Jesse James
| Jesse James | |
|---|---|
 Jesse James c. 1882 | |
| Kamundagan | Jesse Woodson James Septyembre 5, 1847 Kearney, Missouri, Estados Unidos |
| Kagadanan | Abril 3, 1882 (edad 34) St. Joseph, Missouri, Estados Unidos 39°45′28″N 94°50′39″W / 39.757813°N 94.844087°W |
| Nasyunalidad | Estados Unidos Confederadong mga Estado nin Amerika |
| Trabaho | Kriminal |
| Mga taon na aktibo | 1866–1882 |
| Midbid bilang | Para'bon sa mga tren asin mga bangko |
| Agom | Zerelda Mimms |
| Mga aki | Jesse E. James, Mary James Barr |
| Mga magurang | Robert S. James, Zerelda Cole James |
Si Jesse Woodson James (Septyembre 5, 1847 – Abril 3, 1882) sarong Amerikanong bandido, gerilya, lider nin gang, parahâbon sa bangko asin sa tren asin murderer sa estado nin MIssouri. Siya an mas bantog na myembro sa James-Younger Gang.[1]
Si Jesse asin an saiyang tugang na si Frank James pareho mga gerilyang Confederado o inapod sa Ingles na 'bushwhackers' durante kan Gera Sibil. Sinda soboot nadamay sa mga panggugulpi sa mga soldados kan Unyon, orog na sa inapod na Masaker Centralia. Pakatapos kan gera, bilang kaapil sa magkakapira asin man'iba-ibang grupo nin mga bandido, sinda nagparapanhipa' sa mga tren asin mga karomata asin nanga'bon sa mga bangko. .[2]
An magtugang na James aktibo bilang myembro sa sadiring grupo asin nangawat na husto kan mga taon pag'oltan 1866-1876 na kun saen sa pagngata' na hâbonan an sarong bangko sa Northfield, Minnesota, magkapirang kagrupo an nasikop o nagadan. Nagpadagos sinda sa saindang krimen nin magkapirang taon, na nagtitipon nin mga bagong myembro alagad yaon na sa kamugtakan na sobra na sindang naiipit sa paglalapag sainda kan mga awtoridad. Kan Abril 3, 1882, si Jesse James na badil-gadan ni Robert Ford, kaapil mansana kan saiyang grupo, na naglaom na makakolekta nin premyo kun maentrega niya an payo ni James sa namomoon. Saro nang bantogan kan buhay, si James orog na nagin pigurang orosipon sa Wild West kan siya gadan na.[3]
Dawa daa si James nalaladawan na popular na pigura komo sarong Robin Hood, na an hinahabon pinapartihan an mga tios, mayo man ebidensya na siya o an saiyang grupo hinihirasan an siring na mga dukha kan saindang mga nahâbon. Poon 1860 abot 1882 an James Gang iyo an tinatakotan nanggad na mga bandido sa historya kan Amerika. An grupo responsable sa sobrang 20 panghahábon sa mgs bangko asin mga tren asin sa panggagadan sa mga tawong nasasabatan asin nakakaulang sainda sa harabonan na ginigibo ninda. Lampas $200,000 an pigtutubod na saindang nahabon. Sinda sarong leyenda kan panahon ninda, popular sa Missouri sa saindang paghingoa na matolod an kawsa kan Confederado.[4]
An mga iskolar hinihiling an saiyang mga gawe-gawe sa konteksto nin sarong rehiyonal na pagtutumang nin mga Confederado pakatapos kan Gera Sibil, bako bilang resulta kan inhustisya ekonomiko o pagbabandido sa pwera.
