Confederadong mga Estado nin Amerika
An Confederadong mga Estado nin Amerika iyo idtong sampolo may saro (11) na mga may-oripon na mga estado na nagsuway sa Estados Unidos asin nagdanay nin apat na taon, poon 1861 abot 1865. An Confederado orihinalmente igwang pitong estado na kaapil- South Carolina, Mississippi, Florida, Alabama, Georgia, Louisiana, asin Texas, na yaon sa bandang Ibabang Habagatan na rona kan Estados Unidos. An saindang rehiyonal na ekonomiya sarig sa agrikultura, partikularmente cotton, asin an sistema nin pagtanom angang gayo sa trabaho nin mga Aprikano-Amerikanong mga oripon. [1]
Kan mangyari an Nobyembreng eleksyon 1860 asin ta si Republikanong kandidato na si Abraham Lincoln an nakaluwas, sarong bagong gobyerno confederado an minukna kan pitong estado kan Pebrero 1861 mala ta dai pa natukaw si Lincoln sa pagkapresidente huli ta soboot an mga polisya kaini laban sa mga interes kan mga taga-Habagat, ta orog na si Lincoln maisog na pigkokontra an paglakop kan kaoripnan sa Amerika. Kan magputok na an Gera Sibil kan Abril 1861, apat pang maykapot oripon na estado sa bandang Itaas nin Habagatan- Virginia, Arkansas, Tennessee asin North Carolina - nagdeklara man kan saindang pagsuway sa Estados Unidos asin nagbali sa Confederado. Dangan duwa pang estado, an Missouri asin Kentucky inako man na kaapil alagad dai man pormalmente nagdeklara nin paglitik o nakapotan na husto kan pwersa Confederado. Mga aninong gobyerno nagngata' makontrol an duwang estado pero napatalsik sinda.[2]
An bagong nasyon na binilog pinamayohan ni Presidente Jefferson Davis asin Bise-Presidente niya iyo si Alexander H. Stephens na matukaw nin anom na taon na mayong re-eleksyon. Tolos ini nagkaag nin mga simbolo kan saiyang soberaniya siring kan sadiring mga selyo asin wagayway na inapod Stars and Bars.[3]
