Toshiko Kishida

Si Toshiko Kishida (岸田俊子, Kishida Toshiko, 14 Enero 1863 – 25 Mayo 1901), saro sa pinakainot na Haponesang parasurat katungod kan kababaihan. Siya nagsurat asin nabisto sa ngaran na Shōen (湘煙).

Amay na buhay asin edukasyon

Namundag si Kishida Toshiko sa Kyoto Prefecture, Japan, kan 1863. Siya nagdakula sa pamilyang negosyante. An saiyang ama iyo si Kishida Mohei, paratinda nin segunda manong mga bado, asin an ina niya iyo si Taka. Sa sarong enot na biyograpiya ni Sōma Kokkō, sinambit na an mga pagbiyahe sa negosyo kan ama niya an dahilan kun taano ta siya perming mayo sa harong, rason kun tano nagkusog an relasyon kan ina asin aki. Ini an nagtulod ki Kishida na magmawot na mapauswag an kamugtakan kan kababaihan asin makua ninda an saindang pinansyal asin sosyal na independensya sa saindang mga agom.

Si Kishida mantang nagdakula sa panahon nin Meiji-Taishō, na nagpoon kan 1868 sagkod 1926. Sa panahon na ini, an mga lider nin bansang Japan nagbukas kan saindang isip sa bagong ideya asin an repormista nag-apod para sa "bagong mga karapatan asin katalingkasan." An mga babayi sa ining kampanya nin reporma midbid ngunyan sa pagigin "enot na mga parapangbabaye kan Japan." Si Kun sain si Kishida saro sa mga parapangbabayeng ini. An pokus kan saiyang kampanya iyo an pagpauswag kan kamugtakan kan mga daragita na taga-Japan, partikularmente an mga nasa medyo hararom asin haralangkaw na klase. Ining pagpauswag "importante kun gusto nindang maako kan ibang mga nasyon na may abante nang teknolohiya." Sinasambit kan mga repormista na dapat na magkaigwa nin pagkapantay-pantay an gabos na babaeng taga-Japan. Sa mga reporma na nagkaigwa sa Japan, an babaihan kan Japan nagkaigwa nin mas dakulang oportunidad na magigwa nin bagong karapatan asin katalingkasan. An mga babae naghimo kan termino na "marahay na agom, madonong na ina," na an boot sabihon "tanganing magin marahay na sibilyano, an mga babae kaipuhan na mag-adal asin makikabale sa pampublikong mga bagay."

Karera

Pagkatapos na maipaheling an saiyang talento sa kaligrapiya ki Imperial Prince Arisugawanomiya Taruhito kan 1877, si Kishida namidbid bilang angay na kandidata para sa pagserbi sa korte kan Emperatrice Meiji. Duwang taon pakalihis kaini, siya an enot na babae na bakong-aristokrata na nagserbi na sarong monji goyō gakari (paraserbi sa korte na espesyalista sa klasikal na Intsik) sa korte ni Emperatrice Haruko. Nagtrabaho siya sa korte imperyal na sarong gurong nagseserbi sa Emperatrice; alagad, namatean niya na an korte imperyal "harayo sa tunay na kinaban" asin sarong "simbolo kan sistema nin konkubina na sarong pag-insulto sa mga babae." Si Kishida nagpoon na magtrabaho sa kampanya nin reporma nin bilog na panahon asin nagpoon na magtaram sa bilog na Japan.

Taong 1882 , siya naghali sa korte tanganing magpoon nin nasyunal na paglibot sa pagpapatalastas, na sinuportahan kan Jiyūtō (Partido Liberal). Sa paglibot na ini, siya nag-uyon man sa Kilusang Katalingkasan asin Karapatan kan banwaan na sarong parataram, asin nagbiyahe kaiba kan grupo sa manlaenlaen na mga lugar sa baryo, nagtutukdo asin nagpapahayag kan pagpirit kan grupo sa mga gibo kan gobyerno Meiji asin nag-apod para sa mas dakulang partisipasyon asin oportunidad para sa sosyal na pagka-sibyano. An saiyang importansya sa kilusan nagin mas marigon kan Abril 1882, kan siya nagtao nin taram na may titulong "An Dalan kan mga Babae" sa inagurasyon kan Osaka Provisional Political Speech Event.

Regularmenteng pigsusurat sa mga peryodiko sa rehiyon an saiyang mga pampublikong pagtaram, na an mga titulo kabali an "An Gobyerno bilang Puwersa sa mga Lalaki, asin an mga Lalaki na sarong Puwersa sa mga Babae" (Mayo 1882), 'An mga Babae Dai Makakapugol sa Pagsararo kan 'Matagas asin Malumoy' [gōjū]", asin "An Pagtagal kan Dae Maninigong Tagalan, asin An Paghadit kan Dae Maninigong Ihadit: Ini bako an mga Katungdanan kan mga Babae", na nagpapaheling kan saiyang pagmawot na baguhon an kamugtakan kan mga babae sa sosyedad. Sinadol ni Kishida an mga babae na magpaadal, bilang sarong pundasyon sa pantay na katalingkasan kan mga babae asin lalaki. "Naglalaom ako na sa maabot na panahon, midbidon na an enot na kinakaipuhan sa pag-agom iyo an edukasyon," an sabi niya.

Kan 1883, pakatapos kan saiyang taram na "Mga Aki na Babae sa mga Kahon," siya "inaresto asin pinagmulta huli ta nagtao siya nin politikal na taram na mayo nin permiso," na kinakaipuhan kan batas kan Hapon kan panahon na idto. Huli sa pag-aresto saiya sa Ōtsu, nagtapos an saiyang karera na sarong parataram, alagad nagpadagos siyang magtrabaho para sa Kilusang Katalingkasan asin Karapatan kan Banwaan. Siya nagpoon na magtaram tumang sa inekwidad kan mga babae sa Japan.

"Mga Aki nin Babae sa mga Kahon" Diskurso

Kan Oktubre 12, 1883, an taram na "Mga Aki na Babae sa mga Kahon" nagkritika kan sistema nin pamilya sa Japan asin kan mga problema kaini para sa mga daraganon na babaeng Hapones. Aram niya na ini sarong nakaturugan na kultura, asin na dakul na magurang an dai nakakaaram kan danyos na puwede kaining ikapahaman kan mga aking babae huli sa pagbabawag sa sainda. Naintindihan ni Kishida na an mga mayaman asin medyo mayaman na magurang dai boot na bawagan an mga aking babae. Alagad, sinda nabuta kan pangangaipo na itukdo an mga importansya na angay sa kultura asin sosyedad nin Hapon.

Sa saiyang diskurso, ipinaheling ni Kishida an tulong "kahon" na yaon sa mga pamilyang Hapones. Ini bakong literal na mga kahon, kundi mga limitasyon sa isip asin pagmate. Ipinapahiling kaini kun pano limitado an mga aking babaeng Hapones. An enot na kahon iyo an pisikal na pagbabawag kan mga magurang sa saindang mga aking babae. Dai tinutugotan an mga daragita na magluwas kan saindang mga kuarto, asin pigbabawag an gabos na bagay na hale sa luwas. An ikaduwa iyo an pagsunod kan mga aking babae. Digdi, "an mga magurang dai naggigibo kan saindang responsabilidad sa saindang mga aki, asin dai sinda nagtutukdo nin ano man." Dai sinda inaako nin pagkamoot na "sundon an gabos na tataramon kan saindang [magurang] na mayo nin reklamo." An huring kahon iyo an edukasyon, kun saen tinutukduan sinda nin gurang na kaaraman. Ini an pinakaimportanteng kahon para ki Kishida. Huli ta ini nagtataong importansya sa "mga katutuan kan mga madonong asin banal na lalaki kan nakaagi," namatean niya na ini nagpapangyari sa mga babae.

Sinambitan ni Kishida an saiyang bersyon nin kahon. An saiyang kahon mayo nin mga lanaw asin bilog na bukas asin inspirado sa katalingkasan. An kahon ni Kishida "[tinugotan] an mga nasa laog kaini na maglakaw sa kun sain man mapaduman an saindang mga bitis, asin iunat an saindang mga takyag sagkod sa saindang gusto." Bakong arog kan ibang mga kahon na ilinadawan ni Kishida, an saiyang kahon na mayo nin lanaw matugotan an mga aking babaeng Hapones na mag-adal asin magin aktibong miembro kan sosyedad. An taram nagsuherir man na an mga kahon na ginibo manungod sa aking babaeng Hapones dai dapat gibohon nin madali-dali. Siya sinambita na kun an kahon gibohon nin madali-dali, an mga aking babae magkakaanggot na ibugtak sa laog kaiyan asin magdadalagan hale sa siring na mga pagbabawag. An "Mga Aki na Babae sa mga Kahon" nag-analisa asin nagpirit sa sosyedad nin Hapon asin sa pagtratar kaini sa mga aking babaeng Hapones. An kawaran nin mga karapatan kan mga babae sa Japan nagpangenot sa kilusang peminista asin repormista kun saen si Kishida Toshiko sarong mayor na parte. An taram ni Kishida nagahamon sa mga kultura na norma kan sosyedad nin Hapon sa pankagabsan. An taram nagpaigwang marigon man an lugar kan mga babae asin kan kilusang pangbabae sa kasaysayan nin Japan.

Huri

Kan 1884, nag-agom si Kishida ki Nakajima Nobuyuki, na sarong aktibistang politikal sa Partido Liberal. Sa sarong biyahe nin negosyo sa Italya kaiba an saiyang agom, siya nagkaigwa nin tuberkulosis, dangan naghali si Nobuyuki sa saiyang pwesto asin an mag-agom nagbalik sa Japan. An mag-agom nag-atras sa aktibong buhay publiko, alagad nagpadagos na magpartisipar sa politika. Si Nobuyuki nagkaigwa man nin tuberkulosis, asin sa saindang huring mga taon nag-istar sinda sa banwaan nin Ōiso. Si Nobuyuki nagadan kan 1899, mantang si Kishida nabuhay sagkod Mayo 1901. An nag-eeksister na mga diary naglalakop sa mga peryodo kan saiyang buhay siring man an mga publikadong obrang piksyon, sanaysay, asin mga rawitdawit sa mga peryodiko. Si Kishida, na kan huri nagamit kan saiyang surat ngaran na Shōen, nagpartisipar sa pampublikong kinaban nin politikal na aktibismo, pagsurat, asin sosyal na komento. Siya midbid bilang sarong popular na babaeng pigura sa literatura asin aktibismo, na nagtutulag sa mga pribilehiyo kan mga lalaki sa edukasyon, literatura, asin mga sirkulo nin pamamahayag. An saiyang mga sinurat nagpapaheling kan saiyang mga eksperyensiya na sarong babae sa nagbabagong sosyopolitikal na sosyedad nin Meiji.