Beatrix Potter
| Beatrix Potter | |
|---|---|
 Potter in 1913 | |
| Minundagan | Helen Beatrix Potter 28 Hulyo 1866 West Brompton, London, England |
| Kagadanan | 22 Desyembre 1943 (edad 77) Near Sawrey, Lancashire, England |
| Kasibotan | Children's author and illustrator |
| Sadiring-tawo | Edmund Potter (grandfather) |
Helen Beatrix Potter (/ˈbiːətrɪks/ BEE-ə-triks; 28 Hulyo 1866 - 22 Disyembre 1943) sarong Ingles na parasurat, ilustrador, natural siyentista, asin konserbasyonista. Bantog siya sa mga librong pang-aki niya na nagtatampok nin mga hayop, arog kan The Tale of Peter Rabbit, na iyo an enot niyang komersyal na napublikar kan 1902. An saiyang mga libro, kaiba an 23 Tales, nagbenta na nin labi sa 250 milyon na kopya.[1][2] Sarong entreprenyur, si Potter sarong payunir nin pangangalakal nin karakter.[3] Kan 1903, si Peter Rabbit an kaenot - enoteng piksyonal na karakter na ginibo stuffed toy na may patent, kaya siya nagin pinakalumang lisensiyadong karakter.[4]
Namundag sa may-kayang harong, si Potter nag-adal paagi nin mga namamahala asin nagdakula na suhay sa ibang kaakian. Dakul siyang ataman na hayop asin nagbakasyon sa Scotland saka sa Lake District, papatalubo nin pagkamoot sa tanawon, mga tanom asin hayop, na gabos ini maingat niyang pigmasdan asin pinagpintahan. An pag-adal asin watercolor kan mga halamang-singaw nagbunga nin dakulang paggalang saiya sa langtad nin mycology. Kan siya mga nasa 30 anyos, si Potter nagsadiring i-publikar an libro na The Tale of Peter Rabbit. Kasunod kaini, si Potter nagpoon nang magsurat asin magladawan nin mga libro kan kaakian na bilog na panahon.
Si Potter nagsurat nin sobra sa anom na polong libro, na an pinakabisto iyo an saiyang bainte y tres na mga istoryang pang-aki. Huli sa mga kwarta gikan sa mga libro asin pamana kan sarong tiyaun, kan 1905 si Potter binakal an Hill Top Farm sa Near Sawrey, sarong baryo sa Lake District. Sa suminunod na mga dekada, nagbakal siya nin dugang pang oma tanganing ingatan an napapalaen na tanawon kan nasyon sa bulod. Kan 1913, sa edad na 47, inagom niya si William Heelis, sarong respetadong lokal na solisitor na may opisina sa Hawkshead. Si Potter saro man ganahun na nagpapalahai nin mga tupang Herdwick asin sarong mayaman na paraoma an interesadong gayo sa pagpreserbar nin daga. Padagos siyang nagsurat, nag-iilustrar asin nagdisenyo nin paninda base sa mga libro niyang pang-aki para sa parapublikar na Briton na si Warne sagkod na an trabahong pagmanehar nin daga saka an pagluya kan saiyang paghiling nagpadipisil saiya.[5]
Si Potter nagadan sa pneumonia asin helang sa puso kan 22 Disyembre 1943 sa saiyang harong sa Near Sawrey sa edad na 77, kaya haros gabos niyang pagsasadiri napasiring sa National Trust. Siya an binibistong nagpreserbar kan kadaklan sa daga na ngonyan iyo na an Lake District National Park. An mga libro ni Potter padagos na nagbenta sa bilog na kinaban sa dakul na tataramon kaiba an saiyang mga istoryang inistorya giraray sa paagi kan mga kanta, pelikula, ballet, asin animasyon, asin an saiyang buhay linadawan sa duwang pelikula asin sarong serye sa telebisyon.
Mga Toltolan
[baguhon | baguhon an source]- ↑ "Leap Into the Surprising, Art-Filled Life of Beatrix Potter in a New Exhibition". https://www.smithsonianmag.com/smart-news/beatrix-potter-peter-rabbit-illustrator-biography-180979756/.
- ↑ "Introducing Beatrix Potter". https://www.vam.ac.uk/articles/introducing-beatrix-potter.
- ↑ "How Beatrix Potter Invented Character Merchandising". https://www.smithsonianmag.com/arts-culture/how-beatrix-potter-invented-character-merchandising-180961979/.
- ↑ "Peter Rabbit blazed a trail still well trod". https://www.thetimes.co.uk/article/peter-rabbit-blazed-a-trail-still-well-trod-c9zdfx2c6nk.
- ↑ Eccleshare, Julia (22 April 2002). "Peter Rabbit Turns 100". Publishers Weekly. https://www.publishersweekly.com/pw/print/20020422/30115-peter-rabbit-turns-100.html.
