Henry Lim Bon Liong

Henry Lim Bon Liong
Liong kan 2023
Native name	林育慶
Kamundagan	Henry Lim Bon Liong (林育慶) 1951 o 1952
Kagadanan	Agosto 2, 2024 (edad 72)
Alma mater	University of the Philippines Diliman

Si Henry Lim Bon Liong (林育慶; 1951 o 1952 – Agosto 2, 2024) sarong Filipinong negosyante na chief executive officer (CEO) kan Sterling Paper Group of Companies, S.P. Properties, Inc., SL Agritech Corporation asin nagin myembro kan governing council kan Philippine Council for Agriculture, Forestry, and Natural Resources Research and Development (PCARRD) poon 2005 abot 2007.

Kaamayi nin buhay

Namundag ki Maria Co Chiao Ti Lim asin Lim Seh Leng, si Henry nagdakula sa Tsino Filipinong pamilya sa Filipinas. Kan siya akion pa, sinda nag'eestar sa sarong-kwarto sanang apartment na mayo ngani nin kasilyasan. An mga magurang niya kadaklan pigtataram Hokkien. Sa pag'igot kan saiyang ama', sinda nakakua nin Filipino citizenship. Si Henry nag'adal sa St. Jude Catholic School. An saiyang ama tinugdas an Sterling Bookbinding na an mayor na produkto iyo an Sterling Family Photo Album. An bookbinding na negosyong ini nagdakula asin nagin nang Sterling Paper Products Enterprises kan 1961, na an mga gamit eskwelahan asin pang-opisina kairipohan saka photo albums an darang mga produkto. Kan 1976, si Lim Seh Leng nagadan asin si Henry bilang iyo an matua, nagkapot na sa pagmaneho kan negosyo.

Komo negosyante

Huli kan pagpadalagan ni Henry, an negosyo napatalubo pang husto. Dakul pang mga produkto an dinara asin dakul pang mga outlet an tinugdas.

Si Lim naglaog man sa negosyong real estate, na pigmukna para igdi an S.P. Properties, Inc. asin an sarong huri pang palakaya niya iyo an produksyon kan hybrid rice, paagi kan pagtugdas kan SL Agritech Corporation kan Septyembre 2006. An SL Agritech Corporation tuyong maresolberan an pagkukulang kan bagas sa Filipinas. Ini na ngonyan an mayor na paradistribuir nin hybrid seed sa Filipinas asin ngonyan nagdakula nang gayo asin nag'eeksport na nin bagas sa magkapirang mga nasyon arog kan Malaysia, Singapore, Indonesia, asin Madagascar.

Siya an presidente kan Federation of Filipino Chinese Chambers of Commerce and Industry Inc. (FFCCCII) poon 2019 abot 2021.

Buhay personal asin pagkagadan

Si Lim naagom si Rita Ong asin igwang limang aki. Siya nagadan kan Agosto 2, 2024, sa edad na 72.

Panluwas na takod

• Igwang relatibong medya para sa Henry Lim Bon Liong duman sa Wikimedia Commons

Toltolan

• "Governing Council has 3 new members." (accessed on December 11, 2007).
• "Indon state firm reports good harvest with hybrid rice seeds." Archived 2007-10-28 at the Wayback Machine. (accessed on December 11, 2007).
• "Hybrid rice firm targets fast food needs." (accessed on December 11, 2007).
• Almazan, Alec. A 'Sterling' Example of Entrepreneurship, Henry Lim Bon Liong. NEGOSYO. Quezon City: ABS-CBN Publishing, 2006.