Manuel del Rosario

Gikan sa Bikol Sentral na Wikipedia, an talingkas na ensiklopedya
Jump to navigation Jump to search
Ladawan:Bishop Manuel del Rosario.jpg
Si Obispo Manuel del Rosario

Si Manuel Platon Del Rosario (Hulyo 1, 1915 – Marso 23, 2009) sarong pading Filipino kan Simbahan Katoliko Romano. Kan siya magadan, si Del Rosario an pinakagurang na obispong Filipino asin pinakamaedad sa obispong katolikong Filipino. [1]

Si Del Rosario namundag sa barangay Salvacion, Baao, Camarines Sur, Filipinas asin an saiyang ama iyo si Jose del Rosario asin ina, si Modesta Platon. Siya an pinakangohod sa limang magturugang. Nag'adal kan saiyang elementarya sa Baao elementary School kun saen natapos niya nin limang taon lang huli ta madunong dangan pinaadal siya kan saiyang ama sa Provincial Normal School sa banwaan kan Naga (ngonyan, siyudad nin Naga) alagad dai nakaya an magabat na mga gibong pisikal kaya nagpondo. Imbes, nagin siyang sakristan ki Padre Florencio Gonzales, kura paroko kaidto kan Baao na iyo an nag'agda kan 1928 sa saiyang ama na i'entra na sana logod siya sa seminaryo sa Naga, an Seminario Conciliar de Nueva Caceres. Kan 1932, siya nakatapos sa seminaryo asin si Obispo kan Nueva Caceres, si Msgr. Francisco Reyes pinadara siya sa Unibersidad kan Santo Tomas kun saen pinatapos siya sa kolehiyo igdi kan taon 1936 asin nakamit niya an Licentiate sa Pilosopiya. Dangan nag'entra siya sa UST Central Seminary kun saen may onrang nakamit niya an Licentiate sa Teologia Sagrado taon 1939. Sa Naga naordenan siyang padi kan 1939 sa kamot ni Obispo Pedro Santos.[2]

Sa diocese kan Nueva Caceres, siya nagkapot iba-ibang toka. Nagin assistant Diocesan Economo, coadjutor sa Katedral kan Naga, dangan Diocesan Economo asin coadjutor kan Paroko nin Iriga. Kan panahon nin gera, nagsirbe siya naman sa Diocese nin Nueva Caceres bilang Economo, Censor, Rector kan Santuario Penafrancia asin nagin man siyang Sekretaryo Diocesan. Kan 1949 nagin siyang Diocesan Consultor, Vicar forane sa Catanduanes asin Kura Paroko sa Virac. Sunod na taon nanombrahan siyang Vicar forane asin Kura Paroko sa Gubat, Sorsogon abot taon 1955.[3]

Nanombrahan siyang Coadjutor na Obispo kan Calbayog, Samar, dangan Obispong titular kan Zerta kan Mayo 24, 1955 asin naordenan na obispo kan Hulyo 25, 1955, an pinakahubin na pading Filipino kan panahon na idto na makonsagrar na obispo. Bilang obispo, nagtukaw siya sa kargo sa Calbayog kan Hulyo 25, 1958 asin ngapit nanombrahan pinaka-enot na obispo kan Malolos, Bulacan. Filipinas kan Desyembre 11, 1961 asin nainstalar kan Marso 11, 1962. Kan siya nagpartisipar sa Ika-2ng Vatican Council sa Roma kan 1963 nagsapo siyang stroke asin napadad mala ta naggamit na nin wheelchair..[1] Si Del rosario nagdemitir kan Desyembre 15, 1977 komo obispo kan Malolos huli sa pagroro kan saiyang salud. Nagadan siya sa helang na pneumonia.[1]

Mga panluwas na takod[liwaton | liwaton an gikanan]

Toltolan[liwaton | liwaton an gikanan]