Sanghiran nin Bikol

Gikan sa Bikol Sentral na Wikipedia, an talingkas na ensiklopedya
(Pinagbalikwat gikan sa Sanghiran Nin Bikol)
Maglukso sa: paglibotlibot, hanapon
An publikasyon

An Sanghiran nin Bikol (1927-1931) sarong publikasyon kan Academia Bicolana na enot na nagluwas kan Hulyo 1927. Ini pinalagda ni Casimiro Perfecto sa imprentahan kan Libreria y Imprenta Mariana. Katuyohan kan publikasyon an pagpakusog asin pagpabaskog kan literaturang Bikolnon.

Mga kagmukna[liwaton | liwaton an gikanan]

An mga kagmukna kaini iyo sa Casimiro Perfecto komo Tagapamahala, si Francisco Celebrado asin si Padre P. Jose Ofrasio iyo an Nagpapalakaw, asin an Poon na Parasurat iyo si Lorenzo Rosales. Sisasabi man[nangangaipo nin toltolan] na sa Casimiro Perfecto, Mariano Nicomedes asin si Francisco Celebrado iyo an nagriribay-ribay sa pagsurat kan editoryal.

Mga makusog asin maigot pang mga taga-ambag igdi iyo sa Clemente Alejandria, Luis Dato, Mariano Villafuerte, Nicolasa Ponte-Perfecto, Mariano Nicomedes, Rosalio Imperial, Sr., Patricio Janer, Padre Luis Dimarumba na iyo an presidente kan Academia Bicolana, Asisclo Jimenez, asin dakul pang iba.

Nagpondo ini kan publikasyon kan si Casimiro Perfecto naghubò sa Iloilo sa pag-asikaso kan imprentahan na La Panayana, saro pang pagrorogaring kan pamilya.

An pangaran na Sanghiran[liwaton | liwaton an gikanan]

Sanghiran. Oct 1927.JPG

An katagang sanghiran huminale sa taramon na sanghid na an boot sabihon, susog sa Vocabulario ni Lisboa (p. 334), la señal de oro en la piedra de tocar. Iyo ini an pagsanghid (pag-is'is o pagsantik kan bulawan) sa sarong gapo ngani mabasi kun baga maray na klaseng bulawan. Kun sa Ingles seguro, harani an terminong katumbas na, to assay. An taramon na ini yaon man sa Waray na may parehong kahulogan. An paggamit kan tataramon kun siring may pag-onabi sa pag-oogid kan tataramon komo sarong bulawan na pigaadalan na gayo.

Sa paggamit kan katagang Nasanghid, ini an ehemplo ni Lisboa: probar o tocar el oro en la piedra de toque.

An takop[liwaton | liwaton an gikanan]

An sarong bagay na pambihira kaini ta sa gabos na paluwas niya nin pirang taon, an pinaka-takop niya pirming pareho an desenyo: may Bikolanang nakatingag, sa atubangan yaon an saldang na masirang, sa gilid an sarong simbahan, asin sa walang kabtang an bulkan na Ma'yong asin man mahihiling an sarong poon nin niyog, na garo baga patotoo na an guta' sa niyog iyo an parating salak sa pagluto kan mga Bikolnon. Mahihiling man an mga libro sa pamitisan niya, simbolo nin kabatiran. Garo baga ini kwenta logo kan magasin asin may darang titulo na "Katinubdan Asin Lahian". Sa lambang paluwas nag'iiba-iba sana an kolor kan saiyang barayan, kun minsan giyaw, minsan asul, asbp. An pakadakula niya sukol kan sarong halaba na coupon bond. Parati naabot lampas sa duwang polong pahina ini.

Mga toltolan[liwaton | liwaton an gikanan]