Abandonadong erokan

Plymouth, Montserrat ini sana an abandonadong banwa na kabisera nin modernong teritoryo politikal.

An siyudad nin Pripyat sa Ukraine inabandonar kan magkaaksidente sa planta nuklear sa Chernobyl

An Aghdam luway-luway hinahamil kan kadlagan pakalihis 17 taon kan ini binarayaan; dati 40,000 an populasyon igdi.

An abandonadong erokan (binarayaan nang siyudad) pwedeng dapit sa sarong abandonadong baryo, banwaan o siyudad na igwa pa man natatadang mga nagkawaralat na mga edipisyo asin impraestruktura siring kan tinampo o mga palo sa elektrisidad. An sarong banwaan o siyudad nagigin abandonado parati huli ta an aktibidad ekonomiko na nagsusuportar igdi (parati industriyal o agrikultural) nagkalugi-lugi na o napondo na sa anoman na rason (hlbw., minahan na naubusan na nin mga bita nin bulawan). An banwaan pwede man nagro'ro' huli sa natural o sala-nin-tawong kawsa siring kan makuring baha, halawig na paltik, makuring init o lipot, aksyon nin gobyerno, dai maampat na mga krimen, gera, polusyon o aksidenteng nuklear. An termino pwede mapapadapit sa sarong banwaan o erokan na, maski may mga residente pa, grabe na an nawara' o naina' sa populasyon, kumpara kan mga nakaaging taon; halimbawa, nagharale na ta apektado kan halangkaw na lebel nin pagkawara nin oportunidad sa trabaho.

An ibang abandonadong erokan na nakasaray kan mga arkitekturang takod sa historya, nagin atraksyon sa mga turista. Mga halimbawa kaini iyo an Bannack, Montana, sa Estados Unidos, Barkerville, British Columbia, sa Kanada, Craco sa Italya, Aghdam sa Azerbaijan, Kolmanskop sa Namibia, Pripyat sa Ukraine, Dhanushkodi sa Indya asin Fordlândia sa Brasil.

An Plymouth sa Islang Caribbean nin Montserrat abandonadong siyudad gibo kan labilabi natambonan nin laboy asin lahar kan magtuga an Bulkan Soufrière Hills kan 1995 alagad de jure iyo ini an kabisdera nin Montserrat. Sagkod ngonyan abandonado pa ini asin dai ini-erokan.