Natong

Gikan sa Bikol Sentral na Wikipedia, an talingkas na ensiklopedya
Magluksó sa: nabigasyon, hanapon
Gulay na natong

An gulay na natong sarong simpleng lutò kan dahon nin natong sa gutâ na may sili asin karne o sirang askad.

An dahon na ginagamit sa ginutaan na natong pwedeng la'bas pa asin dai pinaalang o idtong binalad sa saldang. Arin man igdi sa duwa, pareho ini kinikirinit asin pinipili idtong bakong magatol asin bakong makura'sil o makunot. An natong ibang tinanom sa linsa ta an huri may natubong dakulang laman alagad an dahon-linsa (na mas nadarakul kisa sa dahon natong) pwede man gutaan pero bakong arog kalomhok sa dahon natong asin ta medyo matagas an mga gusok kan dahon, ini hinihimoro asin dai ibinabali sa pagluto.

An tinanom na natong

An laman kan tinanom na natong saradit asin haros matilaba sana. Bakong arog kan laman kan linsa, an laman kaini matari (bakong masapog), makubol (bakong malomhok sa kagat) asin bakong mapulot. Ini mas bagay sanang pansalak sa ibang lutoon arog kan kalabasa.

Algad, may sarong klaseng natong, inaapod na tinsol na angay sana man na palalamanon. Dai bagay an mga dahon kaini na gulayon.