Eskulturang Hapon

Tamonten sa Tōdai-ji, Kahoy, panahon nin Edo

An pag-iskultura sa Hapon nagpoon sa pigura na gibo sa dalipay. Sa pag'abot kan katapusan kan halawig na panahon nin Neolithic Jōmon, an mga "flame-rimmed" na mga lalagan na gibo sa koron igwa nin mga eskultural na ekstensyon sa gilid,asin an mga pigura nin dogū na gibo sa koron na may estilong marhay na ginibo, kadaklan igwa nin mga karakteristikong "snow-goggle" na mga mata. Durante kan panahon nin Kofun kan ika-3 sagkod ika-6 na siglo C.E., an mga haniwa terracotta na pigura nin mga tawo asin hayop sa simpleng estilo itinogdok sa luwas nin importanteng mga lolobngan. An pag-abot kan Budismo kan ika-6 na siglo nagdara nin mga sopistikadong tradisyon sa eskultura, mga estilong Intsik na ipinaagi sa Korea. An ika-7 siglong Hōryū-ji asin an mga laog kaini nagdanay na mas bilog kisa sa arin man na templo nin Budismo sa Sirangan na Asya kan petsa kaini, na may mga obra kabali an sarong Shaka Trinity na 623 na gibo sa bronse, na nagpapahiling kan makasaysayan na Buddha na napapalibutan nin duwang bodhisattva asin man kan mga Guardian Kings of the Four Directions.

Sinasabi na si Jōchō bako sanang saro sa pinakadakulang iskultor na Budista sa panahon kan Heian kundi pati na sa historya kan mga estatuwang Budista sa Hapon. Pinabalik ni Jōchō an kahulugan kan porma kan hawak kan mga estatuwa ni Buddha sa paagi nin pagperpekto kan teknika ni yosegi zukuri (寄木造り) na sarong kombinasyon nin nagkapirang kahoy. An matoninong na ekspresyon asin magayon na pigura kan estatuwang Buddha na saiyang ginibo nakatapos sa sarong estilo nin Hapon nin pag-iskultura nin mga estatuwang Buddha na inaapod na Jōchō yō ('Jōchō style',定朝様) asin nagdeterminar kan estilo kan mga estatuwang Budista kan Hapon kan huring panahon. An saiyang naginibohan dramatikong nagpalangkaw kan estado sa sosyedad kan busshi (eskultor na Budista) sa Hapon.

Kan panahon nin Kamakura, an angkan na Minamoto nagmukna kan Kamakura shogunate asin an klaseng Samurai an namahala sa haros bilog na Hapon sa kaenot-enote. An mga kasalihid ni Jocho, mga eskultor kan Kei school of Buddhist statues, nagmukna nin mga realistiko asin dinamikong mga estatuwa na angay sa mga namit kan mga samurai, asin an Hapon na Budista na eskultura nakaabot sa pinakahalangkaw kaini. An mga eskultor na Unkei, Kaikei, asin Tankei nagin bantog sa paagi nin pagsalida kan mga estatuwa ni Buddha sa mga templo na nawara sa mga gera o kasulo, arog kan mga yaon sa Kofuku-ji .

Haros gabos na suminunod na dakulang eskultura sa Hapon Budista, na may nagkapirang katumbas na Shinto, asin pagkatapos na an Budismo bumagsak sa Hapon kan ika-15 siglo, an monumental na eskultura nagin kadaklan na dekorasyon sa arkitektura. Alagad an trabahong eskultural sa dekorasyon na arte napauswag sa sarong pambihirang lebel nin teknikal na kapangganahan asin pagdalisay sa saradit na bagay arog kan inro asin netsuke sa kadakol na materyales, asin metal na tosogu o mga Hapon na espada na nakabugtak. Kan ika-19 siglo igwa nin mga industriya nin pag-eksportar nin saradit na eskulturang bronse, mga pigurin na gibo sa marfil asin porselana, asin iba pang klase nin saradit na eskultura, na orog na nagduduon sa teknikal na naginibohan.