan 1788 abot 1808.

Mga kursong tangro kan Seminario[liwatón | liwaton an gikanan]

An laog kan Seminario
Museo de Seminario

Sa presente, an Seminaryo nagtatangro nin mga kurso sa Artes Bachiller, major sa Pilosopiya, minor sa Religious Education na binibisto kan Commission on Higher Education.

Mga Kurso sa Pilosopiya:

Major Courses:

Introduction to Philosophy, Logic and Argumentation, Epistemology, Philosophy of Man, Metaphysics, History of Ancient Philosophy, History of Medieval Philosophy, History of Modern Philosophy, Contemporary Philosophy, Oriental Philosophy I & II, General Ethics, Special Ethics, Philosophy of Religion, Science, and Language, Social and Political Philosophy with Marxism, Philosophy of Human Rights, Indigenous Philosophy.

Minor in Religious Education Courses:

The Bible and Jesus Christ, The Doctrines of Christian Faith, Living the Christian Faith, Liturgy and Worship in the Church, Catechetical Methodology with Practicum, Family Life and Population Education.

Mga Administrador asin mga Estudyante[liwatón | liwaton an gikanan]

Sa lindong kan pamamayo ni Most Rev. Rolando Octavus Tria Tirona, O.C.D.,D.D. an presenteng Rector kan Seminaryo iyo si Fr. William M. Parde sa asistensya kan mga director na sa Most Rev. Jose Rojas ( Director of Intellectual Formation), Fr. Benedick John Eguia (Liturgy Moderator), Fr. Eric Bobis (Director of Spiritual Formation), Fr. Nunilon Bancaso (Director of Pastoral Formation), Fr. Nelson Zaballa (Director of Human Formation), Fr. Manuel Zagada (Executive Dean of Studies), Fr. Eugene Lubigan (Financial Administrator).

Kalakawan kan mga pinaadal niya[liwatón | liwaton an gikanan]

An seminaryo, saiyang ikakapamansag, iyo an ginikanan kan dakul na mga pading nagkapot kan liderato kan Simbahan. Duwang polo may saro (21) kan Obispo kan Simbahan hale igdi naggraduar. An enot na Pilipinong Obispo si Jorge Barlin asin an saro sa anom na Filipinong Kardinal si Jose Tomas Kardinal Sanchez igdi man pareho nagtapos.

Dakulaon man an papel kaini sa kalakawan kan Pamanang Banwaan ta siya an pinagtaposan pag'adal ni Jose Maria Panganiban asin igdi man naggraduar si Tomas Arejola saka siyam (9) kan kaglimang 15) Bikolanong martir na iyo sinda P. Gabriel Prieto, P. Severino Diaz, Leon Hernandez, Mariano Ordenanza, Mariano Arana, Camilo Jacob, Ramon Abella, Domingo Abella, asin si Tomas Prieto.

Mga toltolan[liwatón | liwaton an gikanan]

1. Bikol Annals. A Collection of Vignettes of Philippine History. vol 1. Abella, Domingo. 1954. Manila. 384 p.
2. The Diocesan Seminary. Sarong artikulo nagluwas sa Peñafrancia Official Souvenir Program, Sept. 20-21 1941. d. 118,183,185,187,189. Kagsurat: Agapito Sacristan, C.M., Rector Kan Seminario (1937- ? )Sa Souvenir Program na ini igwa pang ibang mga seriosong artikulo dapit sa piyesta kan Penafrancia, asin manongod sa pagkasuronod kan mga Obispo sa Nueva Caceres. 210 na boklit
3. Folleto Pinalagda kan Museo del Seminario Conciliar de Nueva Caceres

Mga panluwas na takod[liwatón | liwaton an gikanan]