An Buhay Sa Uma
Rawitdawit na tinokda' ni Leonor Dy-Liacco, sinapi' sa libro niyang An Bikolana.
AN BUHAY SA UMA
- An mag'agom buhay ninda matoninong
- Sangkap sindang gayo sa pagharong-harong
- Saray asin tago sa su'yab na rirong
- Dai kaipuhan mag'estar sa "mansion...."
- An kaldero sartin, kawale o koron
- Saribo an dapog nugpo sa taluhong
- Ti'ris sa banggera plato asin baso
- Malinig an kuwit pati mga tabo'.
- Dai nanunubli' kudkuran o nigo
- May pala, may kagkag igwa pa nin tukon
- Pagsakat sa niog igwa man nin palaw.
- Igwa nin batya' ki Nanay labahan
- Nagibo nin sipit gibo sa kawayan
- Yaon sa likudan an mga sablayan
- Dai nanunubli' orog na kan sundang.
- May lubang may ha'lo
- Ta nagbababayo mayo nin molino
- Dakul an tinanom sa saindang natad
- Dai man tikapo sa Diyos minahagad.