Luis Ortega

Ladawan:Luis orteda - Copy.jpg

Si Luis Ortega

Si Luis Agregado Ortega (namundag Oktobre 9, 1937) sarong dating konsehal kan Syudad nin Naga (1985-1992) asin saro sa nagin Barangay Chairman sa San Felipe poon 1965 abot 1972. Nagkandidato siyang para alkalde kan eleksyon nin Mayo 2013 alagad dai nakaluwas.

Pamilya asin edukasyon

An saiyang ama iyo si Fructuoso Bragais Ortega asin an saiyang ina iyo si Emilia Ayen Agregado. Si Antonieta Naldo-Terceño an saiyang napangagom, sarong gradwado sa Unibersidad kan Santo Tomas. Sinda igwang pitong aki, na iyo sinda: Melba, Selpha, Louise Marie, Antonia Consejo, Margarita, Luz Matilde asin Luis Jesus.

Sa elementarya, siya nag'entra sa Naga Central School, nagkua kan sekundarya sa Camarines Sur National Highschool na nakamit may honor. Dangan kaini sa Unibersidad kan Nueva Caceres kinua niya an Bachelor of Science sa Business Administration, major sa Management asin Finance.

Karera

Sa Vicki's Academy, nag'enrol siya sa stenography asin typing asin an kaaraman na ini iyo an nagtao saiyang enot na trabaho bilang stenographer sa municipal council kan Naga poon 1955 abot 1959.

Sunod na trabaho iyo an maempleo asin matoka sa accounting department kan Government Service Insurance System (GSIS). Igdi an trabaho niya nagpoon taon 1965 sundo 1972.

Kan siya Bgy. Chairman sa San Felipe maigot na pigparapatanom niya sa mga residente sa mga loteng bakante mala ta dakul na maray an nagusing mga gulayon. Siya man an nagmato asin nagpara-patraining sa mga aki sa Little League Baseball na nasikwit an kampeonato duman sa Yuyugi Olympic Center duman sa Tokyo, Hapon. Siya man an nagkapot kan Chess Center sa may Plaza Quezon asin duman dakul an natais sa kawat na chess mala ta magkapira an nagin national master arog ki Llavanes asin Espiritu huli sa saiyang suporta. Siya posikit man na nagsanggawad sa pagpatraining kan mga may interes sa Martial Arts mala ta pirang entri kan Naga duman sa National Martial Arts Tourtnament na inaamaan kan Philippine Karate Association an nagin kampeon arog ki Orlando Condino, Nick Oriño, Leonardo Rañola, Aureo Barcoma asin Alex Cervallos.

Siya naglaog man sa negosyo nin transportasyon mala ta may 16 siyang mga mini-bus na nagbyaheng Naga-Daet (1976-1991). Katakod kaini, an terminal na mantenido niya enot yaon sa lote ni Abella na iyo na ngonyan an namomogtakan kan Aristocrat Hotel (1976-1981). Dangan naglipat sa solar kan nasulong kapitolyo probinsyal (1981-1990)) alagad kan nagpatugdok na igdi kan edipisyo nin Land Bank naghubo siya sa bakanteng lote ni Alvarez (1990-1992) diyan sa may Kalye Padian. Paglaog kan taon 1992, ipinaluwas an gabos na terminal asin ikinaag sa CBD2 ta nagpipiriot na sa laog kan sentro asin sa dai tinutuyong kamugtakan, napakarhay na gayo an napiling lugar kan SM-Naga. Masabi pa, an polisyang ini apektadong gayo an negosyo niya asin kan ibang mga operador nin terminal arog ki Salvador Borja, Orlando Tan (na may sadiri kan Orbe Line) asin iba pang nag'ooperar nin terminal sa laog kan sentro nin siyudad.

Pagkontra sa nombramiento ni Robredo komo Sekretaryo kan DILG

Siya bantog bilang sarong oposisyon sa administrasyon kaidto ni Jesse Robredo asin ngane igwang tolong (3) kaso siyang isinangat laban sa nasabing alkalde. Kan si Robredo yaon sa proseso nin pagrebyu asin pag'aprobar kan Commission on Appointments sa saiyang nombramiento bilang Sekretaryo nin Interior asin Gobyerno Lokal, si Ortega an nagbangga huli sa mga isina'ngat niyang mga kaso nin graft asin korupsyon sa opisina nin Ombudsman kontra ki Robredo na dai pa nadedesisyonan asin pasige pa. Nasambit niya pa na si Robredo kan buhay pa, nag'aatubang sa sobrang 50 kaso na isinangat ni Emilio Aguinaldo, sarong dating konsehal sa Naga na biglang nawara asin dai maisihan kan pamilya kun gadan na o dinukot.

Sa pagbangga ni Ortega kan opisyal na kumpirmasyon kan Commission on Appointments saro sa dakul na isyu ibiniklad niya sa komisyon iyo an dai pagbuyagyag ni Robredo sa saiyang SALN an pagrorogaring niya sa sarong condo unit, an unit No. 15D sa proyektong condominium ni Rodolfo R. Guinhawa, saro man na taga-Naga, na nalulugar sa address na "20 Landsbergh Place in 170 Tomas Morato Street, Quezon City". Ini totoo pigpahimutikan ni Abogado asin konsehal Nelson Legacion, ngonyan bise-alkalde na, na sinabi niya an condo unit nakapangaran bako ki Robredo kundi sa saiyang gurang nang ina na si Marcelina Manalastas Robredo asin sa ngohod niyang tugang na si Dra. Jocelyn Robredo-Austria na nag'eestar sa Estados Unidos.

Katakod kaini, si Ortega nagsumitir pa nin sarong xerox kan surat hale sa House and Land Use Regulatory Board (HLURB) kun saen inaako an sarong surat hale man ki Rodolfo R. Guinhawa, presidente asin chief executive officer kan 24k Development and Construction Corporation, an developer kan nasabing condominium, kun saen an surat na ini ni Guinhawa nagpapaaram na ipapahirahay an unit na rogaring kan sarong tawong nag'ngangaran Jesse Robredo.

Mga kasararoan

Nagin siyang presidente kan Naga City Drivers Association (1955-1971), nagin man siyang Chairman kan Boys Scout of the Philippines (1948-2012), asin charter member kan Rotary Club of Naga East. Saro man siya sa nagin Deputy Grand Knight kan Knights of Columbus, St. John the Evangelist Council 5433.