Distrito nin Miyagi, Miyagi

An mga linderos kan Kondado nin Miyagi, Prepektura nin Miyagi (1. Banwaan nin Matsushima, 2. Banwaan nin Shichigahama, 3. Banwaan nin Rifu. Maliwanag na pula: Siyudad nin Sendai kan panahon kan pagmukna kaini. Maliwanag na asul: Mga lugar na kan huri pinagsararo gikan sa ibang mga kondado.）

An distrito nin Miyagi (宮城郡, Miyagi-gun) sarong distrito na nakamugtak sa dating Probinsya nin Mutsu asin sa ngunyan na Prepekturang Miyagi, Hapon. An pangaran kan prepektura gikan sa distrito na ini.

Kabali sa distrito na ini an mga minasunod: an mga banwaan nin Matsushima, Rifu asin Shichigahama.

An orihinal na teritoryo yaon sa subangan-sulnopan an laba poon sa mga bukid nin Ōu sagkod sa Kadagatan Pasipiko, kabali an presenteng mga syudad na Sendai, Shiogama, asin Tagajō. Poon kan 2003, an distrito igwa nin pigtatantyang populasyon na 69,567 asin densidad na 620.80 katawo kada km². An kabilugan na dagâ maabot sa 112.06 km².

Uusipon

An lugar kan Minami-Koizumi sarong lugar nin baryo o banwaan poon pa kan ikalimang siglo A.D. An Distrito nin Miyagi enot na naglataw sa mga dokumentong makasaysayan na nangyari kan 766, sa Shoku Nihongi. An mga arkeologo naghohona na an Distrito nin Miyagi naestablisar kan ikawalong siglo, base sa presensya nin mga natatadang sistema nin kwadradong natad sa pag-ultanan kan Salog Hirose asin Salog Nanakita. An kapitolyo kan probinsya nin Mutsu pigbalyo sa Taga (modernong Tagajō) gikan sa lugar kan Koriyam kan Distrito nin Natori kan taon 724. An residensial na lugar kaini lampas pa sa lanob kan Taga. Kan 785, an Distrito nin Taga asin Distrito nin Shinakami pinagsuhay sa Miyagi, alagad kan huri sinakop.

An Taga padagos na nagin kapitolyo sa panahon nin Kamakura, alagad an sentro kan siyudad nagbalyo sa sulnopan na Iwakiri. Kan 1190 si Isawa Iekage ninombrahan bilang Gobernador na Nag-aakto sa Kawaran kan Probinsya nin Mutsu, na inasignaran na ibalik an areglo pagkatapos kan Pag-aalsa kan Ōkawa Kanetō. An saiyang mga kapagarakian nagmukna nin sarong fiefdom sa palibot kan Taga asin binago an saindang pangaran sa Rusu, na an boot sabihon, sa literal, naggigibo sa kawaran.

Kadtong panahon nin nanboku-chō kan ika-14 siglo, an Taga iyo an obheto kan mga kampanya militar sa pag-ultanan kan Habagatan asin Amihanan na Korte. An pamilyang Rusu nag-ookupar kan pinakaamihanan na parte kan distrito, kun saen yaon an Taga. An kapaladan kan pamilyang Rusu madaling nabago kan mga ralaban sa pag-ultanan kan mga gobernador kan Mutsu (Ōshū). An mga Mutsu mga makusog na heneral na isinugo hale sa gobyerno sentral, o shogunato. Dugang pa sa mga Rusu, an nagkapirang mga angkan nin samurai midbid sa habagatan asin sulnopan na parte kan distrito, kabali an mga Ōkōchi, mga matibay na parapakilaban para sa Korte kan Habagatan; an Kokubun, an kagurangnan sa palibot kan probinsyal na templo (Kukubun-ji) kan Mutsu; an angkan nin Hachiman, mga gikan kan sarong nakaaging bise-gobernador kan Mutsu.

Sarong halawig na gera an nagraot kan pagkasararo kan Mutsu asin kan pagpunsyon kan kapitolyo kaini. Pakahale kan gobernador Ōsaki, an gobyerno kan distrito nababanga kan Rusu asin Kokubun, na nakipaglaban sa lambang saro. Sa kahurihurihi an impluwensya kan angkan nin Date nakaabot sa Miyagi asin an angkan ipinadara sa mga aki kaini bilang mga panugangan asin mga kasalihid kan mga payo kan mga pamilya. Dangan sinda Rusu Masakage asin Kokubun Morishige nagin mga komandante ni Date Masamune, nakipaglaban nin kadakol na laban para sa dominasyon kan Date sa rehiyon nin Tohoku. An duwa igwa sana nin nominal na independensya ki Date, tangani sanang paogmahon an mga nagdadanay sa mga pamilya.

Kan si Masamune nagsuko sa bagong shogun na si Toyotomi Hideyoshi kan 1590, si Rusu binayaan asin si Kokubun pormal na pighihiling na sarong sakop ni Date. An Distrito nin Miyagi nagin parte kan teritoryo kan angkan nin Date. Kan 1600, pagkatapos sana kan Laban sa Sekigahara, nagdesisyon si Masamune na magtogdok asin magbalyo sa Kastilyo nin Sendai sa Distrito nin Miyagi. Pagkatapos kaiyan an distrito pigpauswag bilang suburb kan bagong banwaan nin Sendai. An banwaan nin Sendai pinamamayuhan bilang sarong ibang lugar sa iba pa poon kaidto.

An gobyerno kan Meiji binaranga an Probinsya nin Mutsu sa tolong parte kan 1869. An Distrito nin Miyagi nagin parte kan Probinsya nin Rikuzen. An populasyon kan 1889 (bakong kabali an Sendai) 60,518.

Kan Marso 11, 2011, tinamaan nin linog asin dolnop an rona na ini nin Hapon.

Mga banwaan asin mga dolohan

• Matsushima
• Rifu
• Shichigahama

Bibliograpiya

• Committee for Editing the Miyagi Prefecture History (under Miyagi Prefecture), Miyagi Prefecture History, vol.2, Gyōsei, reprinted in 1987. (original version was published in 1956). 宮城県史編纂委員会『宮城県史』（2、近世史）、ぎょうせい。