Byakuren Yanagiwara

Byakuren Yanagiwara ( Japanese: 柳原 白蓮 , Yanagiwara Byakuren ; Oktubre 15, 1885 – Pebrero 22, 1967) siya sarong Hapon na pararawitdawit asin sarong nobelista . Siya man pinakamidbid sa pangyayari sa Byakuren . Saro siya sa Tolong Kagayunan kan panahon nin Taishō .

Buhay

Si Akiko Yanagiwara (柳原 燁子) namundag kan Oktubre 15, taong 1885, sa Tokyo siya an ikaduwang aking babae kan estadista asin diplomatikong si Konde Yanagiwara Sakimitsu . An saiyang ina saro sa mga kasaroan kan konde, siya si Ryō, sarong aking babae kan nagadang pamilyang samurai na saro mang geisha sa Yanagibashi . An pamilyang Yanagiwara hali sa linya kan pamilyang Reizei kan angkan na Fujiwara . Si Sakimitsu iyo an matuang tugang na lalaki kan ina ni Emperador Taishō, si Yanagiwara Naruko, kaya pinsan ni Yanagiwara si Emperador Taishō.

Kan 1894, siya inampon kan sarong harayo ng paryente, si Viscount Yorimitsu Kitakōji . Siya naglaog sa Kazoku Girls' School kan taong 1898. Kan 1900, siya naagom kan pinakamatuang aking lalaki kan pamilyang Kitakōji na si Suketake, ini sa edad na 15 anyos, pagkatapos kaini nag pundo siya sa pag-eskwela huli sa saiyang pagbados. Ipinangaki niya an saiyang matuang aking lalaki na si Isamitsu, alagad kan taong 1905 siya nakipagdiborsyo, asin winalat si Isamitsu sa pamilyang Kitakōji, asin buminalik sa harong kan saiyang mga magurang.

Kan panahong idto, pinapahalagahan kan mga pamilyang Kazoku an disente, mantang an diborsyadong aking babae nagpapasupog asin dai makakalaog sa mayor na istaran kan pamilyang Yanagiwara. Kan taong 1908, nagbalyo siya sa Tōyō Eiwa Girls' School, sarong Canadian mission school sa Azabu, Tokyo, bilang sarong boarder tanganing ipadagos an saiyang pag-adal, na saiya mang tinalikdan huli sa saiyang pag-agom asin pangangaki. Duman niya nabisto si Hanako Muraoka, sarong daragita na mas hoben saiya nin walong taon, nagin niyang "confidante" asin inapod niyang "Hana-chan". Kan panahon na ini, naglaog siya sa Tanka Association Takekashikai na pig-host ni Nobutsuna Sasaki .

Retrato kan kasal nina Byakuren Yanagiwara asin Denemon Itō (Marso 1911)

Kan taong 1910, nabisto niya si Yanagiwara si Denemon Itō, sarong magnate sa minahan nin karbon sa Kyushu, ini mas matua saiya nin 25 taon, asin kan suminunod na taon inagom niya ini asin nagin saiyang panduwang agom, dawa ngani nangaki siya kan saiyang matuang aking lalaki ki Denemon, si Kaori, kan taong 1910. An saindang edad, estado, asin edukasyon gabos magkakaiba, asin an saindang pag-agom nagmukna nin sensasyon sa publiko bilang sarong politikal na pag-agom sa pag-ultanan kan pamilya nin sarong konde asin sarong magnate sa minahan nin karbon. An iskandalosong kasal lakop na ipinublikar sa Tokyo Nichi Nichi Shimbun . Si Hanako nabigla sa baretang ini asin tinapos an saiyang relasyon ki Yanagiwara. Kan parehong taon, si Yanagiwara naggradwar sa Tōyō Eiwa Girls' School.

Pagkatapos niyang mag-agom giraray, inapod siyang "Reyna kan Tsukushi", alagad dai nakamati nin halaga kan buhay na ini. Nagsurat siya ki Hanako na nagpapahayag kan saiyang mga namamatian, na inako man ni Hanako, asin an duwa buminalik sa saindang pagkakatood. Siya man nagsurat nin sarong rawitdawit na tanka manungod sa saiyang kapungawan asin pagsakit, asin padagos na pigpublikar an saiyang mga rawitdawit sa magasin na Takekashikai na Kokoro no Hana . Pag poon kan panahon na ini, digdi niya man pinunang gamiton an saiyang pangaran sa pluma na Byakuren .

Kan taong 1921, si Yanagiwara nagdulag kaiba an sosyalistang si Ryūsuke Miyazaki, aki kan sarong aktibistang politikal na si Tōten Miyazaki . Inapod an pangyayaring ini bilang "Byakuren Incident". Kan panahon na idto, an pagsambay sarong krimen sa irarom kan ley kriminal, na may padusa na sagkod sa duwang taong pagkapreso . Ipinahayag ni Yanagi an saiyang surat na Dear John sa pamilyang Itō sa Osaka Asahi Shimbun, asin makalihis kan duwang aldaw, sarong pahayag nin protesta ni Denemon an ipinublikar sa <i id="mwhg">Osaka Mainichi Shimbun</i>, ini ginibong sarong sensasyonal na pangyayari. An saiyang bagong panugangan na lalaki igwa nin dakulang kantidad na utang, asin masakit an saindang pagbuhay. Kan si Ryūsuke nagkahelang huli sa tuberkulosis, sinuportaran ni Yanagiwara an saiyang bagong pamilya sa paagi nin pagsurat. Kan taon 1925, namundag man an saiyang matuang aking babae na si Fuki. Magpoon kan taong 1935 siya an nangengenot sa magasin nin rawitdawit na Kototama .

Kan 1945, si Kaori, sarong suldados na estudyante, nagadan sa sarong air strike kan militar kan Estados Unidos . Gikan sa eksperyensya niyang ini, piglansar niya an "Kokusai Hibo no Kai" (International Society of Sad Mothers) asin naglansar nin mga aktibidadis na nagbabalangibog nin katoninongan sa manlaen-laen na parte kan Japan. Durante asin pagkatapos kan Ikaduwang Gerang Pankinaban, si Yanagiwara nagin mas interesado sa aktibismo sa katoninongan asin relihiyon.

Yanagiwara sa saiyang huring mga taon

Dawa ngani nawara na an saiyang paghiling huli sa glaucoma, siya man nag erok nin matoninong na buhay sa pagsurat nin mga rawitdawit sagkod sa saiyang kagadanan. Si Yanagiwara nawaran nin buhay sa Tokyo kan Pebrero 22, 1967, sa edad na 81.

Mga gibo

An mga nagkaginiribo ni Byakuren Yanagiwara kabali na digdi an mga rawitdawit <i id="mwrg">na waka</i>, mga nobela asin mga koleksyon nin rawitdawit.

Mga koleksyon sa Waka

• Fumi-e (踏絵, 1915)
• Maboroshi no Hana (幻の華, 1919)
• Chiheisen (地平線, 1956)

Mga koleksyon nin rawitdawit

• Kichō no Kage (几帳のかげ)

Mga Nobela

• Ibara no Mi (荊棘の実)

Galeriya

• 
  Byakuren Yanagiwara Memorial in Nagasakibana, Ibusuki, Kagoshima Prefecture
• 
  The former Denemon Itō residence