Valentina Tereshkova

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
Si Valentina Tereshkova

Si Valentina Vladimirovna Tereshkova (Ruso: Валенти́на Влади́мировна Терешко́ва; namundag 6 Marso 1937) iyo an pinakaenot na babaeng nakaabot sa kahiwasan kan espasyo. Siya ngonyan retirado nang kosmonaut na Sobyet. Sa apat na gatos na aplikante, dangan sa limang pinalista, siya an napiling magpiloto kan Vostok 6 kan ika-16 nin Hunyo 1963 asin siya nagin pinakaenot na babae na naglupad sa espasyo. Siya man ngane an pinakaenot na sibilyan sa espasyo [1] ta pinalaog lang siya sa Pwersa Ayre kan USSR komo karaipohan sa pagbali sa Kwerpo Kosmonaut. Sa misyon na ini, na nag'ayaw nin 3 aldaw, naggibo siya nin mga eksamen sa sadiring hawak sa pagkolekta nin datos kun ma'no man an mga reaksyon kan hawak'babae sa mga palupad-espasyo.

Siya dati sarong trahabador sa pabrika nin tela asin nobatong para'parakyut. Kan tinunaw na an grupo kan mga kosmonaut na babae, siya nagin sarong prominenteng kaapil sa Partido Komunista kan Unyon Sobyet, na nagkapot nin iba-ibang pwesto pulitikal. Kan luminagpak na an Unyon Sobyet nagretiro na siya sa pulitika pero nagdanay siyang sarong heroe sa mata kan mga Ruso.

Mga panluwas na takod[liwaton | liwaton an gikanan]

Mga toltolan[liwaton | liwaton an gikanan]

  1. "Valentina Vladimirovna TERESHKOVA". http://www.adm.yar.ru/english/section.aspx?section_id=74.