Hu Jintao

Gikan sa Bikol Sentral na Wikipedia, an talingkas na ensiklopedya
Si Hu Jintao

Si Hu Jintao (Tsinong simple: 胡锦涛; Tsinong tradisyunal: 胡錦濤; pinyin: Hú Jǐntāo, pinangaki Desyembre 21, 1942) iyo an presenteng Pinakahalangkaw na Pamayo kan Republikang Popular kan Tsina, kapot an mga titulong Sekretaryo Heneral kan Partidong Komunista nin Tsina poon 2002, Pamayo kan Republiukang Popular nin Tsina poon 2003, Poon kan Komisyon Sentral nin Militar kadto pang 2004 na nagsalida ki Jiang Zemin bilang siya an namamayo na sa lideratong nag'aapat nang henerasyon sa Partido Komunista nin Tsina.

Halawig na siyang nasisibot sa burukrata kan Partido Komunista haros enterong buhay niya orog na komo Partido sekretaryuo sa probinsya nin Guizhou asin Bise-presidente sa Ronang Autonomo nin Tibet asin sunod bilang Enot na Sekretaryo kan Partido Sentral na Sekretariat. Dangan nagin siyang Bise-Presidente sa irarom kan pamomoon kan dating lider na si Jiang Zemin. Sinasabi na si Hu iyo an pinakaenot na lider kan Partido Komunista na mayong inagihan bilang sarong rebolusyonaryo. Komo siring, an pagsakat niya sa liderato nananalmingan kan transisyon sa liderato nin Tsina hale sa mga gurangan na komunista pasiring duman sa mga hubin, mas pragmatikong mga teknokrata.

Sa termino niya ibinalik niya an kontrol kan estado sa magkapirang sektor kan ekonomiya na pigluwagan kan nakaaging administrasyon huli gayod ta medyo konserbatibo siya pag'abot sa reporma pulitika..[1] Katuwang si Premier Wen Jiabao, si Hu namoon sa haros sarong dekada nin dagosdagos na pagtalubo asin paggantad na nagpapusog sa Tsina bilang sarong poder sa kinaban. Hinanap niyang mapagantad an sosyo-ekonomikong buhay sa laog kan nasyon paagi kan inapod nindang Konsepto na Pagpagantad na Siyantipiko na tinotonggo an pagtogdok nin "magkaoroyon na sosyedad", progresibo asin mayong siriplingan.[2]Manta, si Hu higot na kontrolado an hiro kan Tsina sa lantad nin pulitika na alistong binubungkal an anoman na kariribokan asin pagkokontra kan mga aktibista, o kan mga protesta nin mga etnikong minoriya. Sa panluwas na polisya, saiyang itinotolod an "matoninong na pagpagantad," gamit an inaapod na "malomoy na poder" sa internasyonal na relasyon asin sa diplomasya paagi sa pakitrato sa negosyo. Masabi pa, sa panahon niya an impluensya kan Tsina orog na nagkusog sa rona kan Aprika, Latin Amerika asin sa mga patalubong saradit na nasyon.[3]

Mga enot na taon[baguhon | baguhon an source]

Si Hu Jintao namundag sa Taizhou, probinsya nin Jiansu kan Desyembre 21 1942. Nagdakula siya sa Taizhou, lugar na masira asin maparoy, asin duman siya nagtapos kan pag'adal niya sa primarya asin sekundarya. Dangan nagkua siya nin kurso sa hydraulic engiuneering sa Unibersidad nin Tsinghua sa Beijing.

An pamilya niya naghubo hale sa Jixi County kan probinsya nin Anhui paduman sa Taizhou sa panahon pa kan saiyang lolo. Maski ngane may negosyo sa tsa an ama niya, sinda pobre sana. An saiyang ina sarong maestra asin nagadan kan siya edad pito pa sana. Pinadakula na lang siya kan saiyang nanahon. An saiyang ama nasahotan pa kan panahon nin Rebolusyon Kultural, sarong makatristeng pangyari na grabeng epekto ki Hu, asin saiya man maigot na pigtrabaho na ipahiling na mayong kasa'lan an saiyang ama.[4]

Si Hu matale' na estudyante sa haiskul kan Taizhou. Sinasabi na siya mahusay asin mahilig sa pagkanta asin pagbayle.[5] Kan taon 1964, kan siya estudyante pa sa Unibersidad nin Tsinghua, siya nagbali sa Partido Komunista bago pa nagputok an Rebolusyon Kultural. Nagin siyang pamayo kan Tsinghua Student Union. Nagtapos siya nin hydraulic engineering kan taon 1965. Sa Tsinghua, si Hu nasumpongan si Liu Yongqing na iyo na ngonyan an saiyang agom. Igwa sindang sarong aking lalake, ngaran si Hu Haifeng, asin sarong aking babae, nagngangaran Hu Haiqing.

Kan taon 1968 si Hu nagserbisyo sa Gansu na an trabaho yaon sa konstruksyon kan Liujiaxia Hydroelectric Station[6] manta sabay man saiyang pigmamato an mga sibot sa lokal na sanga kan Partido duman sa Ministro nin Patubig asin Elektrisidad. Poon 1969 abot 1974, si Hu nagtrabaho sa Sinohydro Engineering Bureau, bilang inhenyero.[7]

Mga panluwas na takod[baguhon | baguhon an source]

Toltolan[baguhon | baguhon an source]

  1. Luard, Tim (11 January 2005). "BBC:China's Leader shows his stripes. 11 January 2005". BBC News. http://news.bbc.co.uk/2/hi/asia-pacific/4165209.stm. 
  2. "Kuhn, Robert Lawrence: Hu's Political Philosophies" (PDF). Esnips.com. kinua 9 Nob 2012
  3. World Savvy Monitor: China and the World - A foreign policy overview
  4. Havely, Joe (19 October 2007). "Getting to know Hu". Al Jazeera. http://english.aljazeera.net/news/asia-pacific/2007/10/2008525172536374792.html. kinua 9 Nob 2012
  5. http://asianhistory.about.com/od/profilesofasianleaders/p/HuJinTaoProfile.htm
  6. "临夏旅游" (Linxia Tourism), published by Linxia Hui Autonomous Prefecture Tourist Board, 2003. 146 pages. No ISBN. Pages 26-27.
  7. Gilley, Bruce. Chjina's new rulers: the secret files. New York. p. 79.isbn=I-59017-072-5