Armenta Sabas

Si Armenta Sabas (5 Enero 1879 - 19 Sept. 1949 ) sarong Bikolanong parasurat asin an kagsurat kan Comedia ni Hadeng Grimaldo sa Reinong Irlanda.

Nagadal sa Seminario Conciliar de Nueva Caceres asin haros magin padi na kundi nagluwas ta susog sa aki niyang si Florencia, "iirikan na sanang gayo."

Maray magsurat sa Bikol asin Kastila man, binikol niya an Noli Me Tangere, El Filibusterismo asin Mi Ultimo Adios, gabos mga tokda' ni Jose Rizal. Apisyon an magsurat, siya nagtokda' man nin mga rawitdawit, mga drama, asin mga plusa.

Nagin siyang sekretaryo ki Padre Feliciano Puertollano, an kura paroko kan Magarao, Camarines Sur kan mga panahon na idto.

Sarong abilidad pa niya, romdom kan aki niya, iyo an pagbabahon sarong soanoy na kaugalean sa Magarao kun namamalahi an pamilyang kaglalaki sa pamilya kan babae. An parabahon iyo an kwenta parataram kan kaglalaki na katampad man an parabahon kan kagbabae. Sindang duwa iyo an enot na nagoolay-olay sa pagsabatan kan duwang pamilya asin an gabos na ingi'nu'nguso anas inaagi sa rawitdawit. Igdi sa bagay na ini, mahusay an ama niya, sabi ni Florencia.

Sabi kan aki niyang si Florencia, siya aktibo sa mga aktibidades sa banwaan asin hilig magtokdo' sa mga aki asin sa mga gurang pa ngane na gustong makanood. Madonong asin maki-amigohon, siya midbid kan mga prominenteng tawo sa Magarao saka sa Naga.

Kan idinapit siya sa paglubong, kadakulon an nakilubong ta siya binibisto na saro sa lataw na tawo asin apresyadong gayo kan banwaan.

Mga hihilngan

• Bikol Literature in the Philippines ni Maria Lilia Realubit
• Filipinos writing: Philippine literature from the regions‎ ni Bienvenido Lumbera

Ginonoan

• Pahayag asin osipon ni Florencia Sabas, aki ni Armenta Sabas (1976).