Lapida

Gikan sa Bikol Sentral na Wikipedia, an talingkas na ensiklopedya
Granaterng lapida ni Josiah Leavitt (1679–1717), Hingham Center Cemetery, Hingham, Plymouth County, Massachusetts
Mga paragibong lapida sa Kalye Barlin, siyudad kan Naga

An lapida (Espanyol, lapida, Ing., tombstone) sarong tandá, na parati inuukit o linalabra sa marmol, gapo, o lansang asin ikinakaag sa pamayohan (o, pamitisan) kan lubongan o nitso nin sarong gadan. Igdi nakaguhit an pangaran kan gadan, petsa kun kasuarin namundag asin petsa kun kasuarin nagadan. Minsan man igwa pa nin dikit na pangadye o omaw na isinusurat sa pagromdom asin pag'onra kan nagadan hale sa saiyang pamilya o namomotan. An mga Kristiyano may krus na ikinakaag sa pamayohan kan lapida o sa taas mismo kan pantyon. Dati an lapida iyo na mismo an takop o lokdo sa lolobngan, kabaong o longon.

An mga lubongan asin an mga memoryal igdi iyo an pokus nin pagmumundo asin pagatid'atid kan mga dainang pariente. Huli ta an mga lubongan, nitso o pantyon dakulang kwarta an ginagasto, an mga ini nagigin simbolo nin yaman o pagkaprominente kan gadan sa komunidad kan siya nabubuhay pa. An ibang pamilya napakaag pa nin lubungan sa laog kan simbahan sa pagpatotoo kan saindang importansya bako sana sa komunidad kundi pati sa ddakulang naginibo ninda para sa Simbahan. An mga crematorium nataao man nin lugar para sa mga lapida sa laog mismo kan saindang kapilya sa pagromdom asin pagpangandye sa mga nag'ikaduwang buhay na alagad abo na sana an nakakaag sa urno.

Materyales[baguhon | baguhon an source]

An sarong kamposanto, arog halimbawa kan kamposanto nin mga Katoliko o mga pribadong sementeryo, may reglamento sa pagpagibo kan mga lolobngan sa rason nin pagpagayon, unipormidad, o ngane madale an paglinig asin paghirahay. An iba may ibinoboot na langkaw kaini asin rarom nin paglubong asin hitsura kan lapida o an dekorasyon. An mga ini pigmamantener nin sepulturero ngane dai madootan o mabandal. Sa luwas kan Filipinas, kun ano-anong materyales na ginagamit sa paggigibo nin lapida arog kan flinstone, slate,granate, marmol, sandstone. Igdi sa Filipinas an usong maray na gamiton iyo an marmol asin an pinaghahalean na dakul kaini iyo an isla nin Romblon.

Kataytayan nin mga ladawan[baguhon | baguhon an source]

Mga panluwas na takod[baguhon | baguhon an source]