Dila Ko, Pagmaan
Rawitdawit tinokda' ni Leonor Dy-Liacco, sinapî sa libro niyang An Bikolana.
DILA KO, PAGMAAN
- Naglilikay ako pagtaram kung anggot
- Minsan lang makulgan an sakuyang boot
- Tibaad man ako an igwang kasa'lan
- Nakatao ako nin kulog sa daghan
- An kulog sa hawak madaleng mahale
- An tinaram haloy ta pabalik-balik.
- Dai ko nadangog sa samuyang harong
- Pag-iwal nin duwa na sarong mag-agom
- Mayong nagraraway mayong nagrarapsak
- Alagad sa iba ako nakaturak.
- An makangingisi an taram na laggod
- Ta orog nang gayo sa pag-aarapod
- An harong biray na o sarong langag mo
- An ulunan bangil, an koron kamuko'
- An inom tilab na, an kakan siba pa
- Kun bakong hablo man, nagin gutok baga.
- May nag-oorolay bagay na mahalay
- Arin an maraot ta mayo man maray
- An pakikiaram sa ibang may buhay
- Bako daw sala yan pakikitumbalay.
- Siisay man ako na maghulit digdi
- Ta ako saro lang na nakikiagi
- An sako lang baga iyo an pagmaan
- Sarong togod-togod sa sarong pagtaram.