Doraemon
Doraemon (ドラえもん) sarung serye nin manga na isinurat asin ikinurit ni Fujiko F. Fujio. Enot na na-serialized kan 1969, an mga kapitulo nakolekta sa 45 tankobon volumes na ipinublikar ni Shogakukan poon 1974 sagkod 1996. An istorya nag-iikot sa sarung mayong talingang robot na kuting na an pangaran Doraemon, na nagbalik hale sa ika-22 na siglo tanganing tabangan an lalaking nagngangaran na Nobita Nobi.
An manga nagbunga nin sarung prangkisa sa media . Ini pig-adaptar sa tulong manlaen-laen na anime TV na mga serye kan 1973, 1979, asin 2005 . Dagdag pa, an Shin-Ei Animation nakaprodusir nin labing kwarentang animated films, kabali an duwang 3D computer-animated films, na gabos pigdidistribwir kan Toho. Manlaen-laen na klase nin mga merchandise asin media an nadebelop, kabali an mga album nin soundtrack, mga video game, asin mga musikal. An manga serye lisensyado para sa paggamit nin Ingles na lenggwahe na tigpaluwas sa North America, sa paagi kan Amazon Kindle, sa pakikipagtabangan ni Fujiko F. Fujio Pro sa Voyager Japan asin AltJapan Co., Ltd. An serye nin anime lisensyado kan Disney para sa sarung pagluwas sa tataramon na Ingles sa North America kan 2014, asin LUK International sa Europa, sa Middle East asin Africa.
An Doraemon inako nin marhay kan mga kritiko asin nagin sikat sa kadakol na mga nasyon sa Asya. Nagkamit ini nin kadakol na mga premyo, kabali an Japan Cartoonists Association Award kan 1973 asin 1994, an Shogakukan Manga Award para sa manga nin mga kaakian kan 1982, asin an Tezuka Osamu Cultural Prize kan 1997. Kan 2024, nakapabakal na ini nin labing 300 milyones na kopya sa bilog na kinaban, na nagin saru sa best-selling manga series kan gabos na panahon. An karakter ni Doraemon pigkonsiderar na sarung cultural icon kan mga Hapones, asin ninombrahan bilang pinakaenot na "anime ambassador" kan 2008 kan Foreign Ministry kan nasyon.
Sinopsis
[baguhon | baguhon an source]Si Nobita Nobi dyes anyos na Hapones na estudyante, maboot asin dai naghahambog, alagad hugakon, malas, maluya, pirming nakakakua nin hababa na mga grado asin mayong aram sa sport. Sarung aldaw, sarong asul na robot na kuting hale sa ika-22 siglo na an pangaran Doraemon an ipinadara pabalik sa nakaagi kan magigin makuapo sa tuhod ni Nobita, si Sewashi Nobi, tanganing atamanon si Nobita tanganing an saiyang mga gikan magkaigwa nin mas marahay na buhay. Si Doraemon igwa nin apat na dimensyon na bulsa kun sain nya tigsasaray an saiyang mga kagamitan, imbensyon, asin mga gadyet gikan sa future tanganing tabangan si Nobita ano man asin sain man sya abuton nin problema. Dawa ngani si Doraemon sarung robot na kuting, takot sya sa mga kino dahil sa sarung pangyayari kun sain an sarung robotic na kino pinangos an saiyang talinga. Ini an dahilan kun tano nawara an orihal na kulay kiyaw ni Doraemon asin nagin asul, huli sa kamunduan.
Si Nobita igwa nin primera na mga katood: si Takeshi Goda (na may bansag na Gian), si Suneo Honekawa (an sidekick ni Gian), asin si Shizuka Minamoto, an pinakamarahay na katood asin namomotan ni Nobita. Si Gian sarung makusog, nangengenot asin dominanteng aking lalaki, alagad maimbod man sa saiyang mga amigo. Si Suneo sarung mayaman asin spoiled na aking lalaki na ginagamit an saiyang pakikipag-amigo ki Gian tanganing makua an respeto kan ibang mga kaeskwela. Si Shizuka mahinhin asin maboot na daragita na parating nakikikawat ki Nobita. Si Nobita may crush ki Shizuka; sya an saiyang magigin agom (an magigin agom kuta ni Nobita an bunsong tugang ni Gian). Dawa ngani si Gian asin Suneo mga amigo ni Nobita, sinda man an tipikal na nagbubully asin nag-aabuso saiya. Si Nobita minabalos sa paagi nin paggamit kan mga gadyet ni Doraemon tanganing labanan sinda, alagad igwa sya nin tendensiyang madara sa paggamit kan mga gadyet (o si Gian asin Suneo, kun hinabon ninda ini), na parating nagbubunga nin dai tinutuyong mga pangit na resulta para saiya asin sa iba.
Dagdag pa ki Gian, Suneo, asin Shizuka, si Dorami asin Hidetoshi Dekisugi mga pabalik-balik na karakter man. Si Dorami an nguhod na tugang na babayi ni Doraemon, asin si Dekisugi sarung talentadong estudyante na lalaki na dayupot na katood ni Shizuka, parating nagigin dahilan kan pag-imon ni Nobita.