Spirited Away

Spirited Away
Pigdirekto ni/kan	Hayao Miyazaki
Pigproduser ni/kan	Toshio Suzuki
Pinangengenotan ni/nina	Rumi Hiiragi Miyu Irino Mari Natsuki Takashi Naito Yasuko Sawaguchi Tsunehiko Kamijō Takehiko Ono Bunta Sugawara
Musika kan	Joe Hisaishi
Sinematograpiya	Atsushi Okui
Mga Kompanya nin produksyon	Studio Ghibli
Petsa nin pagpapaluwas	20 July 2001
Oras nin pagdadalagan	125 minutes
Nasyon	Japan
Tataramon	Japanese
Badyet	$19.2 million

Spirited Away ini sarong animadong pelikulang pantasya kan Japan kan taong 2001 na isinurat asin ginibo ni Hayao Miyazaki. Ini ipig-prodyus ni Toshio Suzuki, gibo kan Studio Ghibli, asin pinag-distribwer kan Toho. An pelikula pinagbibidahan ni Rumi Hiiragi, kaibanan sinda Miyu Irino, Mari Natsuki, Takashi Naito, Yasuko Sawaguchi, Tsunehiko Kamijō, Takehiko Ono, asin Bunta Sugawara.

An Spirited Away manungod sa sarong aking babae na si Chihiro “Sen” Ogino, na naglipat nin istaran, nanggad dae tuyong napaduman sa kinaaban kan mga kami (mga espiritu sa alamat kang Shinto). Kaidtong ginibong mga orig an saiyang mga magurang kan bruhang si Yubaba, nagtrabaho si Chihiro sa bathhouse ni Yubaba tanganing makahanap nin paagi na makaluwas asin makabalik sinda sa kinaban kan mga tawo.

Si Miyazaki an nagsurat kan screenplay pagkatapos niyang magdesisyon na an pelikula ibase sa sampulong taon na aking babae kan saiyang amigo na si Seiji Okuda, an associate producer kan pelikula, na nagbibisita sa saiyang harong kada tag-init. Kan panahon na idto, si Miyazaki naggigibo nin duwang personal na proyekto, alagad sinda dae inako. Sa badyet na US$19 milyon, an produksyon kan Spirited Away nagpoon kan 2000. An animator kan Pixar na si John Lasseter, sarong tagahanga asin katood ni Miyazaki, nakumbinsir an Walt Disney Pictures na bakalon an karapatan sa pag distrebwer kan pelikula sa Norte kan Amerika, asin nagserbing ehekutibong prodyuser kan bersyon kaini na pig-dub sa Ingles. Dangan kinua ni Lasseter si Kirk Wise bilang direktor asin si Donald W. Ernst bilang prodyuser, mantang an mga parasurat nin senaryo na si Cindy asin Donald Hewitt nagsurat kan diyalogo sa tataramon na Ingles tanganing ini magtugma sa orihinal na mga hiro kan ngabil sa tataramon na Hapon kan mga karakter.

Pinaluwas sa Japan kan 20 Hulyo 2001, an Spirited Away lakop na inako asin nagin matrayumpo sa komersyo, na nagganansya nin US$396 million box office sa bilog na kinaban. Ini an nagin pinakahalangkaw na ganansya sa pelikula, sa kasaysayan kan Japan na may total na ¥31.68 billion . Ini an nagkapot kan rekord sa laog nin 19 taon sagkod na ini nalampasan kan Demon Slayer: Kimetsu no Yaiba – The Movie: Mugen Train kan 2020.

An Spirited Away sarong co-recipient kan Golden Bear kaiba an Bloody Sunday sa 2002 Berlin International Film Festival asin ini nagin pinakaenot na ginikan sa kamot na Japanese anime asin non-English-language animated film na nanggana kan Academy Award para sa Best Animated Feature sa ika-75 na Academy Awards . An pelikula pighihiling na saro sa pinakadakulang pelikula sa gabos na panahon asin kabali sa manlaen-laen na "best-of" na mga listahan, kabali an pagranggo kaini sa ikaapat na ranggo kan 100 Greatest Films of the 21st Century kan BBC.

Estorya

An dies anyos na si Chihiro Ogino asin an saiyang mga magurang na si Akio asin Yūko nagbiyahe pasiring sa saindang bagong harong. Si Akio, na pinili an pinalipot na dalan, nagpondo sa atubangan kan sarong lagusan na pasiring sa garo baga sarong inabandonang bakasyunang banwaan na pig-iinsistir ni Yūko na siyasaton kabaliktaran man kan mga protesta ni Chihiro. Kan makua an sarong garo baga daing laog na restawran na pano pa nin kakanon, an mga magurang ni Chihiro tolos-tolos na nagpoon na magkakan. Mantang nag-eeksplorar pa, si Chihiro nakanompong nin sarong dakulang karigusan asin nakamidbid an sarong aking lalaki na an pangaran Haku, na nagpatanid saiya na magbalik sa ibong kan salog bago magsolnop an saldang. Alagad, an mga espiritu nagpoon nang maglataw, asin nadiskobre ni Chihiro na an saiyang mga magurang nagin nang mga orig asin dai na siya makakabalyo sa salog na ngonyan binabaha na.

Nahanap ni Haku si Chihiro asin tig-sabihan siyang mag hagad nin trabaho sa boiler-man kan parigosan na si Kamaji, sarong yōkai na nagkokomandante kan susuwatari. Imbes, hinagad ni Kamaji sa sarong trabahador na an pangaran Lin na darahon si Chihiro ki Yubaba, an bruha na nagpapadalagan kan kariguan na nagsumpa sa saiyang mga magurang, asin iyo an amo ni Haku. Nagporbar si Yubaba na takoton si Chihiro, alagad sa kahurihurihi, tinawan siya kani nin kontrata sa trabaho. Mantang pinipirmahan ni Chihiro an kontrata gamit an saiyang pangaran (千尋), hinale ni Yubaba an ikaduwang kanji sa saiyang pangaran asin pinalitan niyang Sen (千). Dai nahaloy, nalingawan niya an saiyang tunay na pangaran, asin kan huri ipinaliwanag ni Haku na kinokontrol ni Yubaba an mga tawo sa paagi nin pagkua kan saindang mga pangaran; kun lubos niyang malingawan an saiya arog kan ginibo niya kaidto, dai na nanggad siya makakahale sa kinaban nin mga espiritu.

An ibang mga trabahador, apwera ki Kamaji asin Lin, pirming pigtutuyaw si Sen. Mantang nagtatrabaho, inimbitaran niya an sarong silensiong nilalang na an ngaran No-Face sa laog, na pigtubudan niyang ini sarong parokyano. An espiritu man kan maating salog uminabot asin naging enot na parokyano ni Sen. Pagkatapos linigan, tinawan niya kani nin sarong emetic dumpling na may mahika bilang tanda nin pasasalamat. Mientrastanto, si No-Face naghagad nin kakanon sa mga trabahador kan karigusan asin nagtatao nin bulawan na kinopya hale sa espiritu kan salog bilang karibay. Alagad, kan si Sen nagsayuma kan bulawan asin naghale, anggot niyang hinalon an nagkapirang trabahador.

Nahiling ni Sen na inaatake an sarong dragon kan sarong papel na shikigami asin namidbid an dragon si Haku palan na nag bago nin anyo.Kan an grabeng lugadan na si Haku nagpasiring sa penthouse ni Yubaba, tig-sundan siya ni Sen paitaas.

An shikigami na patagong nagsakay sa saiyang likod, nagbagong anyo asin naging saro sa kambal na tugang na babae ni Yubaba na si Zeniba, na iyo an may kagibo kaya naging kino an aking lalaki ni Yubaba na si Boh, asin naggibo nin sarong pekeng kopya kaini. Sinabi ni Zeniba ki Sen na hinabon ni Haku an sarong bulawang selyo na may mahika asin nakakagadan na sumpa saiya. Inatake ni Haku an shikigami, na nagin dahelan kan pagkawara ni Zeniba. Kan siya asin si Sen mahulog sa laog kan boiler room, tinawan niya ini nin parte kan emetic dumpling tanganing isuka an seal asin sarong slug na ginadan man kan nandidiring si Sen.

Nagdesisyon si Sen na ibalik an selyo asin maghagad nin dispensa ki Zeniba. Inatubang niya an namamaga nang si No-Face asin pinakakan siya kan natatadang dumpling tanganing isuka niya an mga trabahador. Tig-sundan ni No-Face si Sen paluwas sa karigusan, asin tinabangan sinda ni Lin na maghale. Si Sen, No-Face, asin Boh buminyahe gamit an ticket na itinao ni Kamaji tanganing mahiling si Zeniba. Mientrastanto, dikitan na kudtang ipakagadan ni Yubaba an mga magurang ni Sen, alagad ihinayag ni Haku na nawawara si Boh asin nag-aalok na kuanon siya kun butasan ni Yubaba si Sen asin an saiyang mga magurang. Nag-oyon si Yubaba, alagad kun makakapasar sana si Sen sa huring hamon saiya.

Nakipag-hilingan si Sen ki Zeniba, asin ini ginibohan siyang sarong pamutos na may mahika asin ipinaaram digdi na ginamit ni Yubaba an slug tanganing kontrolon si Haku. Gamit an saiyang pormang dragon, isinakay asin luminayog si Haku kaiba si Sen asin Boh pabalik, mantang si No-Face nagdesisyon na magdanay ki Zeniba. Sa katahawi kan pagbiahe, nagigirumdoman ni Sen an pagkahulog sa Salog kan Kohaku mga taon na an nakaagi asin ligtas na naanod sa baybayon, igdi nahulaan niya an tunay na pagkatawo ni Haku na iyo palan an espiritu kan Salog Kohaku.

Pag-abot ninda sa karigusan, pigporbaran ni Yubaba si Sen na mamidbid an saiyang mga magurang sa sarong grupo nin mga orig tanganing makahale. Pagkatapos niyang magsimbag nin tama na mayo sa mga orig an saiyang mga magurang, nawara an saiyang kontrata asin ibinalik saiya an saiyang tunay na pangaran. Dinara siya ni Haku sa mara nang salog asin nagpangakong mahilingan giraray sinda. Si Chihiro nagbalyo sa salog pasiring sa saiyang mga magurang na buminalik na sa diting anyo kaini. Dai nahaloy bago maghale pasiring sa saiyang bagong harong, si Chihiro nagbalik sa tunel, an saiya man na pamutos hale ki Zeniba dai nagdanyog.