Kristian Cordero

Gikan sa Bikol Sentral na Wikipedia, an talingkas na ensiklopedya
Kristian Sendon Cordero
Minundagan (1983-04-23) Abril 23, 1983 (edad 40)
KasibotanParatukdô, parasurat, direktor
NasyunalidadFilipino
LahìBikolano
GenrePelikula, rawitdawit
Mga bantog na gawadGawad Pagromdom ki Carlos Palanca para sa Literatura, Premio Tomas Arejola para sa Literaturang Bikolnon
Si Kristian Cordero (2019)

Si Kristian Sendon Cordero[1] (kamundagan: 23 Abril 1983) sarong kagubay na Bikolanong parasurat direktor nin pelikula asin premiado kan Premio Tomas Arejola para sa Literaturang Bikolnon sa kategoryang Rawitdawit kan 2004.[2] Kagsurat siya nin nagkapirang mga libro kan saiyang mga panurat na rawitdawit sa Mga Tulang Tulala: Piling Tula sa Filipino, Bikol at Rinconada (ipinublikar kan 2004 asin 2007), Santigwar: Mga Rawitdawit sa Bikol asin Filipino (2006), Pusûánon: Mga Bersong Bikol igwang piling dakitaramon na Marne L. Kilates sagkod Francisco V. Peñones Jr. (2007), Labi (2013), asin Canticos: Apat na Boses (2013)[3], na nagresibe man kan 2014 Philippine National Book Awards. Direktor asin kagsurat siya kan pelikulang Angustia (2013).[4]

Sarô siya sa mga nagin panelista asin tagapadalagan kan Juliana Arejola-Fajardo Workshop sa Pagsurat-Bikol. Bàgo kaini, siya nagin partisipante sa Ika-42 na University of the Philippines National Creative Writing Workshop na ginibo kan 2003 sa Syudad nin Baguio.[5]Saro man siyang editor kang librong Sagurong 100 na Kontemporanyong Rawitdawit sa Manlain-lain na Tataramon Bikol.

Nakamtan niya sa Homelife Poetry Contest an nagkapirang premyo (Ikaduwa kan 1999, 2005, 2007 asin Mayor na Premyo kan 2004), nagkapirang premyo gikan sa Gawad Pagromdom ki Carlos Palanca para sa Literatura para sa halipot na usipon, saysay asin rawitdawit, asin an Madrigal-Gonzales Best First Book Award in 2006. Igwa man siyang nakuang pagmidbid gikan sa Unibersidad kan San Antonio, sa lokal na gobyerno kan Syudad nin Iriga siring man kan Syudad nin Naga.

Leon Aureus Award

Dating nagtutukdô si Cordero nin Humanidades sa Ateneo de Naga na Unibersidad.[6] Naging kaapil man siya kan Kabulig-Bikol sagkod na mareorganisar ini kan 2012. Sarô siya sa mga kagmuknâ kan organisasyon pangkultura na Sumaro Bikolnon asin kan grupo nin mga parakurit na Burikbutikan Artists Collective. Nagtutukaw siya ngunyan bilang myembro kan hunta nin direktor kan Philippine PEN International.

Si Cordero dating may kolum na Santigwar sa peryodikong Bicol Mail. Kan 2020, kasagsagi kan pandemya, tabangan nindang hinaman ni Tito G. Valiente an programang Himati na pigtampok sa pahina sa Facebook kan Savage Mind. Pigpapalabas igdi an pagbasa kan mga tula kan mga bantog na parasurat kun sain an mga nagbabasa mga midbid man na artista sa nasyun.[7]

Kan 2017, pigrepresentar nya an Pilipinas sa International Writing Program sa Unibersidad kan Iowa. Nagi man sya nin artist-in-residence sa Center for Southeast Asian Studies sa Unibersidad kan Michigan. Bilang sarong translator, pig-Bikol nya an mga surat kan mga bantog na parasurat na sinda Rainer Maria Rilke, Jorge Luis Borges, Franz Kafka, asin Oscar Wilde. Kan Nobyembre 2020, nagi syang resipyente kan Southeast Asian Writers Award na iginawad kan Thai Royalty. Sa presente, sya an nagpapadalagan kan Savage Mind, sarong lokal na bookshop asin art space na yaun sa syudad kan Naga. [8]

Si Cordero nagbukas nin sarong bookshop apod Savage Mind sa 5 Peninsula St., Syudad nin Naga, Camarines Sur.

Premyado bilang TOYM 2022[baguhon | baguhon an source]

Si Cordero premyado bilang saro sa Ten Outstanding Young Men of the Philippines para sa taon 2022 sa lantad nin Literatura, Kultura asin Arte kan Junior Chamber International Philippines, Inc (JCI Philippines) huli sa saiyang ipinahiling na talento asin higos sa saiyang karera.[9][10]

Toltolan[baguhon | baguhon an source]

Mga panluwas na takod[baguhon | baguhon an source]