Jose Tomas Sanchez

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
Si Jose Tomas Kardinal Sanchez[1]
Eskudo de armas ni Jose Tomas Kardinal Sanchez: "Tokdoan mo akong magsunod sa Saimong Kabôtan"

Si Jose Tomas Sanchez ((Pandan, Catanduanes, Marso 17, 1920Siyudad nin San Juan, Marso 9, 2012) sarong Filipinong arsobispo kan Simbahan Katolika na iyo man an ikalima, sa anom na Filipinong pading nagin kardinal.

Kaamayan kan buhay[liwaton | liwaton an gikanan]

Siya namundag sa Pandan, Catanduanes sa mga magurang niyang si Patricio Sanchez asin Paz Tomas, sinasabing sarong Espanyol.[2], Siya an ikawalo sa sampolong magturugang [3], an duwa babae na saro igdi nagin madre, si Sor Fortunata Sanchez kan Hijas de la Caridad.

Si Sanchez nagkua kan saiyang elementarya sa Pandan Elementary School, dangan nagklase na sa Seminario Conciliar de Nueva Caceres (1934-1938). Nagkua kan saiyang kurso sa Edukasyon asin Teolohiya sa Unibersidad kan Santo Tomas.

Serbisyo sa simbahan[liwaton | liwaton an gikanan]

An enot niyang ambisyon sa buhay iyo kuta an magin inhinyero asin kan an seminaryo isara kan mga Hapon kan panahon nin gera, ngane'ngane na siyang dai magbalik kun dai pa napirit kan mga amigo niyang mga seminarista. Si Sanchez naordenan sa pagkapadi kan Mayo 12, 1946, enot na toka niya iyo sa Sorsogon, Sorosogn kun saen siya nagtokdo sa Seminario Penafrancia asin sabi niya sa sarong interbyu [4] pinatokdo siyang Espanyol Latin, asin ta mayong ibang makapot, pati Geometry saka Algebra. Sumunod nagin siyang katuwang na pastor sa Paroko nin San Rafael sa siyudad nin Legazpi manta na chaplain sa St. Agnes Academy. Nanombrahan pa man siyang Chancellor/Economus kan diocesis nin Legazpi, asin pakatapos natoka siyang pastor kan paroko San Gregorio I Magno sa parehong siyudad manta na vicar general siya kan nasabing diocesis. Sa mga toka niyang ini, mahigos man siyang nagtotokdo sa mga seminaryo asin mga kolehiyo.


Kan Pebrero 5, 1986, siya pignombrahan na obispo auxilario kan arkeodiosesis nin Nueva Caceres asin obispo titular kan Lesvi. Kan Mayo 12, 1968, siya padagos nang pig'ordenan na obispo titular kan Lesvi. Sa Caceres, maigot niyang pig'organisar an Archdiocesan Rural Congress (1970) na an mga tagapakinabang iyo an mga daing sukat. Huli kaioni, nagbunga an dakul na mga institusyon nagtatabang sa mga kapobrehan arog kan mga kooperatiba nin mga paraoma, mga credit union, mga negosyo asin saradit na industriya sa mga baryo baryo. Masabi pa, saiyang pinakusog an papel kan Simbahan sa buhay kan mga tios. Saiya man pighusay an palakaw kan mga seminaryo, asin naitaas asin nasurog an interes kan mga kapadian y napadakul an bokasyon. Siring man, nagburak an hiron nin Cursillo kan panahon ni manta na natogdas niya an Familyu Rhythm Center na mataong giya sa mga pamilyang Katoliko dapit sa pagplano sa pag'aaki.

Kan Desyembre 13, 1971, pignombrahan siyang obispo coadjutor kan diosesis nin Lucena asin kan Septyembre 25, 1976, siya na an nagtukaw na obispo kan nasabing diosesis. Kan Enero 12, 1982, pigtokahan siyang Arsobispo kan arkediosesis nin Nueva Segovia. Orawa, poon 1975 abot 1985, siya an namayo kan CBCP Pension Plan, an takyag kan Simbahan na nag'aataman kan pension plan kan mga kapadian sa Filipinas.

Kan Oktobre 30, 1985, pinagbali siya sa Roman Curia, asin pinagtoka siyang Sekretaryo kan Congregation for the Evangelization of Peoples. Huli kaini, kan Marso 22, 1986, nagbutas siya sa kargo bilang Arsobispo kan Nueva Segovia.

Kan Hunyo 28, 1991, sa ginibong consistorio, itinaas siya ni Santo Papa Juan Pablo II sa Kolehiyo nin mga Kardinal bilang Kardinal-dekano nin San Pio V a Villa Carpegna. Dangan kan Hulyo 1, 1991 pigmukna asin pigproklama siya ni Santo Papa bilang Prefect Emeritus kan Congregacion nin Clero asin Presidente kan Administrasyon nin Patrimonyo kan Apostolic See. Itinaas naman an saiyang kargo bilang Kardinal-padi kan Pebrero 26, 2002.

Siya nagin ugos na kahadoy-hadoy kan Santo Papa hanggan siya guminurang asin kan Desyembre 3, 2010 nagpule na siyang Filipinas. Sa kagurangan, siya pig'ataman kan mga madre kan Dominican Daughters of the Immaculate Mother sa Quezon City. Nagadan siya kan Marso 9, 2012 asin ilinubong sa kamposanto kan Good Shepered sa Novaliches, Quezon City.

Sabi ni Francisco Tatad, saro man na Catandunganon arog ni Kardinal, an dayaday na pamibi ni Kardinal Sanchez iyo "...na dai man logod mangyari na an Kristiyanong pagtubod mapara sa Filipinas siring kan nangyari sa Europa." asin mawot na gayong malabanan an Reproductive Health Bill na pigtutubod niyang makakaratak sa filipinong pamilya dara kan ini maresulta sa pagwarak nin mga contraceptive na magigin pasil na an extramarital sex asin premarital sex. [5]


Mga panluwas na takod[liwaton | liwaton an gikanan]

Toltolan[liwaton | liwaton an gikanan]