Jump to content

Kastilyo nin Hiroshima

Gikan sa Bikol Sentral na Wikipedia, an talingkas na ensiklopedya
Kastilyong Hiroshima
広島城
Hiroshima, Hapon
Reconstructed main keep. Map
Impormasyon sa lugar
TipoKastilyong Azuchi-Momoyama
Kinokontrol kan/ni Mōri clan (1592–1600),
Fukushima Masanori (1600–1619),
Asano clan (1619–1869),
 Hapon (1869–1945),
 Japan (1958-present)
KundisyonPigtindog giraray, nagserbing history museum
Websityohttps://www.rijo-castle.jp/
Kinamumugtakan
Map
Tagboan34°24′10″N 132°27′33″E / 34.40278°N 132.45917°E / 34.40278; 132.45917Tagboan: 34°24′10″N 132°27′33″E / 34.40278°N 132.45917°E / 34.40278; 132.45917
Langkaw12.4 metros (base na gapo), 26.6 metros (pinukdok giraray keep, limang eskalon)
Uusipon kan Lugar
Pigtugdok1592–1599 (orihinal)
1958 (pagpapakaray girayday)
Pigtugdok kan/ni Mōri Terumoto
Sa ginamit1592–1945
Materyalesgapo, kahoy, lanob na plaster (orihinal); kongkreto, asero, kahoy, gapo, plaster (rekonstruksyon)
pigragbakan ika -6 August 1945 huli ta resulta kan pambobomba atomiko.
Ang tenshu bago an pagkarumpag kaini kan 1945.

An Kastilyo nin Hiroshima (広島城, Hiroshima-jō), nugad inaapod man na Kastilyong Karpa (鯉城, Rijō), sarong kastilyo sa Hiroshima, Hapon na iyo an istaran kan daimyō (feudal lord) kan Hiroshima Domain. An kastilyo orihinal na itinogdok kan mga taon 1590, alagad kadaklan nadestroso kan pagbobomba nin atomiko kan Agosto 6, 1945. An mayor na kuta itinogdok liwat kan 1958, sarong replika kan orihinal na ngonyan nagseserbing museo kan kasaysayan kan Hiroshima bago an Ikaduwang Gubat Pankinaban asin iba pang mga kastilyong edipisyo an itinogdok liwat poon kadto.

Si Mōri Terumoto, saro sa konseho kan Limang Elder ni Toyotomi Hideyoshi an nagtogdok kan kastilyo sa Hiroshima sa pag'oltan kan 1589 asin 1599.[1] Namumugtak ini sa delta kan salog Otagawa. Mayo pang siyudad o banwaan nin Hiroshima kan panahon na idto, asin an lugar inapod na Gokamura, na an boot sabihon "limang baryo". Poon kan 1591, Mōri Terumoto nagbalyo hale sa Kastilyong Yoshida-Kōriyama asin namayo sa siyam na probinsya gikan sa kastilyong ini, kabali an kadaklan kan mga ngonyan iyo an Shimane, Yamaguchi, Tottori, Okayama asin Prepektura nin Hiroshima

Kan magpoon an pagtogdok kan kastilyo, an Gokamura nginaranan liwat na Hiroshima, huli ta mas kahanga-hangang pangaran an hinagad. An "Hiro" kinua ki Ōe no Hiromoto, sarong apoon kan pamilyang Mōri, asin an "Shima" kinua ki Fukushima Motonaga, na nagtabang ki Mōri Terumoto na pilion an lugar kan kastilyo.[nangangaipo nin toltolan] Pirang mga akawnt [nangangaipo nin toltolan] an nagsasabi na an ginikanan kan "Hiroshima", an boot sabihon "mahiwas na puro", gikan sa pag-eksister nin nagkapirang darakulang isla sa delta kan Otagawa, harani sa lugar kan kastilyo.

Kasunod kan labanan sa Sekigahara kan 1600, si Mōri napiritan na magluwas sa kastilyo, na nag-atras pasiring sa Hagi sa Prepekturang Yamaguchi ngunyan. Si Fukushima Masanori iyo an nagin kagurangnan kan mga probinsya nin Aki asin Bingo (na minabilog ngunyan kan Prepekturang Hiroshima) asin kan kastilyo nin Hiroshima. Alagad, an bagong shogunatong Tokugawa nagpangalad sa anuman na pagtogdok nin kastilyo na mayong permiso hale sa Edo; ini parte kun pano pigpugulan kan shogunato an mga daimyōs sa pagkamit nin kapangyarihan asin pagbagsak kan shogunato. Kan hinirahay ni Fukushima an kastilyo pakatapos kan baha kan 1619, siya ipinadara sa Kawanakajima sa Prepekturang Nagano ngunyan. Si Asano Nagaakira dangan nagin kagurangnan kan kastilyo.

Poon 1619 sagkod sa paghale kan sistemang pyudal durante kan Pagpapakarahay nin Meiji (1869), an pamilyang Asano iyo an nagin mga kagurangnan kan mga Probinsya nin Aki asin Bingo.

Pagkatapos kan Meiji Restoration, an kastilyo nagserbing pasilidad militar, asin an Imperial Heneral Headquarters nakabase duman durante kan Inot na Gubat Sino-Hapon kan 1894–1895. An mga pundasyon kan nagkapira sa mga outbuilding kan GHQ, na pirang gatos na lakdang sana an rayo sa mayor na torre kan kastilyo, yaon pa sagkod ngonyan.

Durante kan mga huring bulan kan Ikaduwang Gubat Pankinaban, an kastilyo nagserbing hedkwarters kan 2nd General Army asin Fifth Division, na nakadestino duman tanganing pugulan an pigproyektong Pagsalakay kan mga Alyado sa kontinente kan Hapon. An tenshu (pangenot na kuta) nadestroso sa pagputok nin bomba atomika kan Agosto 6, 1945, kaiba an mga edipisyong nakadukot kaini. Sa laog nin dakul na taon, pigtutubodan na an bilog na estruktura kan tenshu pinalid kan pagsabog na nagraot sa Hiroshima, alagad an ebidensya na bagong nadiskobre kan 2010 nagsusuherir na an pagsabog nagraot sana kan mga mas hababang harigi kan estruktura, asin an natatada kaini narumpag bilang resulta.[2]

An presenteng torre, na kadaklan gibo sa kongkreto, natapos kan 1958.[3]

An mga Daimyō kan Hiroshima

[baguhon | baguhon an source]
  1. Mōri Terumoto (1591–1600)*; 1,120,000 koku
  2. Fukushima Masanori (1600–1619); 498,223 koku
  3. Asano Nagaakira (1619–1632); 426,500 koku**
  4. Asano Mitsuakira (1632–1672)
  5. Asano Tsunaakira (1672–1673)
  6. Asano Tsunanaga (1673–1708)
  7. Asano Yoshinaga (1708–1752)
  8. Asano Munetsune (1752–1763)
  9. Asano Shigeakira (1763–1799)
  10. Asano Narikata (1799–1830)
  11. Asano Naritaka (1831–1858)
  12. Asano Yoshiteru (1858–1858)
  13. Asano Nagamichi (1858–1869)
  14. Asano Nagakoto (1869–1871)

*An mga taon na nakalista iyo idtong mga taon na an kagurangnan nag-ookupar kan kastilyo nin Hiroshima, bako an mga taon kan saiyang buhay.

**An gabos na mga kagurangnan pagkatapos ni Asano Nagaakira nagkaigwa nin parehong 426,500 na koku.

Parte kan tinindog giraray na ninomaru
Parte kan tinindog giraray na kastilyo
Mapa stone memorial

An mga edipisyo kan kastilyo orihinal na itinogdok sa kahoy, pino sa pangenot, asin an mayor na kuta igwa nin mga pakpak na nakabugkos sa sirangan asin sa timog. Natapos ini sa pag'oltan kan 1592 asin 1599, asin pigdesignar na Nasyonal na Kayamanan kan 1931. An pighirahay na kastilyo orihinal na nagtatampok kan mayor na torre (tenshu) sana, na gibo sa pangenot na pinakusog na kongkreto. An limang eskalon kaini nagtitindog 26.6 meters (87 ft) sa itaas kan pundasyon na gapo, na, sa ibong na lado, 12.4 meters (41 ft) halangkaw sa daga. Alagad, kan 1994, sarong trangkahan asin 3 yagura sa ninomaru an ginibo giraray gibo sa kahoy gamit an orihinal na mga paagi.

Sarong marahayon na halimbawa nin hirajiro o kastilyo sa patag na daga, an kastilyo nin Hiroshima kaidto igwa nin tolong konsentrikong kanal bilang dagdag sa salog nin Otagawa sa sulnupan (ngonyan inaapod na Hongawa), na nagtao nin dagdag na natural na ulang. An duwang panluwas na kanal napano kan huring parte kan ika-19 asin amay na ika-20 siglo, asin kadaklan kan mga dati nasa laog kan natad kan kastilyo ngunyan modernong urban na lugar, kabali an mga harong, eskwelahan, opisina asin tindahan. An nagkapirang segundaryong edipisyo nin kastilyo, mga torre asin mga torre kaidto nagtitindog, asin sarong Santuaryo nin Shinto na inaapod Hiroshima Gokoku Jinja an namumugtak sa laog kan pinakalaog na kanal, na ibinalyo duman pagkatapos kan 1945.

Sa laog kan mga lanob kan kastilyo, tolong kahoy an nakaligtas sa pambobomba atomiko: sarong eucalyptus asin sarong willow sa mga 740 m gikan sa hiposentro,,[4] asin sarong holly na dai malagpas sa 935 m gikan sa hiposentro.[5] An duwang ispesimen napreserbar sa ibong kan Honmaru. Namumugtak man sa laog kan Honmaru an kongkretong bunker na kun saen ginibo an enot na brodkast sa radyo paluwas sa Hiroshima kasunod kan pambobomba atomiko.

Hilingon man

[baguhon | baguhon an source]
  1. ↑ Hinago, Motoo (1986). Japanese Castles. Kodansha International Ltd. and Shibundo. p. 46. ISBN 0870117661.
  2. ↑ Akechi, Junji (July 15, 2010). "New theory offered for collapse of Hiroshima Castle tower in the bombing". Hiroshima Peace Media Center. Archived from the original on September 3, 2019. Retrieved April 29, 2023. Unknown parameter |url-status= ignored (help)
  3. ↑ Organization, Japan National Tourism. "Hiroshima Castle | Travel Japan - Japan National Tourism Organization (Official Site)". Travel Japan (in English). Retrieved 2024-06-12.
  4. ↑ "Explore Hiroshima! A people's map of areas affected by the atomic bomb – Eucalyptus and Japanese pussy willow (remains of outer compound of Hiroshima Castle)". Nhk.or.jp. Archived from the original on 2016-03-04. Retrieved 2014-04-21. Unknown parameter |url-status= ignored (help)
  5. ↑ "Explore Hiroshima! A people's map of areas affected by the atomic bomb – Kurogane holly (remains of Hiroshima Castle)". Nhk.or.jp. Archived from the original on 2012-12-30. Retrieved 2014-04-21. Unknown parameter |url-status= ignored (help)

Mga toltolan

[baguhon | baguhon an source]

Urog pang mababasa

[baguhon | baguhon an source]

Mga Panluwas na mga takod

[baguhon | baguhon an source]

Igwang relatibong medya para sa Kastilyo nin Hiroshima duman sa Wikimedia Commons

Kinua sa "https://bcl.wikipedia.org/w/index.php?title=Kastilyo_nin_Hiroshima&oldid=291814"