FactCheck.org
An FactCheck.org sarong websityong bako sa pagkakwarta an pag'padalagan kundi sabi kan kag'mukna kaini sarong hiron para sa pakinabang kan mga botante (sa Amerika, kadaklan) ta ipigtotolod kaini an pagkokotkot asin pagdudukay kan mga kaputikan, panloloko, panriribong sa pulitika kan Estados Unidos nin Amerika. Saro ining proyekto kan Annenberg Public Policy Center kan Annenberg School for Communication nakabase sa Unibersidad nin Pennsylvania, asin ini primeramente sustenido kan Annenberg Foundation. Sa sarong sabi, saro siyang adbukasiya para sa mga kunsomidor kan Amerika.[1][2][3]
An FactCheck.org nagawadan na nin apat na Webby Awards sa kategorya nin Pulitika, kan 2008, 2010, 2011 asin 2012.[4]
Kadaklan kan napalaman igdi mga pagpahimutik, asin pagsudya' kan mga kaputikan, mga lisyang pahayag, asin mga paltos na pagpapaliwanag kan mga pulitiko na sinda kuno nagsasabi lamang nin katotohanan sa pagtaong kalinawan. An FactCheck.org pigpuntariya man an mga grupong partisan na nagngunguso nin mga kun ano-anong bagay alagad sa pagtolod mansana nin mga hilom na agenda.
Mga ibang serbisyo kaini:
1. An mga nalaog sa sityo pwede maghapot sa paglinaw kan mga soboot huringhuding naglalakop on-line. 2. Igwa man ini kan inaapod na Viral Spiral: tiniripon igdi mga popular na mga on-line na mito sinurudya na kan sityo. Igdi may sangkap na paliwanag asin an parabasa gigunuguboyan sa mga ibang toltolan kun saen mas nataong dugang na paliwanag kan mga isyu. 3. Party Lines: mga inu-ulit'ulit pigsasarabi kan mga myembro nin mga partido pulitika sa pagtaong karibongan. 4. Mailbag: pahina para sa mga parabasa kun saen pwede magpadara nin umaw o tuyaw nmanongod kan mga nasambit sa sityo, sa dagdag na paguru-urulay ngane gabos na puntos makaabot sa pagreparo.[5]
Agi-agi kan websityo[baguhon | baguhon an source]
An FactCheck.org pigtogdas kan Desyemembre 2003 ni Brooks Jackson, an dating reporter kan Associated Press, Wall Street Journal, CNN na halawig nang lakaw-lakaw an Washington asin an pulitika sa nasyunal na lebel sa saiyang pagbabareta poon pa kan 1970. Siya nabantog durante kan karampanyahan kan 1992 ta bilang toka niya sa CNN, saiyang pigsususog an mga garastohan kan mga kandidato sa advertising asin kun pano an pagdidisponer sa paragastos sa pangampanya. Kan 2003, dinulok siya asin inalok ni Kathleen Hall Jamieson kan Annenberg Public Policy Center sa pagmukna kan FactCheck.org, asin ta an siring nangyari kan Desyembre kan taon na iyan.[6]
Kan 2007, an "Unspun" napublikar. An libro pigtabangan suraton ni Brooks Jackson, an Direktor Emeritus kan FactCheck.org asin ni Kathleen Hall Jamieson, an Direktor kan Annenberg Public Policy Center. Piggigiyahan an mga parabasa sa pagsaligsig kan mga kaputikan, mga patubod na usong ginigibo kan media asin kan mga pulitiko.[7]
Kan Enero 2013, si Jackson nagretiro bilang direktor kan FactCheck.org. siya nasalidahan ni Eugene Kelly dating reporter asin editor sa The Record (kan Hackensack, New Jersey) asin kan The Philadelphia Inquirer saka USA Today. An FactCheck.org nag'eempleo nin apat na peryodista na sinda Kiely, D’Angelo Gore, Robert Farley asin Lori Robertson.[8]
Mga panluwas na takod[baguhon | baguhon an source]
- [1] Ask FactCheck. Kinua 27-5-16.
Hilnga man[baguhon | baguhon an source]
- TruthOrFiction.com
- The StraightDope
- The Skeptic's Dictionary
- MythBusters
- List of common misconceptions
Toltolan[baguhon | baguhon an source]
- ↑ http://www.sfgate.com/news/article/Web-sites-help-gauge-the-veracity-of-claims-2640099.php Kinua 27-5-16
- ↑ http://www.factcheck.org/spindetectors/about/ Kinua 27-5-16
- ↑ http://webbyawards.com/ Kinua 27-5-16
- ↑ http://webbyawards.com/ Kinua 27-5-16
- ↑ http://www.factcheck.org/party-lines/
- ↑ http://www.factcheck.org/about/our-mission/ Kinua 27-5-16
- ↑ http://www.goodreads.com/book/show/462140.unSpun Kinua 27-5-16
- ↑ http://www.factcheck.org/about/our-mission/ Kinua 27-5-16
