Angkan nin Imperial
An Imperial saro sa mga angkan nin pulitiko sa Albay, Pilipinas. An mga Imperial an saro sa nagkontrol kan poder bako lang sa probinsiya kan Albay kundi maging sa bilog na Kabikolan. an mga notadong miyembro kan angkan iyo sinda Carlos Imperial na nagsirbi bilang Kongresman kan Albay poon 1907-1909 asin naging Associate Justice kan Supreme Court kan 1931; si Leoncio Imperial na naging gobernador kan Albay kan 1913-1916 asin Senador poon 1917-1922; Domingo Imperial na naging Senador poon 1934-1935 asin 1942-1946; Jose Imperial na naging gobernador kan Albay poon 1934-1937.
An mga Imperial sinasabing mga illustrado na may dugong Kastila asin Intsik. Kan panahon kan rebolusyon, saro sinda sa mga nakisumaro para labanan an mga Kastila. An ama ni Carlos na si Paciano Imperial naging Secretario Provincial sa rebolusyunaryong gobyerno kan Albay na pinangengenotan ni Gobernador Anacleto Solano samantalang an ama naman ni Domingo na si Elias Imperial naging Councilor of Revenue sa nasambit na rebolusyunaryong gobyerno.
Ang dinastiyang pulitikal kan mga Imperial ipinagpadagos kan mga aki ni Domingo Imperial. Kasabay na diyan an saro sa pinakahaloy na Kongresista kan Bikol na si Carlos "Papay" Imperial na nagsirbi bilang representante kan Segundo Distrito kan Albay poon 1965-1972, Assemblyman kan 1978-1984, asin Kongressman giraray poon 1987-2004. An saiyang torno naputol dahil sa limitasyon kan termino kaya an saiyang agom na si Norma Imperial an nag-okupar kan puwesto niya bilang Kongresista kan 1998-2001.
An iba pang miyembro kan angkan kan mga Imperial na nasa puwesto iyo sinda Harold Imperial na Bise-Gobernador kan Albay (2010-2013) asin an aki ni Papay na si Niño Imperial na Bokal kan Segundo Distrito (2010-2013).
Mga pulitiko kan angkan[baguhon | baguhon an source]
- Carlos Imperial - Kongresman kan Albay poon 1907-1909
- Leoncio Imperial - Gobernador kan Albay, 1913-1916 asin 1922-1924; Senador kan Filipinas, 1917-1922
- Domingo Imperial - Senador kan Filipinas, 1934-1935 asin 1942-1946
- Jose Imperial - Gobernador kan Albay, 1934-1937
- Felix s. Imperial - Gobernador kan Albay, 1972-1986
- Norma Imperial - Kongresman kan Segundo Distrito kan Albay, 1998-2001
- Carlos D. Imperial - Kongresman kan Segundo Distrito kan Albay, 1965-1972 asin 1987-1998; Assemblyman kan Interim Batasang Pambansa poon 1978-1984
- Gregorio Imperial Jr. - Alkalde kan Ciudad nin Legazpi
- Benjamin Imperial - Alkalde kan Ciudad nin Legazpi
- Harold Imperial - Bokal kan Segundo Distrito kan Albay, 2004-2010; asin Bise Gobernador kan Albay, 2010 - ?
- Michael Imperial - Konsehal kan Ciudad nin Legazpi, 2001-2004
- Nino Imperial - Bokal kan Segundo Distrito kan Albay, 2010 - ?
- Gerald Carlo Imperial-SK Chairman kan Albay-2011-present.
