Simbahan Katoliko sa Indonesya

An Simbahan Katoliko sa Indonesya (Indonesyo: Gereja Katolik di Indonesia) iyo an parte kan pankinàban na Simbahan Katoliko, sa irarom kan ispiritwal na liderato kan Papa sa Roma. An Katolisismo iyo an saro sa anom na aprubadong relihiyon sa Indonesya, an iba iyo an Islam, Protestantismo, Hinduismo, Budismo, asin Confucianism. Susog sa opisyal na pigura, an mga Katoliko pigbibilog kan 3.12 porsyento kan populasyon kaidtong 2018. An bilang kan mga Katoliko, kun siring, labi sa 8.3 milyon. Sa pangenot sarong Muslim na nasyon an Indonesya, alagad an Katolisismo iyo an dominanteng pagtubod sa syertong lugar kan nasyon.

An Katolikong Katedral sa Ende, Flores.Dakol sa nakaistar sa Flores mga Katoliko.

Saint Joseph's Catholic Church, Denpasar, Bali

An Simbahan organisado sa 10 arsodiosesis asin 27 diosesis, gabos myembro kan Indonesian Catholic Bishops Conference (KWI) na pigpapamayuhan ni Arsobispo Ignatius Cardinal Suharyo Hardjoatmodjo. Igwa nin nagkapirang Catholic religious institutes na aktibo sa nasyon kabali an mga Heswita, an Missionaries of the Sacred Heart (MSC) asin Divine Word Missionaries.

Nagpoon an Katolisismo sa Indonesya sa pag-abot kan mga Portuguese sa paghanap kan Spice Islands kaidtong ika-16 na siglo. Sa ngunyan, an Subangan na Nusa Tenggara iyo an solamenteng probinsya sa Indonesya na kun saen an Katolisismo iyo an mayorya, haros 55% kan saiyang populasyon. Igwa man nin signipikanteng populasyon nin Katoliko sa Amihanan na Sumatra, Solnopan na Kalimantan, Habagatan na Papua, Habagatan na Sulawesi, Maluku asin Central Java, urog na sa laog asin sa palibot kan Muntilan.