Wikipedia:Mga napiling ladawan
Ini an mga nakaaging Napiling Ladawan:
[liwatón] Danilo Gerona Febrero 22 hanggan Hunyo 16
Si Danilo Madrid Gerona sarong Bikolanong historiador, parasurat, profesor asin kagdiskobre kan petsang May 27, 1579 komo aldaw nin pagkamukna kan provinciang Camarines. Namundag asin nag-eerok siya sa Canaman, Camarines Sur.
Nakua niya an titulong Bachelor asin Master nin Arte sa Pilosopiya sa Ateneo de Manila University asin Doktor nin Pilosopiya sa Philippine Studies (History) sa Unibersidad kan Pilipinas. Nag-adal si Danilo Gerona nin elementarya sa Canaman Central School asin ipinadagos an sekundarya sa Ateneo de Naga High School.
Siya an kagsurat kan From Epic to History: A Brief Introduction to Bicol History (1988), Recuerdos de Mi Colegio, Canaman Through Four Centuries (2008) asin kapwa-kagsurat kan Naga: The Birth and Rebirth of a City (2004).
[liwatón] Lokdô nin Libmanan hasta Febrero 21
An Lokdô nin Libmanan sarong takop nin tapayan-na-lulubngan na nakotkot soboot sa baryo kan Poro o Bigaho, Libmanan, Camarines Sur kan taon 1982 asin ini pigtutubod na tunay na relikyang gikan pa sa soanoy na panahon kan Kabikolan.
Sarong etnolohista, si Dr. Zeus Salazar, an nagsurat nin librong "Liktao at Epiko" (2004) manongod kaining lokdô na ini ginibo kan soanoy pang panahon. An lokdô may 32 na sentimetro an kalakbangan, may gatak na sa sarong gilid asin may mahihiling sa ibabaw garo mga pigura nin mga buaya, usa, mangkô asin man mga pigura nin tawo asbp.
Sa tangâ mismo kan takop may garo torre o kahoy na nagsaranga (segun ki Dr. Maria Lilia Realubit) na garo itsurang pagoda, asin sa poon kani sa sarong gilid igwang hitsurang lalawgon-saldang na may mga tingraw na naka-palibot.
