Origami

Mga origami crane

An pagtiklop kan sarong Origami crane

Sarong grupo nin mga estudyanteng Hapon an nagdedikar kan saindang kontribusyon na senbazuru sa Sadako Sasaki memorial sa Hiroshima .

An Origami (hali sa tataramon na ori na an kahulugan "pagtiklop" asin gami na an boot sabihon "papel" (sinanglian an kami nin gami huli kan rendaku)) sarong klase nin art kan mga Hapon na nagtitiklop nin papel. Sa ngunyan na gamit, an tataramon na "origami" pirming ginagamit bilang termino para sa mga pagtiklop, dawa ano man an kultura o pinonan. An boot na magibo iyo an maging sarong pigura an kuwadradong patag na papel sa paagi kan pagtiklop asin paghulma. An mga eksperto kan modernong origami pigpupugulan an paggamit kan pagputol, pagdukot, o paglaag nin marka sa papel. An mga paratiklop nin origami pirming ginagamit an tataramon na krigami para sa mga desinyo na naggagamit nin pagputol.

Sa detalyadong klasipikasyon kan Hapon, an origami nababanga sa estilong seremonyal na origami (儀礼折り紙, girei origami ) asin origami na panglibangan (遊戯折り紙, yūgi origami ), asin an origami na panlibangan sana an pankagabsan na minimidbid bilang origami. Sa Hapon, an seremonyal na origami inaapod na "origata" ( ja:折形) tanganing maiba ini sa origami na panlibangan. An terminong "origata" saro sa mga lumang termino para sa origami.

An sadit na bilang nin mga pundamental na tiklop nin origami pwedeng pagsararoon sa manlaen-laen na paagi tanganing makagibo nin mga komplikadong disenyo. An pinakamidbid na modelo nin origami iyo an Hapon na paper crane . Sa pangkagabsan, an mga disenyo na ini nagpopoon sa sarong kwadradong papel na an mga gilid pwedeng iba-iba an kolor, mga imprenta, o mga disenyo. An tradisyonal na origami kan Hapon, na piggigibo poon pa kan panahon nin Edo (1603-1868), parati na bakong gayong estrikto sa mga kombension na ini, minsan pinuputol an papel o ginagamit an mga pormang bakong kwadrado sa pagpoon. An mga prinsipyo kan origami ginagamit man sa mga stent, packaging, asin iba pang aplikasyon sa inhenyeriya.

Etimolohiya

An tataramon na "origami" sarong compound nin duwang mas saradit na tataramon: "ori" (ugat na berbo "oru"), na an boot sabihon magtiklop, asin an "kami", na an boot sabihon papel. Sagkod dai pa sana nahahaloy, bakong gabos na klase nin pagtiklop nin papel pinaggrupo sa irarom kan tataramon na origami. Bago kaini, an pagtiklop nin papel para sa paglibang midbid sa manlaen-laen na pangaran, kabali an "orikata" o "origata" (折形), "orisue" (折据), "orimono" (折物), "tatamigami" (畳紙) asin iba pa.