Santuario ni Nuestra Señora de Peñafrancia
An Santuario ni Nuestra Señora de Peñafrancia (Ingles: Shrine of Our Lady of Peñafrancia, sa hinayokong na arapodan kan mga Bikolano, "Si Ina") ikinaag kwenta harong kan ladawan ni Ina sa dakulang pag-onra saiya kan mga deboto niya.
Mga laóg |
[liwatón] Pagpatogdok
An Santuario natogdok kan enot gibo sana sa kawayan asin gogon. Alagad kan 1711, nakapagibo si Pading Miguel Robles de Covarrubias nin santuario na alabes simbahan na pinahaman na niya sa gapo. An santuario pinadakula ni Obispo Ysidoro De Arevalo kan siya an nakatukaw na obispo sa Nueva Caceres (1740-1751).[1]
An atubangan kaini (surungan) pinagibo asin ginastosan kan si mga Kaiinsikan sa Nueva Caceres asin siring man ginagastosan ninda an pagoda,[2] o an sakayan ni Ina (kan enot inaapod ining Sampan[3] gikan sa tataramon na Intsik).[4] An mga kaakian kan mga Insik kaidto digdi sa Simbahan kan Peñfrancia pinapabunyagan.[5] Kaya su enot na surungan makikita an desenyo sa Insik asin siring man makikita mga pinggan, mga tapayan na ladawan na sa kurit kurit asin arte kan mga Insik. An mga lalawgon man kan mga santo santa may pagka-singkit asin bako kun anoman, ini patotoo kan malaad na pagdebosyon kan si mga katolikong Insik ki Ina na ogma lang sinda gumastos para saiyang kaomawan.
Sa gabos na Obispo, si Msgr. Francisco Gainza an Dominikanong padi an dakul ambag sa debosyon kan mga Bikolano. Siya an nagsurat kan enot na uusipon manongod sa pagdebosyon ki Ina. Naggibo man siya nin nobenaryo para sa pagpangadye ki Ina, pinalaba niya an atubangan kan edipisyo nin limang metro asin siya pa an nagdesenyo kan atubangan. Sagkod ngonyan siring pa man an hitsura.
Ngani permanente an pag-asikaso sa santuario, nagbugtak si Obispo Gainza kan katongdan na an trabaho iyo an mag'ataman kan Santuario. An enot na capellan igdi na nakatala sa rekord iyo si M.R.P. Vicente Garcia. Sa laog kan periodo 1865-1878 siya an capellan.
Ngonyan (2008) an Santuario sakop na kan Paroko nin Peñafrancia asin an nagkakapot na kura paroko kaini iyo si Padre Jerry Hernandez. Makukua an Santuario sa poro kan Peñafrancia Ave, igdi sa Ciudad kan Naga, harani sa pagdolonan kan Bgy. San Felipe.
[liwatón] An korona asin aureola ni Inâ
An korona ni Inâ saka an saiyang aureola iyo an pinakamahalaga na parte kan imahen. An korona, na tinampokan nin mga gapong mamahalon enot na inusar kan Septyembre 20, 1924 durante kan koronasyon kanoniko ni Nuestra Senora de Penafrancia komo Patrona kan Bicolandia. An nagpasadya kaini iyo si Rev. P. Casimiro Lladoc sa Zamora Brothers sa Manila. An gasto kaini pinagpâsan kan mga kaapil kan Penafrancia Association na nataon an presidente iyo si Eduardo Ontengco. Kan panahon man na idto si Dona Antonietta Cecilio Pardo vda.de Strohm nagdonar nin apat na ribong pesos (Php 4,000.00) na nakatabang sa pagpahaman asin pagbalukat kan korona.
Ini ginamit naman kan 1948, Taon ni Maria, asin kan 1949 kan Anibersaryong Pirak ni Inâ ta ika-25ng taon nin saiyang koronasyon. Ultimong nausar ini kan 1974, an Bulawan na Anibersaryo niya poon kan koronasyon kanoniko.
An aureola niya iyo an talidong na sagyap namugtak sa likod kan saiyang korona. Ini an mahal na gayong alahas ni Inâ. Igwa ining 12 saradit na bitoon na pigrerepresentar an 12 apostoles asin an 12 tribu kan Israel. Sa balang bitoon may nakatampok na gapong mamahalon. Hihnaman daa ini kan mga taon 1870 asin donasyon kan sarong nag'ngangaran Dona Aleja de la Paz Vda. de Antonio Cecilio. Nakatukaw an aureola sa purong bulawan. Ini daang mga gapong mamahalon kadamotan ini kan kuleksyon kan si kagdonar na harale pang luwas kan nasyon sa saiyang mga pagbyahe'byahe.
Alagad, an duwang ining mahalagang bagay bihira nang ipagdayaw sa prusisyon asin nakasaray sa sarong safety box sa sarong bangko ta natatakot an mga otoridad kan Simbahan na mahabon ini.
An mga ginagamit sa pagpruprusisyon tuyong piyesta iyo an mga huwad kan si mga orihinal.
[liwatón] Toltolan
- ↑ Abella, Domingo. Bikol Annals, p.100
- ↑ Peñafrancia 1985: Solemn Elevation Basilica Minore de Nuestra Señora de Peña de Francia, p. 24
- ↑ sampan, sa Ingles, "a small flat-bottomed Chinese river boat." Toltolan: Webster's Universal Dictionary and Thesaurus. Geddes & Grosset. 2006.David Dale House. New Lanark.Scotland, p.455. Kapôngalan kan katagâ: Origin: 1610–20; < Chin sānbǎn three-plank (boat), or < cognate dial. forms [ http://dictionary.reference.com/browse/sampan] Alagad, direktang naguno' sa mga Insik ta mayo pa an mga Amerikano igdi, ginagamit na kan mga gugurang na taga-Naga.
- ↑ Perez, Jose B. Builder of Ina’s pagoda Bicolmail (Pighúgot 2009-09-14)
- ↑ Peñafrancia 1985: Solemn Elevation Basilica Minore de Nuestra Señora de Peña de Francia, p. 24
[liwatón] Hihilngan
- "The History of Peñafrancia", sarong artikulo surat ni Fr. Florencio C. Yllana, na nagluwas sa Penafrancia Souvenir Program, Sept. 1941
- The "Crown" and "Aureolas" of the Virgin of Penafrancia", sarong artikulo sa Penafrncia 1985. Hilnga boklit 51.
