Jump to content

Computer Science High School of Bicolandia

Gikan sa Bikol Sentral na Wikipedia, an talingkas na ensiklopedya
Pagbabago puon kaitong 03:20, 13 Agosto 2023 ni Ralffralff (urulay | ambag)
(iba) ← Mas luma | Presenteng pagbabago (iba) | Mas bago → (iba)
Computer Science High School of Bicolandia
Halangkaw na Paadalang Pang-Kompyuter na Siyensya nin Kabikulan
Dating ngaran
Bicolandia ICT-Oriented High School (2008)
MottoExcellentia et virtus ultra
Pagkakamuknâ2008
TipoPang-impormasyon asin pangkomunikasyon teknolohikal (ICT) na sekundaryang paadalan, Pangangataman nin unibersidad (2008-2015)
PrinsipalEva J. Barcia
KinamumugtakanCBSUA Main Campus, San Jose, Pili, Camarines Sur
Mga kolor nin eskwelahanBerde      asin Giyaw     

An Computer Science High School of Bicolandia, o bistado man sa halipot na kaapudan na CSHSB, iyo sarong pang-impormasyon asin pangkomunikasyon teknolohikal (ICT) asin junior na eskwelahang pansekundarya na mahihiling sa kapitolyo-banwaan kan Pili, Camarines Sur.

Namokna kan 2008, nagligad ining nag-operar sa pangangataman kan Central Bicol State University of Agriculture sagkod 2015. Sa ngunyan, ini iyo sarong pampublikong institusyon na may espesyal na kurikulum na ICT.

Uusipon

[baguhon | baguhon an source]
An primerong batch kan paadalan sa taong 2008

Namokna an Computer Science High School of Bicolandia kan taon 2008 sa ri'gon kan R.A. 10284 sa Kongreso kan Filipinas.[1] An nagligad kaining pangaran iyo an Bicolandia ICT-Oriented High School asin pag-abot kan pirang bulan puon kan pagkamokna kan eskwelahan tulos man pigribayan an pangaran gamit an presenteng ngaran kaini.

An nagligad na Kongresman sa Tercer Distrito kan Camarines Sur na si Luis R. Villafuerte an binibistadong ama kan eskwelahan. Ini nagibo sa pakikipag-tabangan niya sa pinaka-enot na presidente kan Central Bicol State University of Agriculture bilang unibersidad na si Atty. Marito T. Bernales.[2]

Sa tabang kan nagligad na alkalde na si Alexis San Luis, pig-imbitaran an mga kakagradwar pa sana sa elementarya, urog na si may mga onra, sa banwaan nin Pili, Camarines Sur na magkua nin eksaminasyon kan taong 2008 sa nasambit na bagong paadalan. Sisenta (70) na estudyante an orihinal na plano na kuanon hasta ngani nagdugang nin duwa, kaya igwang sisenta y dos (72) na estudyante an pioneer batch kaini.

Resipyente nin libreng edukasyon asin mga dugang pang benepisyo an mga enot na estudyante kan eskwelahan. Ini hale sa tabang kan dating Kongresman na iyong kagtugdas man kan eskwelahan. An mga enot na seksyon igwang ngaran na "I-Unity" asin "I-Harmony". Kan taong 2009 puon piggamit an presenteng edipisyo kan eskwelahan asin an pag-gamit kan mga seksyon na nagpupuon sa letrang "A" asin "P". Igwa nin duwa o tolong seksyon kada grado an eskwelahan puon pa kan pagkamokna kaini hasta sa ngunyan.[2]

Nasa kapot kan unibersidad an eskwelahan sa laog kan pitong taon. Enot napasairarom ini sa Institute of Arts and Sciences (ngunyan an College of Arts and Sciences), asin pigbalyo sa pangangataman kan College of Development Education kan taong 2011. Sa taon nin 2012, nakagradwar an enot kaining mga estudyante.

Taon nin 2015 kan pigbalyo an pangangataman kan CSHSB sa Departamento kan Edukasyon. Asin sa pag-implementar kan K to 12 Basic Education Program kan Administrasyong Aquino, dagos na nagin junior high school an eskwelahan puon kan taong 2015.

Mga Klase

[baguhon | baguhon an source]

Paglaog

[baguhon | baguhon an source]
CSHSB Main Building

Sa presente, popular an CSHSB bilang minamawot na eskwelahan kan mga gradwar nin elementarya gikan sa banwaan nin Pili, Camarines Sur asin iba pang mga banwaan kan Camarines Sur. Kinakaipuhan kan eskwelahan na makapasar sa eksaminasyon asin interbyu an mga aplikanteng estudyante. An mga makakapasar iyo an mga masunod na estudyante para sa Ikapitong Grado sa seksyong 7-Symbian, 7-Oracle, asin 7-Android.[3]

Seksyon

[baguhon | baguhon an source]

Puwera sa Ikapitong Grado na igwang tolong (3) seksyon, an ibang grado lebel igwang kag-duwang (2) mga seksyon.[4] An presenteng ngaran kan mga lambang seksyon kada grado lebel nakalista sa ibaba.

Grado 7 Grado 8 Grado 9 Grado 10
7-Symbian 8-Redhat 9-Solaria 10-Chimera
7-Oracle 8-Unix 9-Fedora 10-Linux
7-Android

Kurikulum

[baguhon | baguhon an source]

Igwang kurikulum na ICT an eskwelahan kun sain pigtutukdo an Computer Programming, Computer Animation, Computer Networking, Computer Troubleshooting, Web Development, asin iba pang manunudan sa kompyuter. May duwang air-conditioned na laboratoryo an eskwelahan kun sain may 1:1 na student-computer ratio ini.

Itinutukdo an mga normal na asignatura arug kan Ingles, Matematika, Siyensya, Filipino, Social Studies, Values Education, asin MAPEH (Musika, Arte, Edukasyong Pisikal, asin Salud). Manunudan man an Teknikal na Pagsurat, Estadistiko, asin halangkaw na katukduan sa Matematika asin Siyensya.

Pig-eengayo man digdi an iba pang kakayahan arug kan pagluto, pagkanta, pagbayle, isports, asin iba pa.

Mga panluwas na takod

[baguhon | baguhon an source]
An Wikimedia Commons igwa nin medya dapit sa Computer Science High School of Bicolandia.

Toltolan

[baguhon | baguhon an source]
  1. ↑ Juris, The Corpus (2012-11-14). "R.A. No. 10284: An Act Establishing an Information and Communications Technology High School in the Municipality of Pili, Province of Camarines Sur to be Known as the Computer Science High School of Bicolandia and Appropriating Funds Therefor". The Corpus Juris. Pighugot kan 2020-03-28.
  2. ↑ 2.0 2.1 http://cshsb.blogspot.com/2014/01/computer-science-high-school-of.html Pighugot kan 2020-03-28
  3. ↑ St, Bicol; ard. "Computer Science High School of Bicolandia announces entrance exam sked". BICOL STANDARD | Bicol News. Pighugot kan 2020-03-28.
  4. ↑ "Computer Science High School of Bicolandia". www.facebook.com. Pighugot kan 2020-08-05.


Kinua sa "https://bcl.wikipedia.org/w/index.php?title=Computer_Science_High_School_of_Bicolandia&oldid=254224"