Kalye Padian

Gikan sa Bikol Sentral na Wikipedia, an talingkas na ensiklopedya
An tinampong Padian (Caceres St.)
An mapa kan Naga

An Kalye Padian sarong tinampo na namumugtak sa syudad nin Naga, Camarines Sur, Filipinas. Ini ngonyan binago na an pangaran asin inaapod nang Kalye Caceres sosog sa Ordinansa Nu. 95-063.[1] Alagad, an Kalye Caceres, susog sa nasabing Ordinansa sinakop na an dati sakop na tinampo kan Kalye Dinaga kun kaya winarâ na an dating kalyeng idto sa mapa.

Sarong historikong tinampo[baguhon | baguhon an source]

An tinampong ini panahon pa nin Kastila nasasambit na bilang lugar kun saen namogtak an Casa de Clerigos[2], an pinakaenot na seminario na an nagpatogdok iyo soboot si Obispo Andres Gonzales (1685-1709), alagad susog ki Danilo Gerona mas tinutubod niyang an kalye Padian, naapod na padian bako ta may adalan nin mga magpapadion sa lugar na ini, kundi yaon igdi nakatiripon si mga naenot na Chino na inabotan kan mga Espanyol paglaog ninda sa Naga kan 1573. Nagin 'padian' sa Bikol an katagang 'parian' o 'pariancillo' na iyo an usong gamiton sa mga dokumentong Espanyol kan an mga Espanyol nagoonabi kan katiriponan nin mga kaiinsikan sa sarong lugar.

Igdi man sa tongod kan tinampong ini tinogdok an pinakaenot na palasyo kan Obispo kan Simbahan Katoliko asin harani sana sa palasyo an pinakaenot na katedral kan Naga, sa tongod kun saen namomogtak an modernong saod (Naga City People's Mall), alagad an duwang estrukturang ini, pati an seminario, pighubo sa presenteng lugar ni Obispo Bernardo de la Concepcion (1816-1829) huli ta an Padian medyo kaladman asin sinasanop nin tubig pag nasu'pay an Salog Naga orog na kun nabagyo.[3]

Igdi man ipighubo sa De La Rosa bldg. sa kalyeng ini an Cecilio Press kan an imprintahan kaini nasulo sa may Bgy. Sabang pero nagsulo man ngani igdi kan mga taon 1969. Dati man yaon igdi an duwang sinehan: an Vic Theater (na pagsasadiri kan pamilya Bichara) asin an Premier Theatre

Sa may bandang pasiring saod itinogdok kan Hunyo 10, 2010 an sarong plasa (Plaza de Nueva Caceres) kun saen may ikinaag igdi nin sarong monumento inapod Oragon sa pagtanda asin pagtaong onra sa mga gugurang na taga-Naga na maisog nagsabat asin nakilaban sa mga Kastilang mananakop kan Abril 1573.

Sa poro kan Kalye Padian (Caceres St.) nasumpay an Panganiban Drive asin an saibong na poro kan Kalye Padian nabaktas sa Kalye General Luna, dangan naagi sa irarom kan presenteng saod asin natakod sa nakabalagbag na Kalye Igualdad (ngonyan Dr. Jaime Hernandez Avenue na).

Mga panluwas na takod[baguhon | baguhon an source]

Hilinga man[baguhon | baguhon an source]

Toltolan[baguhon | baguhon an source]

  1. Ordinance No. 95-063 [1] Archived 2019-07-28 at the Wayback Machine.
  2. Abella, Domingo. Bikol Annals. 1954. p. 97
  3. siring man, p. 147