Kafū Nagai
| Kafū Nagai | |
|---|---|
 Kafū Nagai in 1947 | |
| Minundagan | Sōkichi Nagai 3 Desyembre 1879 Tokyo, Japan |
| Kagadanan | Error: Need valid death date (first date): year, month, day Ichikawa, Japan |
| Kasibotan | Writer, translator, editor |
| Edukasyon | Junior High School |
| Hirong pagsurat | Naturalism, Aestheticism |
Si Kafū Nagai (永井 荷風, Nagai Kafū[a]; Disyembre 3, 1879 – Abril 30, 1959) sarong parasurat, editor, asin paratradusir na Hapones.[1] An saiyang mga obra arog kan Geisha in Rivalry asin A Strange Tale from East of the River bistado sa paglaladawan kan buhay kan demimonde sa Tokyo kan temprano 20th siglo.
Biyograpiya
[baguhon | baguhon an source]
Namundag si Nagai bilang Sōkichi Nagai (永井 壮吉) sa Koishikawa, Bunkyō, Tokyo, bilang pang-enot na aki kan opisyal kan gobyerno na si Kyūichirō Nagai asin kan saiyang agom na si Tsune, an aking babae kan iskolar na si Washizu Kidō. An saiyang ama sarong elitang opisyal kan gobyerno sa Home Ministry, na nag-adal bilang estudyanteng intercambio sa Estados Unidos asin nagsurat man asin nagpublikar nin mga tulang Tsino. Si Kyūichirō nag-abandonar kan saiyang trabaho sa Ministry tanganing magtrabaho para sa kompanya nin pagpapadara nin barko na Nippon Yusen. Kan namundag an ikaduwang aki kan 1883, si Nagai isinugo sa pag-istar sa saiyang lola sa lado kan ina sagkod 1886. Durante kan saiyang pagka-aki, nagbisita siya sa sarong eskwelahan nin lenggwaheng Tsino, asin, sa impluwensya kan saiyang ina, tinokdoan siya nin pagkanta asin pagtugtog nin mga instrumento sa musika, na nagpapahiling nin pagkagustong marhay sa utazawa, sarong estilo nin pagkanta kan huring panahon nin Edo na may kaibang shamisen. Poon kan 1890, tinokdoan man siya nin lenggwaheng Ingles.
Huling sa helang, si Nagai nag-istar nin pirang bulan kan 1895 sa sarong ospital sa Odawara. Poon kan 1897, pinonan niya an saiyang regular na pagbisita sa distrito nin mga babaeng nagtitinda nin sekso na Yoshiwara, kaiba an saiyang katood asin parasurat na si Seiichi Inoue (1878–1923). Kan iyo man na taon, naggradwar siya sa Junior High School. Kaiba an saiyang ina asin mga mas nguhod na tugang, nagbisita siya sa Shanghai, kun saen an saiyang ama nagtatrabaho para sa Nippon Yusen. Nagbalik siya sa Japan kan Tig-otoño asin nagpalista sa Tokyo School of Foreign Languages.
Kan 1898, inpublikar niya an saiyang enot na halipot na istorya na Sudare no tsuki. Nagin siyang disipulo kan nobelista na si Hirotsu Ryūrō asin parasurat na si Fukuchi Ōchi, nag-adal nin rakugo asin pagsurat nin dula sa kabuki, nagluwas sa entablado sa mga dulang yose, asin nag-abandonar sa Unibersidad. An saiyang mga sinurat naimpluwensyahan kan Pranses na Naturalismo asin ni Émile Zola, na an obra niya saiyang tinradusir man. Sa pag-oltanan nin 1903 asin 1908, huli sa impluwensya kan saiyang ama, si Nagai nagbisita sa Estados Unidos asin kan huri sa Pransia, sarong panahon na saiyang isinurat sa saiyang American Stories [jp] (Amerika monogatari) asin Furansu monogatari (lit. "Mga Istoriang Pranses"). An publikasyon kan American Stories kan 1908 nag-ako nin dakulang pag-oyon sa mga kritiko.
Kan 1910, si Nagai nagpoon na magtukdo bilang propesor nin literatura sa Keio University asin nagin editor kan magasin sa literatura na Mita Bungaku. Sa panahon na ini, binalikwas na niya an Naturalismo asin nagbalyo pasiring sa Aestheticism. An pagbalyo hale sa panahon nin Meiji pasiring sa panahon nin Taishō sarong punto man nin pagbabago sa buhay ni Nagai: an pagkagadan kan saiyang ama, an diborsyo sa saiyang enot asin ikaduwang agom (an ikaduwang pag-agom—sa sarong geisha—nagresulta sa pagkawalay kan saiyang ina), asin an pag-abandonar kan saiyang pwesto sa Keio University asin Mita Bungaku. Bilang paradalaw kan demimonde nin Tokyo, si Nagai nagsurat nin dakul na istorya manungod sa mga nag-eerok diyan, mga geisha, mga cortesana asin an saindang mga kostumer, an pinaka-bistado iyo an Geisha in Rivalry (1916–17).
Pagkatapos nin sampulong taon na pagpahingalo, inpublikar niya an mga nobela na During the Rains (1931), Flowers in the Shade (1934) asin A Strange Tale from East of the River (1937), na an huring nabanggit paulit-ulit na sinambit bilang saiyang mayor na obra. An saiyang pagkaanggot sa rehimeng militarista, na an saiyang mga obra ibinilang na subersibo para sa giyera, nagresulta sa pagpondo kan pagpublikar kan saiyang mga sinurat sagkod sa katapusan kan Ikaduwang Gerang Pankinaban. An pagpublikar kan saiyang mga diaryo (1917–1959) ibinilang bilang mayor na pangyayari sa literatura kan saiyang karera pagkatapos kan giyera.
Kan 1952, si Nagai nag-ako kan Order of Culture, asin kan 1954, siya pinili bilang miembro kan Japan Art Academy. Nagadan siya kan Abril 30, 1959.
Piling likha
[baguhon | baguhon an source]- 1908: American Stories (あめりか物語, Amerika monogatari)
- 1911: The River Sumida (すみだ川, Sumidagawa)
- 1916–1917: Geisha in Rivalry (腕くらべ, Ude kurabe)
- 1917–1959: Danchōtei nichijō (断腸亭日乗)
- 1931: During the Rains (つゆのあとさき, Tsuyu no atosaki)
- 1934: Flowers in the Shade (ひかげの花, Hikage no hana)
- 1937: A Strange Tale from East of the River (濹東綺譚, Bokutō kidan)