Iglesia Filipina Independiente

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
An logo kan Iglesia Filipina Independiente
Si Gregorio Aglipay- an pinakaenot na Obispo Maximo kan Iglesia Filipina Independiente
Si Isabelo de los Reyes, Sr.- an kagtogdas kan Iglesia Filipina Independiente

An Iglesia Filipina Independiente ( Ingles, Philippine Independent Church, inaapod man na Simbahan Aglipayano) sarong denominasyon Kristiyano na nag'aayog sa tradisyon Katoliko bilang ini sarong simbahan nasyonal sa Filipinas alagad suway sa organisasyon kan Simbahan Katoliko Romano. An paglitik kaini sa Simbahan Katoliko nabantolin kan mga enot na kaapil kan enot na pederasyon nin mga unyon nin mga trabahador sa nasyon, an Union Obrera Democratica Filipina kan taon 1902. Si Isabelo de los Reyes iyo an saro sa kagtolod nin paglitik asin pigsonson niya na an enot na pamayo kan litik na simbahan iyo si Gregorio Aglipay.[1][2] Naapod man ining Simbahan Aglipayano huli ta an enot na Obispo Supremo kaini iyo si Gregorio Aglipay. Inaapod man na mga Aglipay an mga kaapil kan simbahan.

Makuri an reaksyon kan Simbahan Katoliko, mala ta an Santo Papa pig';orden sa Arsobispo kan Manila na ekskomunikaron an mga nagpamayo sa paglitik.[3] Poon 1960 an simbahan aglipayano nakikisaro sa Simbahan Episkopal kan Estados Unidos asin man poon 1965 nakisaro man sa Lumang Unyon Katoliko kan Utrecht.

An presenteng Obispo Maximo iyo si Reverendo Ephraim Fajutagana D.D., na an opisinang sentral yaon sa National Cathedral of the Holy Child sa may Taft Avenue, Ermita, Manila.

An agi-agi kan Iglesia Filipina Independiente[liwaton | liwaton an gikanan]

Kan taon 1898, an Katipunan pinamamayohan nin duwang lider, si Andres Bonifacio asin Emilio Aguinaldo. Si Arsobispo Bernardino Nozaleda dinulok si Aglipay asin sinugo na kaulayon an duwang lider na ini sa pagtangro sainda nin autonomiya para sa Filipinas kun oontokon an rebelyon. Si Aguinaldo man sinubol si Koronel Luciano San Miguel ki Aglipay ngane maalok na magbali sa rebelyon. Alagad, kan si Aglipay nagbkiyahe paNorte, tyempong nagputok na an Gerang Filipino-Amerikano. Kan bumalik na siya sa Manila, an mga Amerikano palan inatake asin linaog na ini. Si Aglipay nagbali na logod sa rebolusyon, mala ta kan Oktobre 20, 1898 siya nanombrahan na Vicar Heneral Militar kan mga rebolusyonaryo. Sumunod na aldaw, si Aglipay nagpawarak nin sarong surat sa mga clerigo na hinohorot niya an mga ini na hagaron ki Santo Papa na magnombra na nin mga pading filipino sa gabos na mga katongdan sa simbahan. Kan Mayo 5, 1899, si Arsobispo Bernardino Nozaleda pig'ekskomonikar si Aglipay sa Simbahan Katoliko.

Kan 1902 kan an Filipinas teritoryo na kan Estados Unidos, si Isabelo de los Reyes piglalakaw na an pagbilog nin sarong Filipinong simbahan. Kan Agosto 3, nagswestyon si de los Reyes na sarong Simbahan, suway asin independiente sa Simbahan Katoliko Romano dapat matogdas na, asin pigsonson niya sa kairiba na si Aglipay an gibohon na Obidpo Supremo. Kan enot, nangutiil si Aglipay sa alok ni de los Reyes ta saro siyang Katolikong deboto

Dinulok siya kan duwang pading Heswita, si Francisco Foradada asin Joaquin Villalonga ta gusto siyang mapapirma sa sarong dokumento na pinapanindogan niya an lealtad niya sa Simbahan Katoliko Romano. An sabi niya mapirma siya kun an Simbahan lakawon an kagustohan niyang madugangan na madugangan an pagnombra sa mga importanteng pwest an mga filipinong padi. Nahapot ni Foradada kun ano man daa ta gusto madagdagan an may mga katongdan na pading filipino ta orog nang mga aliwalas sa trabaho daa an mga filipinong padi asin daing kapinohan. An komentong ini naka'arat na gayo ki Aglipay asin sinasarabi na binuntol daa kani idtong si Foradada. Nangyari logod si Aglipay pinutol na niya an relasyon sa Simbahan Katoliko asin inako an alok ni de los Reyes na siya an mamayo sa naglitik na simbahan filipino.

Kan Enero 18, 1903, si Aglipay pignombrahan bilang Obispo Supremo kan Iglesia Filipina Independiente kan mga obispo sa Manila, Cavite, Nueva Ecija, Isabela, Cagayan, Pangasinan, asin Abra.

Kan si Aglipay nagparabyahe asin nagparalibot sa iba-ibang nasyon, nadara siyang magsikwal kan doktrinang Trinidad asin nagin siyang Unitaryo. Alagad, an Simbahan Aglipayano habo mag'ako kan nahirang teolohiya niya. An pagka-Unitaryo niya sa pagtubod orog na naririraw sa saiyang sinurat na nobenaryo, an Pagsisiyam sa Birhen sa Balintawak, 1925 [4] asin an palis kaini sa Ingles, Novenary of the Motherland, 1926.Aglipay.


Mga Obispo Maximo kan Simbahan Aglipayano[liwaton | liwaton an gikanan]

Mga simbahan kan mga Aglipay[liwaton | liwaton an gikanan]

Toltolan[liwaton | liwaton an gikanan]

  1. Achutegui, Pedro S. de & Bernad, Miguel A. (1971) "The Religious Coup d'Etat 1898–1901: a documentary history", in Religious Revolution in the Philippines, Volume III. Manila: University Press (cited in Larkin, John A. "Review 74-- No Title", The Journal of Asian Studies, Nov 1972; 32,1. at Proquest (subscription)
  2. History
  3. "Pope Orders Sharp Action; Archbishop of Manila Instructed to Excommunicate Philippine National Church Promoters", New York Times, New York, NY: Dec 29, 1902. p.7
  4. Aglipay, Gregorio, Pagsisiyam sa Birhen sa Balintawak, 1925