George Dewey

Si George Dewey

Si George Dewey (Desyembre 26, 1837 – Enero 16, 1917) sarong almirante sa Hokbong Dagat kan Estados Unidos, na nabantog sa saiyang kapangganahan sa Batalya sa Sola' kan Manila durante kan Espanyol-Amerikanong Gera na sinasabing mayo lamang nin napiyerdeng buhay, igwa daa pero nagadan atake sa puso. Siya sana an nagkamit nin titulong Almirante sa Hokbong Dagat sa bilog na historya kan Estados Unidos. An ranggong almirante iyo na an pinakahalangkaw na ranggo sa Hokbong Dagat kan Estados Unidos.

Kaamayan kan buhay

Si Dewey namundag sa Montpelier, Vermont sa magurang niyang si Julius Yemans Dewey asin enot na agom kaining si Mary Perrin. Si Julius sarong doktor na nakamit an saiyang doktorado sa Unibersidad kan Vermont. An ama niyang si Julius saro sa mga kagtogdas kan National Life Insurance Company taon 1848, asin kaapil sa Simbahan Episkopal y saro sa nagporoon kan simbahan na ini sa Montpelier. Si George binunyagan asin nagpoon pagklase igdi. Igwa siyang tolong tugang, saro kani babae.

Pag'aagom

Kan siya natoka sa navy yard kan Portgsmouth, New Hampshire, nasumpongan niya an saiyang nagin agom, si Susan "Susie" Boardman (1844-1872), aki kan gobernador sa New Hampshire na si Ichabod Goodwin., sarong Demokrata na nagsangkap sa mga tropa para sa gera hale sa saiyang sadiring bulsa. An mag'agom kinasal kan Oktobre 24, 1867 asin nagkaaking sarosaro, si George Goodwin Dewey (Desyembre 23, 1872- Pebrero 10, 1963). Si Susie nagadan kan Desyembre 28, 1872, limang aldaw pakapangaki. Kan Nobyembre 9, 1899 nakasal pa siya ki Mildred McLean Hazen, alagad dai naman nag'aki asin an agom niyang ini nagadan sa pneumonia kan 1931..

Edukasyon

An hubin na Dewey nagklase sa kataid na banwaan na Johnson. Kan siya 15 anyos nag'entra siya sa Norwich Military School. An eskwelahan na ini, mas bisto sa pangaran na Norwich University, pinagtogdas ni Alden Partridge sa katuyohan na magtao nin sangkap asin hararom na edukasyon militar. Si Dewey nag'entra igdi nin duwang taon (1852-1854) asin ta sinasabing nakua niyang modelong saiyang tinitingag na gayo iyo si Hannibal.

Mga poon na ginunoan

• Dewey, George. Autobiography of George Dewey, Admiral of the Navy (1913) bilog na teksto online sinurat sa pakikitabangan kan peryodistang si Frederick Palmer bilang anonimong tagasurat na binase sa mga report ni Nathan Sargent, sarong kabwan ni Dewey.

Mga panluwas na takod

• biograpiya ni Dewey manongod kan Espanyol-Amerikanong Gera na Centennial Website - kairiba an mga takod sa magkapirang surat ni Dewey.
• ki Dewey na biograpiyang impormasyon sa Naval Historical Center na websayt