Isla Rancho Festival
An Isla Rancho Festival sarong kapiyestahan panturismo, asin pagromdom kan Anibersaryong Pagtogdas kan San Pascual, Masbate tuyong ikaduwang semana kan bulan nin Mayo. Nginaranan "Isla Rancho" an kapiyestahan huli sa rason na sobra sa saro-katolohan (1/3) kan isla okupado na kan mga rancho asin dakul na bisita tolos naroromdoman an banwaan kan San Pascual na mahiwas nanggad na bakahan.
An kapiyestahan na ini totoo sabay naman an pagtaong onra sa patrona kan banwaan na si San Pascual Baylon. Siring man an kapiyestahan pigtotolod kan gobyerno lokal bilang sarong sangkap na kaogmahan para sa mga bisita asin turista kun saen mamamate ninda an imbong kan trato sainda kan mga residente asin maeksperensya an manlaenlaen na aktibidad na sulit nanggad an saindang pagbakasyon igdi.
Mga aktibidad
[baguhon | baguhon an source]Mga aktibidad asin mga makabangkag na mga kasibotan igdi iyo an mga parada nin mga cowboy asin cowgirl na nakakupya asin butas lunad sa mga kabayo na siring sa sarong rodeo, an pagpadayaw nin mga grupo hale sa mga iba-ibang barangay nin mga bayle sa tinampo sulot an makolor asin maraborab na mga costume, an pagparada nin mga float na pigsamnohan, an pagtinda asin paglatag kan mga produktong agrikultural asin mga handikrafts na ginibo sa mga barangay, karakanan kan linutong baka na sarama' an bilog na banwaan, asin an pagpatiribayan.
Iyo man ini an oportunidad na an gobyerno nadulot nin pag'onra sa mga persona na may napapalaen na naginibohan para sa banwaan, an pagpili nin mga Murtya siring kan Munting Lakan, Munting Mutya, Mutya ng San Pascual, Mutya ng Isla Rancho, Mutya ng Turismo.
Sa patiribayan yaon diyan an Carrera de Cintas kun saen mga nakakabayo na partisipante sinisikwit an mga nakabitay na mga sa'long na karabit sa paha. An mga enot na makasikwit kaini iyo an may premyo, an pagdaog asin pagsupil kan nagroroab na baka na dapat mapahigda, an pagbunot sa palaw nin mga niyog asin gana an naenot asin may pinakadakul nabunot, an pagtiak kan pinakadakul na kahoy, an paghakot nin magabat na kargamento asin padakulan ini sa pinakahalipot na oras, an paggubing sa baka kun arin pinakamagayon, an urumbasan nin mga sibid-sibid sa dagat, an baranwitan sa pantalan, asin an pagirinoman serbesa sa plaza. Igwa man igdi kan inaapod nindang Rancher's Night na ginigibo sa kahiwasan kan pantalan pagbanggi pakatapos kan paputok nin mga kwitis. Sa aldaw nin kapiyestahan, an mga imahen nin mga santa asin santo na patrona kan iba-ibang barangay sinasakay sa mga lantsa asin ipinuprusesyon sa dagat asin pagduong pabalik, dinadara sa simbahan kun saen may ginigibong pagmisa.[1]
Masabi pa, an sarong banggi kaini sa semanang kapiyestahan igwang baraylihan sa Town Center ninda kun saen may mga parakanta asin banda na maaling sa mga bisita asin mga residente.
Mga panluwas na takod
[baguhon | baguhon an source]- [1] San Pascual launches Isla Rancho Festival. Kinua 19-05-15.
- [2][permanent dead link] Travel book kan San Pascual pigbunsod. Kinua 19-05-15.
Toltolan
[baguhon | baguhon an source]- ↑ Isla Rancho Festival. Libro pinalagda kan gobyerno lokal kan San Pascual sa tabang kan Camarines Sur Institute of Fisheries and Marine Sciences, Sta. Rosa del Norte, Pasacao, Camarines Sur. 1st printing, 2015. ISBN 978-971-809-007-7 Kinua 19-05-15.
