Lamesa

An lamesa sarong gamit na parte kan mga muwebles na may patag na sapawan asin may mga "bitis" saro o magkapirang pedaso, na ini ginagamit sa pagtrabaho sa ibabaw kaini, nagkakakan sa ibabaw kaini o kaagan o bugtakan nin mga bagay-bagay.^[1]^[2] An mga tipo nin mga komun na mga lamesa iyo an lamesang kakanan, na gamit kan mga tawo sa pagkakan; lamesang kapehan, na ini hababa sanang lamesa sa sala na displeyan mga gamit-gamit o sa pagserbi nin mga represko sa bisita; asin an lamesang pangkatre kaagan nin relo asin lampara. Kadakul pa man iba-ibang klaseng lamesa na espesyal an gamit arog kan drafting table gamit sa pagdrowing sa arkitektura o sa pagtatahi.

Mga desenyong komun makukua sa mga lamesa:

mga sapawan na manlaen-laen na hitsura o porma, rektangular, kwadrado, talidong, matabilog.
mga "bitis" na padis-padis. May apat na parating bitis. Alagad, an iba may tolong bitis, may sarong pedestal o nakatakod sa lanob.
mga iba-ibang desenyo sa lamesa na pwede ining turu-tiklop na pwedeng dara-darahon kun saen-saen.
mga langkaw kaini na pweding 18 abot 30 pulgada, na nagsusunod sa taas kan langkaw nin tukawan o bangko' na ginagamit sa pagtukaw kun may kinukuti-kuti sa ibabaw kan lamesa.
sa pagkadakula manlaenlaen an pagkagiribo kaini, poon sa sadit na pangtaid sa higdaan, abot sa haralabang lamesang kakanan sa komedor, abot sa mga lamesang haralabaon gamit sa mga kumperensya.
ini pwedeng igwang mga sulong o pitak-pitak sarayan nin mga mahalagang gamit.
igwa man mga lamesa na may mga natitipig na sapawan sa gilid ngani dumakula an hiwas na kakaagan o trabahuhan.