Bikolana (magasin)
An Bikolana sarong magasin (Septyembre 1978 - 1979?) na pagsasadiri ni Monico Imperial, Sr. na pinupublikar kaidto sa Syudad nin Naga. Ini nakasurat sa lenggwaheng Bikol asin Ingles, asin may opisina sa nu. 43 Dayangdang St., Syudad nin Naga, Filipinas.
An pamayong editor kaini iyo mansana si Monico L. Imperial, an tagapamahalang editor iyo si Ernesto K. Imperial, asin an Manila Bureau Chief iyo si Titong K. Imperial. Mga Senior Editors na tagapakaray kan magasin iyo man sa Choleng Dato-Hidalgo, Connie K. Imperial, Juan M. Sismundo asin si Eddie R. Imperial.
Parati an magasin naglalaman nin mga artikulong kultural, mga kontribusyon manongod sa historya, mga rawitdawit, mga halipot na osipon na haros gabos nakasurat sa Bikol. An seksyon sa Ingles napapano sa baretang pulitikal asin sa mga presenteng pangyayari, mga artikulo sa turismo asin dapit sa agrikultura.
An mga regular na tagaambag niya nin mga artikulo iyo sinda Romy Karingal, Vicenta Reyes Gapas, Itos Briones, Antonio Manaog, Francisco Magnaye, Gene Balfermoso, Evelyn Rivera, Ernie Verdadero, asin si Dads Silvestre II.
An sukol kan magasin 9 na pulgada por 12 pulgada asin parati nabilang an pahina kaini nin sobra sa 40. Naggagamit nin newsprint pero an takop mahalnas asin mahibog na papel. Binibenta nin sarong piso an sarong kopya.
