Mariano Nicomedes

Gikan sa Bikol Sentral na Wikipedia, an talingkas na ensiklopedya

Si Mariano Almodovar Nicomedes, dara an alyas na "Sademokin" [1] (1873-1934) sarong Bikolanong poeta, peryodista asin taga-palagda nin peryodiko. Siya namundag sa Camaligan, Camarines Sur.

Parasurat siya nin mga rawitdawit, sarong-aktong drama, mga halipot na osipon, asin tagapalís sa Bikol kan mga tokdâ haleng Kastila. Sarô siya sa nagpalís sa Bikol kan duwang nobela ni Jose Rizal, an Noli Me Tangere (Hare Sakô Pagdotâ} asin kan El Filibusterismo (An Subersibo).

Katuwang niya sa Emeterio Abella asin Joaquin Teodorico kan pinalagdâ niya an peryodikong An Parabareta (1903-1908). An peryodikong ini binuhay niya pa asin nag-antos nganing 1930 alagad susog sa agom niyang si Catalina Nicomedes, bako nang sige-sige kundi taro-tarapok na depende kun igwang kwarta.

Nagtapos siya kan kursong Bachiller en Artes sa Seminario Conciliar de Nueva Caceres.

Saro man siya sa nagbilog kan kaayonan na Academia Bicolana (1927), sarong kasararoan na an katuyohan igantad an literaturang Bikol. Taga-ambag man siya nin mga artikulo sa magasin na Sanghiran Nin Bikol (1927-1931) asin kun minsan siya an nagsusurat kan mga editoyral kaini. Siya nagin man deputy auditor kan 1903 sa Ambos Camarines.[1]

Hilngon man[baguhon | baguhon an source]

  • An Palis Niya sa Bikol kan Mi Ultimo Adios
  • Bikol Literary History. Maria Lilia F. Realubit.
  • Bikol Journalism Since 1890. Ramon O. Olaño, Jr. The Knight. Ateneo de Naga. Vol. XVIII, No. 1. Nov. 1965.

Mga toltolan[baguhon | baguhon an source]

  1. impormasyon sinapi sa artikulo ni Casimiro Perfecto tituladong "El Bicol es Rico Tambien Al Igual de los Otros Dialectos"