Monarkiya

Richard I kan England na anointed durante kan saiyang koronasyon sa Westminster Abbey, gikan sa 13th-century chronicle.

An monarkiya (Espanyol: monarquía) iyo an sarong porma nin gobyerno na an kahoro-halangkaweng poder iyo an biyo o naturingang ibinubugtak sa sarong indibidwal, an namamayo kan estado, na parating panghabambuhay o sagkod na magbutas, asin "bilog ining isusuhay gikan sa gabos na kaapil kan estado." Inaapod na monarko an namamayo sa monarkiya. Ini an karaniwan na porma nin gobyerno sa kinaban kan daan asin katahawan na panahon.

Dating pangkaraniwan na klase nin gobyerno an monarkiya sagkod sa ika-19 siglo, alagad bakong lakop sa presente. Kun saen man ini ginagamit sa presente, parating monarkiyang konstitusyunal an pinapagdanay, kun saen an nagmamantinir an legal asin seremonyal na papel kan monarkiya, alagad limitado o mayong poder pampolitika: sa irarom nin nasusurat o dai nasusurat na saligang batas, an iba man iyo may poder na mamayo.