An Duwang Lalawgon ni Uryol

Si Uryol an saro sa mga halimaw sa epiko kan Ibalon, sarong babayeng halas na igwa nin magayon na tingog asin may kakayanan na baguhon an saiyang porma. Midbid siya bilang kalaban ni Handyong, an makusog na dayuhan na uminabot sa Bikol kaiba an saiyang mga tauhan para puksaon an mga suruguon kan kadikloman. Mantang an duwa nagmamawot nin parehong bagay, an madaog an saindang kalaban, sindang duwa magkakadukayan. Si Uryol an patotoo na mayong tawo na tunay na midbid an dawa isay man ta sa balyo kan saiyang pagigin sumbikalan, igwa nin labi pa na dae nahihiling kan mata.

Sa gabos na halimaw na naka-atubang ni Handyong, si Uryol sana an dae niya kayang daugon. Mayong dae mamumuya sa tingog kaini kaya si Handyong pirming mayo sa sadiri. Pirang beses man siyang susugon, siudon, asin dakupon, pirming nakakadulag an maurag na si Uryol. Gamit an kakayanan niyang magbago nin saiyang porma, an mga kaiwal saiyang dinadaya kaya sa saindang mata pirmi siyang nawawara. Sa balyo kan saiyang pagigin tuso, ugwa pa siya nin mga karakteristiko na dae midbid kan iba. Siya minsan nang namuya sa isog ni Handyong. Dawa pa mawot siya kaining gadanon, sa pirang beses nindang hampangan saiyang natukduan si Handyong kun pano makipaglaban. Sa tabang niya, nakagadan si Handyong nin dakol pang mga halimaw. Si Uryol nagin parte kan kapangganahan ni Handyong na matawan nin katuninongan an daga nin ka-Bikolan.

Arog ni Uryol, an mga kababayehan ugwa nin kakayanan na dae dapat pagmenuson kan dawa isay man. An mga babaye igwa man nin tingog siring ki Uryol na kaipuhan tawan nin pagkakataon na madangog. Arog kan porma ni Uryol, igwa man sinda nin kakayanan na maggibo nin pagbabago sa kinaban. Padagos sindang nakikipaglaban tanganing maabot an saindang mga piglalaoman asin mayo saindang makakapundo dawa pa sinda susugon, siudon, o dakupon. Ipapahiling ninda an saindang urag tanganing halion ang dibisyon sa tahaw kan mga babaye asin mga lalaki na madara nin katuninongan sa daga na saindang tinitindogan.