Antonio Pigafetta

Gikan sa Bikol Sentral na Wikipedia, an talingkas na ensiklopedya
Si Antonio Pigafetta
An sinunod na ruta na Magellan

Si Antonio Pigafetta (c. 1491 - c. 1534) sarong aristokrata na Veneciano namundag sa Vicenza. Siya nagbayad nin mahal ngane makaiba sana asin makatabang sa Portuges na kapitan na si Fernando de Magallanes asin kan saiyang mga tripulanteng mga Kastila sa saindang paglayag pasiring sa Mga Isla nin Maluku.

Daing gayo malinaw kun ano an agi-agi sa buhay niya kan siya sadit pa. Alagad, narekord na kan 1515, siya sarong konde na myembro sa Order of St. John of Jerusalem, na nakabase sa Isla nin Rhodes, sa Miditerraneano. Pwede ser daa na komo sarong soldados, naagihan niya an pakikisagupa sa mga enkwentro laban sa mga Turko.

Kan siya nagpa-Espanya, natongod man na gayo na pighahanda an ekspidisyon ni Magellan pasiring Solnopan sa pag'dangtol pa-Oriente ta an katuyohan maghanap nin mga rekado (spices) na minmawot na gayo sa Europa. Naghagad siya nin permiso ki Hadeng Carlos kan Espanya na maka-iba sa sinabing ekspidisyon.

Sa paglayag asin sa pagbyahe ninda, aro-aldaw sinusurat niya an gabos na namasdan niya asin nadumanan asin kun anong mga nangyayari. Huli sa pagtala niya, naisihan kan bilog na kinaban an mga adbentura na Magellan asin na Elcano sa paglibot sa kinaban.

Nakatala man sa saiyang sinurat na diario an pinaka-enot na deskripsyon kan sarong tataramon igdi sa Filipinas, an Cebuano.

Hale sa pighuhuna na 250 katawo, asin 5 bapor, na naglayag kaiba si Magellan kan 1519, si Pigafetta saro sa 18 na sana na nakabalik sa Espanya kan taon 1522, na nahimo nanggad an paglikos sa Kinaban pero sa irarom na kan pamamayo ni Juan Sebastian Elcano, ta si Magellan nagadan (Abril 21, 1521) duman sa sagupaan ka Lapu-Lapu sa isla kan Mactan, Filipinas. An bapor na Victoria na sana an nakapuli' sa Espanya.

Si Pigafetta ipinalagda niya an saiyang diario kan 1523, sangkap kan mga mapa kan saindang nadumanan pero totoo sa tataramon na Italyano asin man pinalis sa Pranses kan ibang mga parasurat.

Mga Panluwas na Takod[baguhon | baguhon an source]

  1. Buhay-buhay ni Antonio Pigafetta [1]
  2. Retrato kan mga 18 Naglugsad sa Bapor- http://cvc.cervantes.es/actcult/museo_naval/sala8/personajes/personaje_13.htm
  3. Buhay ni Ferdinand Magellan [2]
  4. An pagkagadan ni Magellan [3]

Toltolan[baguhon | baguhon an source]

  1. Magellan's Voyage: A Narrative Account of the First Circumnavigation. Antonio Pigafetta. Patrician of Venice and Knight of Rhodes. American Heritage. Oct. 1969. Vol. XX. No. 6. pp. 64-75.