Bwakaw

Gikan sa Bikol Sentral na Wikipedia, an talingkas na ensiklopedya
Jump to navigation Jump to search


An Bwakaw sarong komedya-dramang pelikulang Filipino kan 2012 na sinurat asin pigdirihe ni Jun Lana. Si Eddie Garcia iyo an nagbida bilang sarong po'ngawon na bakla' nagngangaran Rene edad nang 70 na nag'aataman nin sarong salampay na ayam nginaranan niyang bwakaw. An pelikula enot na pinadalan bilang parte kan 2012 Cinemalaya Philippine Independent Film Festival kun saen nagin kabtang kan Director's Showcase roster.[1]

Plot[liwaton | liwaton an gikanan]

Si Rene sarong bakla' na naglantad kan siya gurang na sa edad na 60. May mate-mate na, sa saiyang pasolnop nang mga taon huna-huna niya huri nang gayo na maghanap pa nin pagkamoot, o maski na sana kadamay sa buhay. Mayong ibang pinaghahalat na sana niya kundi Kagadanan. Guminibo siya nin huring testamento na pinapamana niya an dikit niyang mga ro-rogaring sa dikit mansana niyang mga amigo. Gabos paratos na, may mga pangaran lambang saro kun kiisay mapapaduman oras na siya bawian-buhay. Namakal na ngane siya nin kabaong sa punerarya kan ini magtaong diskwento sa Summer Sale. An saiyang kaiba-iba sa aldaw mayong iba kundi an ayam na si Bwakaw, sarong ayam na baray-basay asin nagsampid na saiya asin sunod-sunod saiya kun saen man siya magduman. Manta na si Rene naghahalat sa saiyang kagadanan, nabigla siyang si Bwakaw pa an nagkahelang, asin sa kanser pa. Igdi siya nakagamiaw na may hararom na pagmakulog man pala siya sa ayam asin padangat niya man pala. Sa saiyang pagkapo-kapo' na mapabulong an ayam, naamigo niya an sarong trimobile driver na si Sol na nagtatabang saiya sa pagdara ki Bwakaw sa beterinaryo. Si Sol na gayo an nakua niyang kadamay asin ka-ranga sa inaagihan niyang problema. Huli sa ipinahiling na pakikitratong maimbong saiya ni Sol, siya nakamating kagianan sa buhay. Luway-luwsay nadiskubre niya an mga kaogmahan na haloy na niyang dai namamate, mala ta nag'iba an pananaw nya asin ta nagpatina' na siya kan ubanon niyang buhok, pinagayon an saiyang harong asin ini gabos katuwang niya si Sol. Sa gabos kaini, nagtambo' an pagkagusto niya ki Sol asin kan sinda nag-inoman, si Rene hinadokan si Sol sa pagkaturog sa kaburatan. Kan mapamata si Sol, grabe an pag'anggot asin pagkasuya ki Rene na haros mapadigwa' ta duman niya naisihan na bakla' palan si Rene. Manta, si Bwakaw nagrandan an kamugtakan asin dai ngane maligtas kan saiyang imahe na Santo Entierro. Si Bwakaw nagadan asin tinabangan siya kan mga amigo niya sa paglubong sa ayam. Huli kan mga pangyayari na naggigila-gila pa sana an kagadanan ni Bwakaw, si Rene tinuboan nin bagong buhay-bagsik. Sa pagkagadan ni Bwakaw, naghira an pananaw niya asin nawara' an saiyang kabublayan. May bago na siyang apresasyon sa buhay, mala ta binuruksan niya mga napapatos na gamit para sa mga babayaan kuta asin ikinaraag niya sa pagpagayon asin ta magin maogma an saiyang harong. Saiyang natantong gayo na siya buhay pa talaga.[2]

Cast[liwaton | liwaton an gikanan]

Toltolan[liwaton | liwaton an gikanan]

  1. "Cinemalaya: Bwakaw". Cinemalaya Independent Film Festival. Archived from the original on 15 September 2012. https://web.archive.org/web/20120915071144/http://www.cinemalaya.org/film_bwakaw.htm. Retrieved on 9 September 2012. 
  2. "Cinemalaya: Bwakaw". Synopsis. Archived from the original on 15 September 2012. https://web.archive.org/web/20120915071144/http://www.cinemalaya.org/film_bwakaw.htm. Retrieved on 12 December 2012.