Frigyes Schulek

Gikan sa Bikol Sentral na Wikipedia, an talingkas na ensiklopedya
Frigyes Schulek
Frigyes Schulek (ca. 1896)
KamundaganFriedrich Schuleck
(1841-11-19)19 Nobyembre 1841
Pest, Kahadean nin Hunggarya, Austrian Empire
Kagadanan(1919-09-05)5 Septyembre 1919
Balatonlelle, Republika Hunggaro
NasyunalidadHunggaro
Alma materTechnical University of Budapest (1857–1860)
Academy of Fine Arts Vienna (1861–1867)
AgomJohanna Schulek
Rebulto ni Frigyes Schulek, eskultura ni Alajos Stróbl

Si Frigyes Schulek (19 Nobyembre 1841 – 5 Septyembre 1919) sarong Hunggarong arkitekto[1] asin propesor sa József Technical University saka myembro sa Hungarian Academy of Sciences (Magyar Tudományos Akadémia).

Buhay[baguhon | baguhon an source]

Edukasyon[baguhon | baguhon an source]

Si Frigyes Schulek responsable sa pagsulit asin pagpakarhay kan Simbahan Jáki

Si Schulek namundag sa Pest asin nagpoon pagklase sa Buda. An saiyang ina iyo si Auguszta Zsigmondy. An saiyang ama, si Ágost Schulek may pwesto sa Departamento nin Pinansya sa Lajos Kossuth. An pamilya Schulek nag'iba sa gobyerno Kossuth kan ini nagdulag pasiring Debrecen durante kan Rebolusyon Hunggaro nin 1848, dangan pagbalik sa kabesera. Kan an pakitusay sa independensya nasupil, si Ágost Schulek nadeklarang persona non grata, asin an pamilya buminalik sa Debrecen.

Pakagradwar kan 1857, si Frigyes Schulek nag-enrol sa Buda Polytechnic (József Technical University), kun saen siya nagresibi nin diploma kan 1861. Dangan kaidto siya nag'atender sa Academy of Fine Arts (Akademie der bildenden Künste) sa Vienna na saiyang natapos kan 1867.[2]

Siya nagin myembro kan "Wiener Bauhütte" kun saen siya nag'adal sa irarom nin pagmamato ni Friedrich von Schmidt, na ini nagimpluwensyang gayo nin hararom saiya sa arkitekturang Pagtangaan Anoy.

Kan 1866 madalian siyang nagtrabaho sa pagpakarhay kan Katedral Regensburg, dangan nagbyahe siya sa pagbisita sa Pransya asin Italya.

Poon 1871 siya nagtukdo nin pagdrowing arkitektural sa Budapest Art School, kun saen, komo kasaro sa pagtukdo, si Imre Steindl, siya nagtabang sa pagdesenyo kan munisipyo nin Pest. Kan 1872 siya nanombrahan arkitekto kan bagong mukna na Provisional Monuments Commission (Műemlékek Országos Bizottság), na ngapit pigngaranan nang National Monuments Commission, an enot na independyenteng Hunggarong organisasyon. Kan siya yaon igdi, siya nakitabang sa paghirahay asin pagsulit kan mga lumang kastilyo asin mga simbahan.

Mga Apoon ni Frigyes Schulek: hu: Schulek család (felvidéki)

Simbahan Matthias (Mátyás Templom)[baguhon | baguhon an source]

Atop na kinaranklan na desenyo kan ki Schulek na pigsulit na Simbahan Matthias

Sa pag'ultan 1874 asin 1896 sinulit tinugdok ni Schulek an Simbahan ni Nuestra Senora sa Buda Castle, na iyo ini daa an konsideradong mayor na trabaho niya. Nag'eedad pang poon 1247, an edipisyo piggamit sa pagkorona ki Carlos I kan 1309 asin ngonyan iyo na an Simbahan Matthias, na ini ipigngaran ki Hadeng Matthias, na siya mansana an nagdugang nin mga kapilya sa duwang gilid asin nin oratoryo kan 1470.

Sa saiyang pagplano sa paghirahay asin pagsulit kan Pranses na Gotikong simbahan, siya pinag'adalan na husto an palibot kan edipisyo ngani maaraman an mga orihinal na mga elemento kaini sa lawig nin panahon na ini narugba asin hinihirahay na natambara sa iba-ibang impluwensya, na minsan nagin moske, minsan nagin naman simbahan nin kristiyano. Mala ta ini nasulo kan 1526, binuksan kan 1541 bilang moske. Kan ini naman nasulo kan peryodo nin Ottoman, ini kan 1586 natugdok naman bilang simbahan kapot kan Fransiskano, dangan kan mga Heswita. Si Schlek imbes na isulit an simbahan representado an sarong peryodo siring sa ginigibo sa modernong praktis, siya haros binago an simbahan na dai na pigpreserbar an anoman na interbensyon historiko, asin haros lambang gapo igdi sinanglean o pigsinsil sa bagong porma. Sa bandang solnopan na surungan asin an tipanas kaini na mayo man ebidensya siya kun pano si orihinal, siya nagdetalye nin mga bagong desenyo na kun uugidon, an simbahan na ini haros nagin saiyang bagong minuka.

Calvinist Reformed Church sa Ákos (ngonyan, Acâș sa Romania)

Pagtutukdo[baguhon | baguhon an source]

Kan 1903, pakagadan ni Imre Steindl, si Schulek nanombrahan propesor kan inaapod na medieval architecture sa Technical University of Budapest, pwesto na saiyang kapot hanggan 1913. Siya nagin kasurat-surat na myembro kan Hungarian Academy of Sciences kan 1895 asin nagin honoraryong myembro kan 1917.

Mga desenyo arkitektural[baguhon | baguhon an source]

An iba pa niyang pagsusulit kabali an munisipyo kan Lőcse (ngonyan, Levoča, Slovakia) asin mga simbahan sa Ákos (ngonyan Acâș sa Romania), Karcsa asin Pozsony (ngonyan Bratislava, Slovakia).

Paseo sa itaas kan Fisherman's Bastion

Sa mga edipisyo na saiya mismo pigdesenyo, kadaklan sa estilong Neo-Romanesque. Kabarali igdi an Calvinist Reformed Church (1880–83) sa Szeged asin an Elisabeth Lookout (1908–10) sa János-hegy, Budapest. Sa pag'ultan 1895 asin 1903 si Schulek nagdesenyo nin mga corridor, terasa asin mga torre sa pagkonekta kan mga parteng eksistido pa duman sa bulod na moog sa likod kan Simbahan Matthias. Bisto bilang Fisherman's Bastion (Halászbástya), an ta'nawan nagin nang landmark sa siyudad.

An saiyang 1909 na desenyo para sa Votive Church nin Szeged (Fogadalmi templom), na may-duwang tipanas na estruktura na may pulang ladrillo na mga surungan asin puting gapong hanggilid, na ini nahira ni Ernő Foerk, alagad an konstruksyon natapos kan 1930.

Buhay personal[baguhon | baguhon an source]

Saiyang naagom si Johanna Riecke. Sinda nagkaigwang limang aki - apat babae, saro lalaki:[3]

  • János (26 Desyembre, 1872 - 7 Hulyo, 1948)
  • Margit (31 Marso, 1874 - 29 Agosto, 1945)
  • Márta (1876 - 1964)
  • Klára Paula Erika (30 Hulyo, 1882 - 13 Enero, 1975)
  • Irén (20 Marso, 1888 - 9 Mayo, 1968)

Toltolan[baguhon | baguhon an source]

Bibliograpiya[baguhon | baguhon an source]