Muting

Gikan sa Bikol Sentral na Wikipedia, an talingkas na ensiklopedya


An muting
An mata sa cross-sectional na pahiling


An Muting[1][2](inaapod man na katarata, ulap [3]iyo an paglilibog kan lente kan mata na naresulta sa pagluya kan paghiling na malinaw. Ini an pinakakomun na ikinakabuta asin an siring na kamugtakan nabubulong paagi nin operasyon. An pagkawara nin pagmaan nangyayari ta an lente nararaot an dati kaining kalinawan na garo may alopoop kumbaga asin an siring na kamugtakan binabagat an toltol na paglaog kan liwanag paisirng sa retina sa likod kan bola nin mata.

Masasabi na an muting resulta parati kan paggugurang nin tawo dawa totoo igwa pa man ibang dahelan kun ano ta nabubuta an tawo. An muting naresulta sa pagdeposito nin dulaw-kayumangging pigmento sa lente, asin ini, kasabay an paghira kan arkitektura kan mga awat-awat sa lente, napadikit kan pagbulos kan liwanag o ilaw palaog sa mata na inaabtan sa problema nin pagmaan.[4]

Pwede man bako huli sa kagurangan kaya nagkakaigwa nin katarata. Pwedeng huli sa helang na diabetes, pagsisigarilyo, sobrang alkohol sa pag'inom, balad na marhay an mata sa saldang o huli daa ta an protina sa lente kan mata naghihira dara kan natural na pagrarandan kaini.[5]

An may muting nakakaeksperensya nin kapawotan sa pagapresyar kan iba-ibang kolor, an dai pagrisa kan paghihira kan hibog o himpis kan mga pigurang nahihiling, sa pagmaneho nin mga behikulo, sa pagbasa asin pagmidbid nin mga pandok asin man an pagmate nin sobrang sola o silyab kan mga kasabat na ilaw.[6]

Operasyon sa muting[baguhon | baguhon an source]

Sa modernong paagi nin operasyon sa paghale kan muting, an apod kaini Phacoemulsification. Enot, binabagol ngona an palibot kan mata ngane bakong makulog sa paggurot. An prosesong ini nasisi sa gilid kan mata asin huli sa ultrasonic wave na isinusumpit, tinutunaw an lenteng naglibog huli sa muting asin ini pakatunaw hinihigop paluwas manta na pinapakupsitan nin salt solution ngane dai maglakma an estruktura kan butog na atubangan kan mata. Dangan tinatakodan nin bagong artipisyal na lentemg malogyat na plastik asin ugaleng ini pakupsitan an interior nin antibiotic ngane dai mangyari an pagkasorip o impeksyon.


Toltolan[baguhon | baguhon an source]

  1. Mintz, Britanico. Bikol-English Dictionary. Quezon City. 1985. ISBN 1971-10-0212-4. p.395.
  2. Silverio, Julio. Bicolano-Pilipino-English Dictionary.National Book Store, Inc. 1980. p.76.
  3. ulap, Mintz,982.
  4. http://www.aafp.org/afp/1999/0701/p99.html Kinua 4=04-14
  5. https://www.nei.nih.gov/health/cataract/cataract_facts.asp Kinua 04-04-14
  6. http://www.bmj.com/content/333/7559/128 Kinua 04-04-14